1 Ket binilin ti Apo ti kabsat ni Jared a sumalog iti bantay iti imatang ti Apo, ket isuratna dagiti banag a nakitana; ket mapawilanda a mapan kadagiti annak dagiti tao agingga a kalpasan ti pannakailansana iti krus; ket daytoy a gapu ti nangidulinan ni Mosiah kadakuada, tapno saanda nga umay iti lubong agingga a kalpasan ti panagpakita ni Cristo kadagiti taona.

2 Ket kalpasan ti pudno a panagpakita ni Cristo kadagiti taona imbilinna a nasken a maipakitada.

3 Ket ita, kalpasan dayta, napukawanda iti pammati; ket awan malaksid dagiti Lamanite, ket dida inawat ti ebanghelio ni Cristo; ngarud nabilinak nga ilemmengko manen ida iti daga.

4 Adtoy, insuratko kadagitoy a pinanid ti tunggal banag a nakita ti kabsat ni Jared; ket sadiay awanen ti nain-indaklan a banag a naipakita ngem kadagidiay naipakita iti kabsat ni Jared.

5 Gapuna binilinnak ti Apo a mangisurat kadakuada; ket insuratko ida. Ket binilinnak a mangsaluad kadakuada; ken kasta met nga imbilinna nga italimengko ti patarus; gapuna intalimengko dagiti agipatpatarus, a maibatay iti bilin ti Apo.

6 Ta kinuna ti Apo kaniak: Saandanto a mapan kadagiti Gentil agingga iti aldaw a panagbabawida iti kinamanagbasolda, ket agbalinda a nadalus iti sango ti Apo.

7 Ket iti dayta nga aldaw a panangaramatda iti pammatida kaniak, kinuna ti Apo, a kas iti inaramid ti kabsat ni Jared, tapno mapasantoda kaniak, isunton ti panangipakitak kadakuada kadagiti banag a nakita ni Jared, uray pay ti pannakaibutaktak kadakuada dagiti amin a paltiingko, kinuna ni Jesucristo, ti Anak ti Dios, ti Ama ti langit ken daga, ken amin a banag nga adda kadagitoy.

8 Ket isu a mangsupanget iti balikas ti Apo, bay-am a mailunod; ket isu a di umawat kadagitoy a banag, bay-am a mailunod; ta diak pakitaan ida iti nain-indaklan a bambanag, kinuna ni Jesucristo; ta siak ti nagkuna.

9 Ket babaen ti bilinko aglukat ti langit ken agrikep; ket iti balikasko agarigenggen ti daga; ket iti bilinko pumusayto dagiti agindeg, a kasto iti apuy.

10 Ket isu a di mamati kadagiti balikasko saan a mamati kadagiti disipulok; ket no kastanto a saanak nga agsao, kednganyo; ta maammuanyonto a siak ti agsao, iti maudi nga aldaw.

11 Ngem isu a mamati kadagitoy a banag a nasaokon, isunto ti sarungkarak a pakaipakitaan iti Espirituk, ket ammonanto ken mamaneknek. Ta gapu iti Espirituk maammuannanto a pudno dagitoy a banag; ta allukoyenna dagiti tao nga agaramid iti nasayaat.

12 Ket ania man a banag a mangallukoy kadagiti tao nga agaramid iti nasayaat kukuak; ta awan ti sabali a paggapuan ti nasayaat no di siak. Siak met laeng ti mangidaulo kadagiti tao iti amin a nasayaat; isu a di mamati kadagiti balikasko saanto a mamati kaniak—a siak; ket isu a di mamati kaniak saanto a mamati iti Amak a nangibaon kaniak. Ta adtoy, siak ti Ama, siak ti lawag, ken ti biag, ken ti kinapudno iti lubong.

13 Umaykayo kaniak, O dakayo a Gentil, ket ipakitak kadakayo dagiti nain-indaklan a banag, ti pannakaammo a nailemmeng gapu iti kinaawan ti pammati.

14 Umaykayo kaniak, O dakayo a balay ti Israel, ket maipakitanto kadakayo no kasano ti kinaindaklan dagiti banag nga inlatang ti Ama nga agpaay kadakayo, manipud iti pannakabukel ti lubong; ket saan nga immay kadakayo gapu iti kaawan ti pammatiyo.

15 Adtoy, inton ray-abenyo dayta belo ti kaawan ti pammatiyo a nakaigapuan ti panagtalinaedyo iti nakaam-amak a kasasaad ti kinadangkes, ken kinatangken ti puso, ken kinabulsek ti panunot, tinto ngarud naindaklan ken nakaskasdaaw a bambanag a nailimed kadakayo manipud iti pannakabukel ti lubong—wen, inton awaganyo ti Ama babaen ti naganko, nga addaan iti nasneban a puso ken sibabawi nga espiritu, isunton ti pannakaammoyo a nalagip ti Ama ti katulagan nga inaramidna kadagidi ammayo, O balay ti Israel.

16 Ken isunton ti pannakaipalgak dagiti paltiingko nga imbilinko nga isurat ti katulongak a ni Juan kadagiti mata dagiti amin a tao. Laglagipenyo, inton makitayo dagitoy a banag, ammoyonton a magawgaw-aten ti panawen a pannakaipakitada iti amin nga aramid.

17 Ngarud, inton awatenyo daytoy a kasuratan ammoyonton a nangrugin ti aramid ti Ama iti amin a rabaw ti daga.

18 Ngarud, agbabawikayo amin nga adda iti ig-igid ti daga, ket umaykayo kaniak, ken mamatikayo iti ebangheliok, ket mabuniagankayo iti naganko; ta isu a mamati ken mabuniagan maisalakanto; ngem isu a di mamati mailunodto; ket surotento ti tanda dagiti mamati iti naganko.

19 Ket mabendisionanto ti makita a napudno iti naganko iti maudi nga aldaw, ta maitag-ayto a makipagnaed iti pagarian a naisagana a para kenkuana manipud iti pannakabukel ti lubong. Ket adtoy siak ti nangibaga iti dayta. Amen.