1 Ug karon, ako, si Moroni, mopadayon sa pagsulat sa talaan ni Jared ug sa iyang igsoong lalaki.

2 Kay nahitabo human nga ang Ginoo miandam sa mga bato nga gidala sa igsoong lalaki ni Jared paingon sa bungtod, ang igsoong lalaki ni Jared nanaog gikan sa bungtod, ug iyang gibutang ang mga bato sa sulod sa giandam nga sakayan, ang usa sa matag tumoy diha niana; ug tan-awa naghatag kini og kahayag sa mga sakayan.

3 Ug sa ingon niana gipasanag sa Ginoo ang mga bato diha sa kangitngit, aron sa paghatag og kahayag ngadto sa mga lalaki, mga babaye, ug mga bata, aron dili sila motabok sa dako nga katubigan diha sa kangitngit.

4 Ug nahitabo nga sa dihang naandam na nila ang tanang matang sa pagkaon, aron mabuhi sila samtang anaa ibabaw sa tubig, ug usab sa pagkaon alang sa ilang mga gagmay ug dagkong pundok sa kahayopan, ug sa bisan unsa nga mananap o hayop o langgam nga ilang madala—ug nahitabo nga sa dihang nahimo na nila kining tanang butang misakay sila sa ilang mga sakayan o mga kasko, ug milawig sa dagat, nga mitugyan sa ilang mga kaugalingon ngadto sa Ginoo nga ilang Dios.

5 Ug nahitabo nga ang Ginoong Dios misugo nga adunay kusog nga hangin nga mohuyop ibabaw sa katubigan, paingon sa gisaad nga yuta; ug sa ingon niana gikusokuso sila sa mga balod sa dagat sa kakusog sa hangin.

6 Ug nahitabo nga daghang higayon nalubong sila sa mga kinahiladman sa dagat, tungod sa sama ka dako sa bukid nga mga balod nga mihasmag kanila, ug usab sa dako ug makalilisang nga mga unos nga nahitabo tungod sa kapintas sa hangin.

7 Ug nahitabo nga sa dihang nalubong sila sa lawod walay tubig nga makadaot kanila, kay ang ilang mga sakayan hugot sama sa usa ka tadyaw, ug hugot usab kini sama sa arka ni Noe; busa sa dihang giliyokan sila sa daghang katubigan nangamuyo sila sa Ginoo, ug siya midala kanila pag-usab ibabaw sa katubigan.

8 Ug nahitabo nga ang hangin wala gayod mohunong sa paghuyop paingon sa gisaad nga yuta samtang anaa sila sa katubigan; ug sa ingon niana sila gipadpad pinaagi sa kusog nga hangin.

9 Ug nag-awit sila og mga pagdayeg ngadto sa Ginoo; oo, ang igsoong lalaki ni Jared nag-awit og mga pagdayeg ngadto sa Ginoo, ug nagpasalamat siya ug nagdayeg sa Ginoo sa tibuok adlaw; ug sa dihang ang kagabhion miabot, wala sila mohunong sa pagdayeg sa Ginoo.

10 Ug sa ingon niana sila gipadpad; ug walay mangtas sa dagat nga makahasmag kanila, ni ang balyena makaguba kanila; ug sila adunay kahayag sa kanunay, sa ibabaw man sa tubig o sa ilawom sa tubig.

11 Ug sa ingon niana sila gipadpad, tulo ka gatos ug kap-atan ug upat ka adlaw ibabaw sa tubig.

12 Ug midunggo sila sa baybayon sa gisaad nga yuta. Ug sa dihang nakatunob na sila sa mga baybayon sa gisaad nga yuta nangyukbo sila sa yuta, ug mipaubos sa ilang kaugalingon sa atubangan sa Ginoo, ug nanghilak sa kalipay sa atubangan sa Ginoo, tungod sa kadaghan sa iyang malumo nga kaluoy ngadto kanila.

