Ti Libro ni Ether

1 Ket ita siak, ni Moroni, ituloyko ti mangted iti pakaammuan kadagiti nagkauna a nagindeg a dinadael ti ima ti Apo iti rabaw daytoy akin-amianan a pagilian.

2 Ket alaek ti pakaammok iti duapulo-ket-uppat a pinanid a nasarakan dagiti tao ni Limhi, a maawagan iti Libro ni Ether.

3 Ket iti panangipapanko a ti umuna a paset daytoy a sinurat, a mangibaga iti maipanggep iti pannakapartuat ti lubong, ken kasta met ken ni Adan, ken iti pakaammo manipud iti dayta a kanito ken uray pay ti dakkel a torre, ken ania man a banag a naaramid dagiti annak ti tattao agingga iti dayta a kanito, adda kadagiti Hudio—

4 Ngarud diak isurat dagiti banag a naaramid manipud kadagidi aldaw ni Adan agingga iti dayta a kanito, ngem addadan kadagiti pinanid, ket asino man a makasarak kadakuada, maaddaan met iti bileg tapno maalana ti sangabukel a pakaammuan.

5 Ngem adtoy, diak ited ti sangabukel a pakaammuan, ngem paset ti pakaammuan ti itedko, manipud iti torre agingga iti pannakadadaelda.

6 Ket itedko ti pakaammuan iti kastoy a wagas. Ni Ether ti nangisurat iti daytoy a kasuratan, ket an-annabo ni Coriantor.

7 Ni Coriantor lalaki nga anak ni Moron.

8 Ket ni Moron lalaki nga anak ni Ethem.

9 Ket ni Ethem lalaki nga anak ni Ahah.

10 Ket ni Ahah lalaki nga anak ni Set.

11 Ket ni Set lalaki nga anak ni Shiblon.

12 Ket ni Shiblon lalaki nga anak ni Com.

13 Ket ni Com lalaki nga anak ni Coriantum.

14 Ket ni Coriantum lalaki nga anak ni Amnigaddah.

15 Ket ni Amnigaddah lalaki nga anak ni Aaron.

16 Ket ni Aaron an-annabo ni Heth, a lalaki nga anak ni Hearthom.

17 Ket ni Hearthom lalaki nga anak ni Lib.

18 Ket ni Lib lalaki nga anak ni Kish.

19 Ket ni Kish lalaki nga anak ni Corom.

20 Ket ni Corom lalaki nga anak ni Levi.

21 Ket ni Levi lalaki nga anak ni Kim.

22 Ket ni Kim lalaki nga anak ni Morianton.

23 Ket ni Morianton an-annabo ni Riplakish.

24 Ket ni Riplakish lalaki nga anak ni Shez.

25 Ket ni Shez lalaki nga anak ni Heth.

26 Ket ni Heth lalaki nga anak ni Com.

27 Ket ni Com lalaki nga anak ni Coriantum.

28 Ket ni Coriantum lalaki nga anak ni Emer.

29 Ket ni Emer lalaki nga anak ni Omer.

30 Ket ni Omer lalaki nga anak ni Shule.

31 Ket ni Shule lalaki nga anak ni Kib.

32 Ket ni Kib lalaki nga anak ni Orihah, a lalaki nga anak ni Jared;

33 Nga immayan ni Jared ken ti kabsatna ken ti kaamaanda, ken sabsabali pay ken dagiti kaamaanda, manipud iti dakkel a torre, iti kanito a kiniro ti Apo ti pagsasao dagiti tao, ket insapatana iti pungtotna a mawarawaradanto iti amin a rabaw ti daga; ket nawarawara dagiti tao a naibatay iti balikas ti Apo.

34 Iti kadakkel ken kinamalalaki ti kabsat ni Jared, ken lalaki nga idaddaduma ti Apo, kinuna ni Jared, ti kabsatna, kenkuana: Umararawka iti Apo, tapno dinatayo tikawen ket saantayo a maawatan dagiti balikastayo.

35 Ket napasamak nga immararaw ti kabsat ni Jared iti Apo, ket naasian ti Apo ken ni Jared; ngarud saanna a kiniro ti pagsasao ni Jared; ket saan a natikaw ni Jared ken ti kabsatna.

36 Kalpasanna kinuna ni Jared iti kabsatna: Umararawka manen iti Apo, ket bareng no iliklikna ti pungtotna kadagiti gayyemtayo, tapno saanna a kiruen ti pagsasaoda.

37 Ket napasamak nga immararaw ti kabsat ni Jared iti Apo, ket naasian ti Apo kadagiti gayyemda ken kasta met kadagiti kaamaanda, ket saanda a natikaw.

38 Ket napasamak a nagsao manen ni Jared iti kabsatna, a kinunana: Mapanmo damagen iti Apo no papanawennatayo iti daga, ket no papanawennatayo iti daga, yararawmo kenkuana no sadino ti papanantayo. Ket asino ti makaammo no di ti Apo laeng a mangipan kadatayo iti daga a naisalsalumina iti amin a daga? Ket no mapasamak a kasta, agbalintayo a napudno iti Apo, tapno maawattayo a tawidtayo.

39 Ket napasamak nga immararaw ti kabsat ni Jared iti Apo maipanggep iti nagaon iti ngiwat ni Jared.

40 Ket napasamak a nangngeg ti Apo ti kabsat ni Jared, ket naasian kenkuana, ket kinunana kenkuana:

41 Mapanka ket urnongem dagiti arbanmo, lalaki ken babai, iti amin a kita; ken kasta met ti bukel ti daga a nadumaduma; ken dagiti kaamaam, ken kasta met ti kabsatmo a ni Jared ken ti kaamaanna; ken kasta met dagiti gayyemmo ken dagiti kaamaanda, ken dagiti gayyem ni Jared ken dagiti kaamaanda.

42 Ket inton maaramidmo dagitoy mapanmo ida idauluan iti tanap nga agpa-amianan. Ket sadiayto ti pangsabatak kenka, ket kuyogenkanto a mapan iti daga a naisalsalumina iti amin a daga.

43 Ket sadiayto a bendisionanka ken ti bukelmo, ket patanorekto dagiti bukelmo, ken ti bukel ti kabsatmo, ken dagiti sumurot kenka, a dakkel a pagilian. Ket awanto ti pagilian a nabilbileg ngem iti pangpatanorak iti bukelmo, iti amin a rabaw ti daga. Ket kasta ti aramidek kenka gapu iti daytoy naunday a panawen a yaararawmo kaniak.