1 Ug nahitabo nga si Orihah mihimo og paghukom sa yuta diha sa pagkamatarong sa tanan niyang mga adlaw, kansang mga adlaw hilabihan sa kadaghan.

2 Ug nakaanak siya og mga lalaki ug mga babaye; oo, siya nakaanak og katloan ug usa, diin taliwala kanila adunay kawhaan ug tulo ka lalaki.

3 Ug nahitabo nga nakaanak usab siya ni Kib sa iyang katigulangon. Ug nahitabo nga si Kib ang naghari puli kaniya; ug si Kib nakaanak ni Corihor.

4 Ug sa panahon nga si Corihor katloan ug duha ang panuigon mibatok siya sa iyang amahan, ug miadto ug mipuyo sa yuta sa Nehor; ug nakaanak siya og mga lalaki ug mga babaye, ug nahimo silang hilabihan ka matahom; mao nga si Corihor nakadani og daghang katawhan nga mosunod kaniya.

5 Ug sa dihang nakapundok siya og kasundalohan miadto siya sa yuta sa Moron diin ang hari nagpuyo, ug mibihag kaniya, nga nagpahitabo sa gipamulong sa igsoong lalaki ni Jared nga sila dad-on ngadto sa pagkabihag.

6 Karon ang yuta sa Moron, diin ang hari nagpuyo, duol ra sa yuta nga gitawag sa mga Nephita og Biniyaan.

7 Ug nahitabo nga si Kib nabihag, ug ang iyang katawhan anaa ubos sa pagdumala ni Corihor nga iyang anak nga lalaki, hangtod siya nahimong hilabihan ka tigulang; bisan pa niana si Kib nakaanak ni Shule sa iyang katigulangon, samtang siya diha pa sa pagkabihag.

8 Ug nahitabo nga si Shule nasuko sa iyang igsoong lalaki; ug si Shule nahimo nga lig-on, ug nahimong gamhanan sumala sa kusog sa usa ka tawo; ug usab batid siya sa paghukom.

9 Mao nga, miadto siya sa bungtod Ephraim, ug nagtunaw siya gikan sa bungtod, ug naghimo og mga espada gikan sa puthaw alang kanila nga mikuyog kaniya; ug human sa iyang pagsangkap kanila og mga espada mibalik siya ngadto sa siyudad sa Nehor, ug nakiggubat sa iyang igsoong lalaki nga si Corihor, sa niana nga paagi nakuha niya ang gingharian ug gibalik kini ngadto sa iyang amahan nga si Kib.

10 Ug karon tungod sa butang nga nahimo ni Shule, ang iyang amahan mitugyan sa gingharian kaniya; busa nagsugod siya sa paghari puli sa iyang amahan.

11 Ug nahitabo nga nanghukom siya sa pagkamatarong; ug mipakatap siya sa iyang gingharian ibabaw sa tibuok yuta, kay ang katawhan nahimong hilabihan ka daghan.

12 Ug nahitabo nga si Shule nakaanak usab og daghang lalaki ug mga babaye.

13 Ug si Corihor naghinulsol sa daghang daotan nga iyang nahimo; mao nga gihatagan siya ni Shule og gahom sa iyang gingharian.

14 Ug nahitabo nga si Corihor adunay daghang anak nga lalaki ug mga anak nga babaye. Ug taliwala sa mga anak nga lalaki ni Corihor adunay usa nga ang ngalan si Noah.

15 Ug nahitabo nga si Noah mibatok ni Shule, ang hari, ug sa iyang amahan usab nga si Corihor, ug midani ni Cohor nga iyang igsoong lalaki, ug usab sa tanan nga iyang kaigsoonan ug sa daghan nga katawhan.

16 Ug nakiggubat siya ni Shule, ang hari, diin iyang naangkon ang yuta sa ilang unang kabilin; ug nahimo siyang usa ka hari niana nga bahin sa yuta.

17 Ug nahitabo nga nakiggubat siya pag-usab kang Shule, ang hari; ug gidakop niya si Shule, ang hari, ug midala kaniya nga bihag ngadto sa Moron.

18 Ug nahitabo nga sa dihang iya na unta siyang patyon, ang mga anak nga lalaki ni Shule mikamang ngadto sa balay ni Noah sa kagabhion ug mipatay kaniya, ug miguba sa pultahan sa bilanggoan ug mipagawas sa ilang amahan, ug mipahimutang kaniya sa iyang trono sa iyang kaugalingon nga gingharian.

19 Mao nga, ang mga anak nga lalaki ni Noah mitukod sa iyang gingharian puli kaniya; bisan pa niana wala na sila makaangkon og gahom labaw ni Shule nga hari, ug ang katawhan kinsa nga anaa ubos sa pagmando ni Shule nga hari miuswag sa hilabihan ug nag-anam ka gamhanan.

20 Ug ang nasod nabahin; ug dihay duha ka gingharian, ang gingharian ni Shule, ug ang gingharian ni Cohor, nga anak nga lalaki ni Noah.

21 Ug si Cohor, ang anak nga lalaki ni Noah, nagsugo nga ang iyang katawhan makiggubat kang Shule, diin si Shule mibuntog kanila ug mipatay kang Cohor.

22 Ug karon si Cohor adunay anak nga lalaki kinsa gitawag og Nimrod; ug si Nimrod mitugyan sa gingharian ni Cohor ngadto kang Shule, ug nakaangkon siya og kaluoy sa mga mata ni Shule; mao nga si Shule mitugyan og dako nga kaluoy kaniya, ug gibuhat niya didto sa gingharian ni Shule ang nahiuyon sa iyang mga tinguha.

23 Ug usab sa pagmando ni Shule dihay miabot nga mga propeta taliwala sa katawhan, kinsa pinadala gikan sa Ginoo, nagtagna nga ang pagkadaotan ug pagsimba og mga dios-dios sa katawhan nagdala og tunglo sa yuta, ug malaglag sila kon dili sila maghinulsol.

24 Ug nahitabo nga ang katawhan mibiaybiay sa mga propeta, ug mitamay kanila. Ug nahitabo nga si hari Shule mihimo og paghukom batok sa tanan niadtong mibiaybiay sa mga propeta.

25 Ug mihimo siya og usa ka balaod sa tibuok yuta, nga naghatag og gahom sa mga propeta nga sila makaadto bisan asa nila gusto nga moadto; ug tungod niini ang katawhan naghinulsol.

26 Ug tungod kay ang katawhan naghinulsol sa ilang mga pagkadaotan ug sa pagsimba sa mga dios-dios ang Ginoo miluwas kanila, ug nagsugod na usab sila sa pag-uswag dinha sa yuta. Ug nahitabo nga si Shule nakaanak og mga lalaki ug mga babaye sa iyang katigulangon.

27 Ug wala nay mga gubat sa mga adlaw ni Shule; ug nahinumdoman niya ang dagkong mga butang nga gihimo sa Ginoo alang sa iyang mga amahan sa pagdala kanila tabok sa dakong lawod paingon sa gisaad nga yuta; mao nga mihimo siya og matarong nga mga paghukom sa tibuok niyang mga adlaw.