Halipot Nga Pahayag Mahitungod Han
Libro Ni Mormon

An Libro ni Mormon in usa nga baraan nga sinnrat han mga tawo nga nag-ukoy hadton kamaihaan nga panahon ha kadaan nga America, nga igin-ukit dida hin tinabas nga tumbaga. Upat kalain nga metal nga mga lamina an nagagadayan hine dinhe nga libro:

1. An mga Lamina ni Nephi, nga duduha nga kalain: An Gudtiay nga mga Lamina ngan han Dagko nga mga Lamina. An una in nagsusumat hadton mga espirituwal nga mga butang ngan han buruhaton ngan mga tutdo han mga propeta, samtang naman an ikaduha in nagsusumat han mga kaagi hadton mga panahon han mga tawo nga nagagadayan (1 Nephi 9:2–4). Tikang han panahon ni Mosiah, an dagko nga mga lamina in mayada dagko ngan importante nga mga butang espirituwal.

2. An mga Lamina ni Mormon, in mayada pinahalipot nga sumat ni Mormon tikang han Dagko nga mga Lamina ni Nephi, upod an damo nga mga komentaryo hadto. Ine nga mga lamina in mayada liwat dugtong nga kaagi nga iginsurat ni Mormon ngan han mga igindugang han iya anak nga hi Moroni.

3. An mga Lamina ni Ether, nga nagsusumat han kaagi han mga Jaredite. Ine nga sinurat in ginpahalipot ni Moroni, iginlakip han iya kalugaringon nga mga komentaryo ngan igin-upod an sinurat han kabug-os nga kaagi ha ilarum han ngaran nga “Libro ni Ether.”

4. An mga Lamina nga Tumbaga nga gindara han mga tawo ni Lehi tikang ha Jerusalem hadton 600 B.C. Ine aada an “lima nga libro ni Moises, … Ngan liwat sinurat han mga Judiyo tikang ha tinikangan … ngada han pagtikang han paghadi ni Sedekias, hadi han Judah; upod liwat han mga panagna han mga baraan nga mga propeta” (1 Nephi 5:11–13). Damo nga mga pamulong tikang hine nga mga lamina, in nahatutungod kan Isaias ngan an iba pa nga mga propeta, nga aada ha Biblia o waray ha Biblia in aada ha Libro ni Mormon.

An Libro ni Mormon in mayada 15 nga nangunguna nga parte o mga bahin, nga kinikilala, labot hin usa nga libro, nga ginngangaran hadton nangunguna nga nagsurat hito. An una nga bahin (an una nga unom nga libro, tubtub ngada ha Omni) in ginhubad tikang han Gudtiay nga mga Lamina ni Nephi. Ha butnga han libro ni Omni ngan Mosiah in mayada ginlakip nga ginngangaranan nga Mga Pulong ni Mormon. Ine nga mga ginlakip in nagsusumpay han mga sinurat nga gin-ukit dida han Gudtiay nga mga Lamina upod han pinahalipot nga sumat ni Mormon tikang han Dagko nga mga Lamina.

An pinakahalaba nga bahin, tikang han Mosiah ngadto ha Mormon, capitulo 7, upod hito, in hinubad dida han pinahalipot nga surat ni Mormon tikang han Dagko nga mga Lamina ni Nephi. An katapusan nga parte, tikang han Mormon, capitulo 8, tubtub ngada han katapusan han libro, in gin-ukit han anak ni Mormon nga hi Moroni, han iya, kahuman igsurat an kahimtang han kinabuhi han iya tatay, in naghimo hin pagpahalipot nga sinurat mahitungod han mga Jaredite (nga Libro ni Ether) nga katapos nagdugang hin sinurat nga kinikilala nga Libro ni Moroni.

Hadton tuig 421 A.D., hi Moroni, an pinaka-urhi nga nagsusurat nga propeta nga Nephite, in ginselyohan ngan gintago ngadto ha Ginoo, adto nga sagrado nga kasuratan para igpagawas ha mga urhi nga adlaw han gintagna han tingog han Diyos pinaagi han una nga mga propeta. Han tuig 1823 A.D., an amo la gihapon nga Moroni, nga nabanhaw na, in nagbisita kan Propeta Joseph Smith ngan nagtubyan hadto nga mga igin-ukit nga mga lamina ngada ha iya.