1 Ug karon ako, si Moroni, mopadayon sa akong talaan. Busa, tan-awa, nahitabo nga tungod sa tinago nga mga kalihokan ni Akish ug sa iyang kahigalaan, tan-awa, gipukan nila ang gingharian ni Omer.

2 Bisan pa niana, ang Ginoo nagmaluluy-on kang Omer, ug usab sa iyang mga anak nga lalaki ug mga anak nga babaye kinsa wala magtinguha sa iyang kalaglagan.

3 Ug ang Ginoo mipasidaan kang Omer pinaagi sa usa ka damgo nga kinahanglan siya nga mobiya sa yuta; mao nga si Omer mibiya sa yuta uban sa iyang pamilya, ug mipanaw sa daghang adlaw, ug miabot ug miagi sa gamay nga bungtod sa Shim, ug miabot sa dapit diin ang mga Nephita nalaglag, ug gikan didto paingon sa silangan nga bahin, ug miabot sa usa ka dapit nga gitawag og Ablom, duol sa baybayon, ug didto siya mitukod sa iyang tolda, ug usab ang iyang mga anak nga lalaki ug mga anak nga babaye, ug ang tanan niya nga sakop sa pamilya, gawas ni Jared ug sa iyang pamilya.

4 Ug nahitabo nga si Jared gidihogan nga mahimong hari sa katawhan, pinaagi sa kamot sa pagkadaotan; ug iyang gihatag ni Akish ang iyang anak nga babaye aron pangasaw-on.

5 Ug nahitabo nga si Akish nagtinguha sa pagpatay sa iyang ugangan nga lalaki; ug gigamit niya kadtong mga nakapanumpa kaniya pinaagi sa panumpa sa mga karaan, ug ilang nakuha ang ulo sa iyang ugangan nga lalaki, samtang naglingkod siya sa iyang trono, nga nakig-atubang sa iyang katawhan.

6 Kay hilabihan ang pagkatap niini nga kadaotan ug tinago nga katilingban nga kini nakadaot sa mga kasingkasing sa tanang katawhan; busa si Jared gipatay diha sa iyang trono, ug si Akish ang nagmando puli kaniya.

7 Ug nahitabo nga si Akish misugod sa pagkasina sa iyang anak nga lalaki, busa siya mibalhog kaniya sa bilanggoan, ug mihatag kaniya og diyotay o walay pagkaon hangtod nga siya namatay.

8 Ug karon ang igsoon niyang lalaki nga nag-antos sa kamatayon, (ug ang iyang ngalan mao si Nimrah) nasuko sa iyang amahan tungod nianang gibuhat sa iyang amahan ngadto sa iyang igsoon nga lalaki.

9 Ug nahitabo nga si Nimrah mipundok og pipila ka kalalakin-an, ug milayas sa yuta, ug miabot ug mipuyo uban kang Omer.

10 Ug nahitabo nga si Akish nakaanak og lain pang mga lalaki, ug nalukmay nila ang mga kasingkasing sa katawhan, bisan pa man og sila nanumpa ngadto kaniya sa paghimo sa tanang matang sa kadaotan sumala sa iyang gitinguha.

11 Karon ang katawhan ni Akish nagtinguha nga makaangkon og bahandi, gani sama nga si Akish matinguhaon sa gahom; mao nga, ang mga anak nga lalaki ni Akish nagtanyag kanila og salapi, diin niana nga mga paagi ilang nadani ang mas daghang bahin sa katawhan sa pagsunod kanila.

12 Ug didto nagsugod ang usa ka gubat tali sa mga anak nga lalaki ni Akish ug kang Akish, nga milungtad sulod sa daghang katuigan, oo, ngadto sa pagkalaglag sa hapit tanang katawhan sa gingharian, oo, gani ang tanan, gawas lamang sa katloan ka tawo, ug sila kinsa nakalayas ngadto sa balay ni Omer.

13 Mao nga, si Omer gipabalik pag-usab ngadto sa yuta sa iyang kabilin.

14 Ug nahitabo nga si Omer nagsugod sa pagkatigulang; bisan pa niana, sa iyang katigulangon nakaanak siya ni Emer; ug gidihogan niya si Emer nga mahimong hari aron magmando puli kaniya.

15 Ug human sa iyang pagdihog kang Emer aron mahimong hari nakakita siya og kalinaw sa yuta sulod sa duha ka tuig, ug namatay siya, nga nakasinati og hilabihan ka daghang adlaw, nga puno sa kasubo. Ug nahitabo nga si Emer mimando puli kaniya, ug misunod sa mga tunob sa iyang amahan.

16 Ug ang Ginoo misugod na usab sa pagwagtang sa tunglo gikan sa yuta, ug ang mga sakop sa balay ni Emer miuswag sa hilabihan ubos sa pagmando ni Emer; ug sulod sa kan-uman ug duha ka tuig sila nahimong hilabihan ka lig-on, nga niana sila nahimong hilabihan ka adunahan—

17 Nakabaton sa tanan nga matang sa bunga, ug sa lugas, ug sa mga sida, ug sa maayo nga panapton, ug sa bulawan, ug sa pilak, ug sa mahalon nga mga butang;

18 Ug usab sa tanan nga matang sa mga kabakahan, sa mga toro, ug mga baka, ug sa karnero, ug sa mga baboy, ug sa mga kanding, ug usab sa daghang uban pa nga matang sa mga hayop nga mapuslanon nga makaon sa tawo.

