1 Ao e a koro bukina bwa e riki te maenako imarenaia aomata, n te aro are a bon kamaenakoaki ikai ao ikekei ao a bon touii nako kawaia, ma ni katuka Nibwaai n ti ngaia, ngke e tei i nukaia.

2 Ao e a koro bukina bwa Nibwaai e touanako kawaina nakon batana, ma n iangoi bwaai ake e a tia ni kaoti te Uea nakoina.

3 Ao e a koro bukina bwa ngke e tabe ni iangoi—kioina ngkai e bon rawawata ibukin buakakaia te botanaomata aika Nibwaite, aia mwakuri aika a roo, ma aia tiriaomata, ma aia mwakuri n iowawa n anaibwai, ma aekan buakaka nako—ao e a koro bukina bwa ngke e tabe ni iango i nanona, nooria, e roko irouna te bwanaa ni kangai:

4 Ko na kakabwaiaki ngkoe, Nibwaai, ibukin bwaai ake ko a tia ni karaoi; bwa I a tia n noora arom n aki kua n tataekina te taeka, are I a tia n anganiko nakoia te botanaomata aio. Ao ko a tia n aki maakuia, ma n aki kawakina oin maium, ma ko a tia n ukoukora nanou, ma n kaawakin au tua.

5 Ao ngkai, ibukina bwa ko a tia ni karaoa aio ma te aki kua, nooria, N na kakabwaiako n aki toki; ao N na kakorakorako n taetae ao n am waaki, n te onimaki ao n te mwakuri; eng, n te aro bwa bwaai ni kabane a na karaoaki nakoim n aron am taeka, bwa ko na bon aki tuatua te bwai ae e aki boraoi ma nanou.

6 Nooria, bon ngkoe Nibwaai, ao bon Ngai te Atua. Nooria, I taekinna nakoim imataia au anera, bwa e na reke nakoim te mwaaka i aoia te botanaomata aio, ao ko na orea te aonaba n te rongo, ma taian aoraki nako, ma te uruaki, ni kaineti ma buakakaia te botanaomata aio.

7 Nooria, I anganiko te mwaaka, ao te bwai are ko kabaea iaon te aba e na kabaeaki i karawa; ao te bwai are ko kabwara iaon te aba e na kabwaraki naba i karawa; ao ikai are e na iai mwaakam i aoia te botanaomata aio.

8 Ao ngaia are, ngkana ko kangai nakon te tembora aei e na raeuaki n riki bwa uoua, ao e na bon riki.

9 Ao ngkana ko kangai nakon te maunga aio, Ko na bwaka inano ma n riki ni boraoi, e na bon riki.

10 Ao nooria, ngkana ko kangai bwa te Atua e na oroia te botanaomata aio ao e na bon koro bukina.

11 Ao ngkai nooria, I tuangko, bwa ko na nako man taekinna nakoia te botanaomata aio, bwa e taku te Uea ae te Atua, are Moan te Mwaaka; Bwa ngkana kam aki rairinanomi ao kam na oreaki, ma ni kamaunaki.

12 Ao nooria, ngkanne e a koro bukina bwa ngke e a tia te Uea n taekin taeka aikai nakon Nibwaai, e bon toki ma n aki nakon batana, ma e okirikaki nakoia aomata ake a uanao ake a tia ni maenako n te aba, ma n taekina nakoia ana taeka te Uea are e a tia n taekinaki nakoina, are e kaineti ma kamaunaakiia ngkana aki rairinanoia.

13 Ao ngkanne, e ngae ngke iai te mwakuri ae kamimi are e a tia n tuangiia Nibwaai ni kaineti ma maten mataniwiia taan moti, ao a bon kamatoatoai nanoia ma n rawa n ongo nakon ana taeka te Uea.

14 Ngaia are Nibwaai e bon taekina nakoia ana taeka te Uea, ni kangai: E taku te Uea ngkana kam aki rairinanomi, ao kam na oreaki ma ni kamaunaki.

15 Ao e a koro bukina bwa ngke e a tia Nibwaai n taekina te taeka nakoia, nooria, a bon reitinako ni kamatoatoai nanoia ma n rawa n ongo n ana taeka; ngaia are a bon taetae ni kaitaraa ni kabuakaka, ma n ukoukora katokaan baia iaona bwa aonga n tewea nako nanon te nne ni kaikain.

16 Ma nooria, mwaakan te Atua e mena irouna, ao a bon aki kona n tewe nakoa nako nanon te nne ni kaikain, bwa e bon anaaki iroun te Tamnei ma n uotaki nako ma imataia.

17 Ao e a koro bukina bwa e bon mwananga ma te Tamnei mai irouia aomata aika a uanao aika maeka n te tabo teuana nakoia aomata aika a uanao n te tabo riki teuana, n tataekina ana taeka te Atua, ni karokoa ae e a tia n aekinna nakoia ni kabane, ke ni kabuta nako buakoia aomata ni kabane.

18 Ao e a koro bukina bwa a bon rawa n ongo nakon ana taeka; ao e a waaki te itabaraaraa, n te aro are a bon maenako ni kaaitaraia i buakoia irouia ma ni waaki n tiringia n tatabemania nako ma te kabaang.

19 Ao ikai are e a toki iai aia kaitibwi ma teuana n ririki n tautaeka taan moti i aoia ana botanaomata Nibwaai.