1 Ug karon ako, si Moroni, nakasulat na sa mga pulong nga gisugo kanako, sumala sa akong panumdoman; ug nasulti na nako kaninyo ang mga butang nga akong giselyohan; busa ayaw kini hikapa aron hubaron ninyo kini; kay kana nga butang gidili kaninyo, gawas sa umaabot sumala sa kaalam sa Dios.

2 Ug tan-awa, mahimo nga may kahigayonan ka nga imong ikapakita ang mga palid ngadto niadtong kinsa motabang aron matuman kini nga buhat;

3 Ug ipakita kini ngadto sa tulo pinaagi sa gahom sa Dios; mao nga masayod sila sa kasegurohan nga kini nga mga butang tinuod.

4 Ug pinaagi sa bâbâ sa tulo ka saksi kini nga mga butang mapahimutang; ug ang mga pagpamatuod sa tulo, ug kini nga buhat, diin mopakita sa gahom sa Dios ug usab sa iyang pulong, nga ang Amahan, ug ang Anak, ug ang Espiritu Santo mopamatuod—ug kining tanan mobarog isip usa ka pagpamatuod batok sa kalibotan sa kataposang adlaw.

5 Ug kon maghinulsol sila ug moduol sa Amahan pinaagi sa ngalan ni Jesus, dawaton sila sa gingharian sa Dios.

6 Ug karon, kon ako walay katungod niini nga mga butang, hukmi ninyo; kay kamo masayod nga ako adunay katungod sa higayon nga kamo makakita kanako, ug kita mobarog sa atubangan sa Dios sa kataposan nga adlaw. Amen.