19 Ug sila usab adunay mga kabayo, ug mga asno, ug dihay mga elepante ug mga curelom ug mga cumom; ang tanan niini mapuslanon sa tawo, ug labi na gayod ang mga elepante ug mga curelom ug mga cumom.

20 Ug sa ingon niana ang Ginoo mibu-bo sa iyang mga panalangin niini nga yuta, nga mao ang pinili labaw sa tanang mga yuta; ug siya misugo nga kinsa ang makapanag-iya niini nga yuta kinahanglan manag-iya niini alang sa Ginoo, o sila gayod pagalaglagon sa higayon nga sila mahinog sa kadaotan; kay diha niana, miingon ang Ginoo: Akong ibu-bo sa hingpit ang akong kasuko.

21 Ug si Emer mihimo og paghukom subay sa pagkamatarong sa tanan niyang mga adlaw, ug nakaanak siya og daghang lalaki ug babaye; ug nakaanak siya ni Coriantum, ug gidihogan niya si Coriantum aron momando puli kaniya.

22 Ug human sa iyang pagdihog ni Coriantum aron maghari puli kaniya nabuhi pa siya og upat ka tuig, ug nakakita siya og kalinaw sa yuta; oo, ug gani nakakita siya sa Anak sa Pagkamatarong, ug nagmaya ug naghimaya sa iyang adlaw; ug namatay siya nga nagbaton og kalinaw.

23 Ug nahitabo nga si Coriantum misunod sa mga tunob sa iyang amahan, ug nagtukod og daghang bantogan nga mga siyudad, ug gipangalagad ang unsay maayo ngadto sa iyang katawhan sa tanan niyang mga adlaw. Ug nahitabo nga siya walay mga anak bisan hangtod nga hilabihan na siya ka tigulang.

24 Ug nahitabo nga ang iyang asawa namatay, nga usa ka gatos ug duha ka tuig ang panuigon. Ug nahitabo nga si Coriantum nangasawa, sa iyang katigulangon, og usa ka batan-on nga babaye, ug nakaanak og mga lalaki ug mga babaye; mao nga nagpabilin siya nga buhi hangtod nga siya usa ka gatos ug kap-atan ug duha ka tuig ang panuigon.

25 Ug nahitabo nga nakaanak siya ni Com, ug si Com mimando puli kaniya; ug siya mimando og kap-atan ug siyam ka tuig, ug nakaanak siya ni Heth; ug usab nakaanak siya og lain pa nga mga lalaki ug mga babaye.

26 Ug ang katawhan mikatap na usab sa ibabaw sa tibuok yuta, ug didto nagsugod na usab ang hilabihan nga pagkadaotan sa ibabaw sa yuta, ug si Heth misugod sa paghangop sa tinago nga mga plano ingon usab sa karaan, sa paglaglag sa iyang amahan.

27 Ug nahitabo nga gipapahawa niya ang iyang amahan gikan sa trono, kay siya mipatay kaniya gamit ang iyang kaugalingon nga espada; ug siya ang nagmando puli kaniya.

28 Ug dihay miabot na usab nga mga propeta sa yuta, nagsangyaw og paghinulsol ngadto kanila—nga sila kinahanglang moandam sa agianan sa Ginoo o adunay moabot nga usa ka tunglo sa ibabaw sa yuta; oo, gani adunay dako nga kagutom, diin sila pagalaglagon kon dili sila maghinulsol.

29 Apan ang katawhan wala motuo sa mga pulong sa mga propeta, apan sila misalikway kanila; ang pipila kanila gitambog nila ngadto sa mga lungag ug gipasagdan sila aron mamatay. Ug nahitabo nga gihimo nila kini nga mga butang sumala sa mga sugo sa hari, nga si Heth.

30 Ug nahitabo nga dihay nagsugod nga grabe nga kainit sa yuta, ug ang mga lumulupyo nagsugod sa hilabihan ka paspas nga pagkamatay tungod sa kainit, kay walay ulan sa ibabaw sa yuta.

31 Ug dihay mitungha nga malala nga mga bitin usab sa ibabaw sa yuta, ug nakapatay og daghang katawhan. Ug nahitabo nga ang ilang gagmayng kahayopan nagsugod sa pagpanglayas gikan sa malala nga mga bitin, paingon sa yuta sa habagatan nga bahin, nga gitawag sa mga Nephita og Zarahemla.

32 Ug nahitabo nga daghan niini ang namatay sa agianan; bisan pa niana, ang uban milayas ngadto sa yuta sa habagatan nga bahin.

33 Ug nahitabo nga ang Ginoo mihimo nga kini nga mga bitin dili na mogukod kanila, apan mobabag kini sa agianan nga ang katawhan dili makaagi, nga si kinsa ang mangahas sa pag-agi mamatay tungod sa malala nga mga bitin.

34 Ug nahitabo nga ang katawhan misunod sa giagian sa mga hayop, ug mikaon sa mga patay nga lawas niadtong nangamatay sa agianan, hangtod nga nakaon nila kining tanan. Karon sa pagkakita sa katawhan nga sila mamatay gayod nagsugod sila sa paghinulsol sa ilang mga kadaotan ug nangamuyo sa Ginoo.

35 Ug nahitabo nga sa dihang mihimo sila og igong pagpaubos sa ilang kaugalingon sa atubangan sa Ginoo mipadala siya og ulan sa ibabaw sa yuta; ug ang katawhan misugod na usab sa pagkalagsik, ug nagsugod ang pagpamunga dapit sa amihanan nga mga nasod, ug sa tanang naglibot nga nasod. Ug ang Ginoo mipakita sa iyang gahom ngadto kanila sa pagpanalipod kanila gikan sa kagutom.