13 Ug nahitabo nga nangadto sila sa ibabaw sa yuta, ug misugod sa pagtikad sa yuta.

14 Ug si Jared adunay upat ka anak nga lalaki; ug sila gitawag ug Jacom, ug Gilgah, ug Mahah, ug Orihah.

15 Ug ang igsoong lalaki ni Jared usab nakaanak ug mga lalaki ug mga babaye.

16 Ug ang mga higala ni Jared ug iyang igsoong lalaki miabot sa gidaghanon nga kawhaan ug duha ka kalag; ug nakaanak usab sila og mga lalaki ug mga babaye sa wala pa sila moabot sa gisaad nga yuta; ug busa nagsugod sila sa pagdaghan.

17 Ug gitudloan sila sa paglakaw nga mapainubsanon sa atubangan sa Ginoo; ug usab gitudloan sila gikan sa kahitas-an.

18 Ug nahitabo nga nagsugod sila sa pagkatap ibabaw sa yuta, ug sa pagsanay ug pagtikad sa yuta; ug nag-anam sila og kalig-on dinhi sa yuta.

19 Ug ang igsoong lalaki ni Jared nagsugod sa pagkatigulang, ug nakita nga siya sa dili madugay manaog na ngadto sa lubnganan; mao nga miingon siya kang Jared: Atong pundokon ang atong katawhan aron iphon nato sila, nga kita masayod gikan kanila kon unsa ang ilang gitinguha gikan kanato sa dili pa kita manaog ngadto sa atong mga lubnganan.

20 Ug sumala niana ang katawhan gipundok. Karon ang gidaghanon sa mga anak nga lalaki ug sa mga anak nga babaye sa igsoong lalaki ni Jared mga kawhaan ug duha ka tawo; ug ang gidaghanon sa mga anak nga lalaki ug mga anak nga babaye ni Jared mga napulo ug duha, kay siya adunay upat ka anak nga lalaki.

21 Ug nahitabo nga giihap nila ang ilang katawhan; ug human sa ilang pag-ihap kanila, nagtinguha sila gikan kanila og mga butang nga gusto nila nga ilang buhaton sa dili pa sila manaog ngadto sa ilang mga lubnganan.

22 Ug nahitabo nga ang katawhan nagtinguha gikan kanila nga sila modihog og usa sa ilang mga anak nga lalaki nga mahimong usa ka hari nga labaw kanila.

23 Ug karon tan-awa, bug-at kaayo kini ngadto kanila. Ug ang igsoong lalaki ni Jared miingon kanila: Sa pagkatinuod kini nga butang moresulta sa pagkabihag.

24 Apan si Jared miingon sa iyang igsoong lalaki: tugoti sila nga sila makabaton og usa ka hari. Ug busa siya miingon kanila: Pagpili kamo gikan sa among mga anak nga lalaki og usa ka hari, bisan kinsa nga inyong gusto.

25 Ug nahitabo nga ilang gipili gani ang kinamagulangan nga anak sa igsoong lalaki ni Jared; ug ang iyang ngalan mao si Pagag. Ug nahitabo nga mibalibad siya ug dili gusto nga mahimo nila nga hari. Ug ang katawhan gusto nga ang iyang amahan mopugos kaniya; apan ang iyang amahan wala mohimo; ug siya misugo kanila nga sila dili mopugos og tawo nga mahimo nila nga hari.

26 Ug nahitabo nga mipili sila sa tanang igsoong lalaki ni Pagag, ug namalibad sila.

27 Ug nahitabo nga gani ang mga anak nga lalaki ni Jared dili, gani ang tanan gawas sa usa; ug si Orihah gidihogan nga mahimo nga hari ibabaw sa katawhan.

28 Ug nagsugod siya sa paghari, ug ang katawhan nagsugod sa pag-uswag; ug nahimo silang hilabihan ka adunahan.

29 Ug nahitabo nga si Jared namatay, ug ang iyang igsoong lalaki usab.

30 Ug nahitabo nga si Orihah naglakaw nga mapainubsanon sa atubangan sa Ginoo, ug nahinumdom unsa ka dako sa mga butang nga nahimo sa Ginoo alang sa iyang amahan, ug usab nagtudlo sa iyang katawhan unsa ka dako sa mga butang nga nahimo sa Ginoo alang sa ilang mga amahan.