1 Ac tukun ma inge ke yac ahkitngucul ac luo ke kolyuck luhn mwet nuhnuhnkuh fohs tuh upaclah, yohkna oruh tuh oasr mweun fin acn nuhkwewa inmahsrlon mwet nuhkwewa lal Nephi.

2 Ac un mwet pihsrapasr lukmac se inge pa suc tuh oruh orekma in kuhnaustwen ac koluk se inge. Ac mweun se inge tuh fahfahlac na ke yac na fohn sac; ac ke yac ahkitngucul ac tolu mweun uh oacyacpac fahfahlac na.

3 Ac tukun ma inge ke yac se inge Nephi el tuh kwacfe nuh sin Leum, fahk:

4 O Leum, nimet lwelah tuh mwet inge in fah kuhnausyucklac ke katlas; tuhsruhk O Leum, lwelah tuh in oasr sie sracl in mongo fin acn uh, in moklwelosyak in esam Leum God lalos, ac sahp elos fah auliyak ac forlah nuh yurum.

5 Ac ma inge oreklac, in fal nuh ke kahs lal Nephi. Ac oasr sie sracl in mongo yohk fin acn uh, inmahsrlon mwet nuhkwewa lal Nephi. Ac ohinge ke yac ahkitngucul ac ahkosr sracl in mongo sac tuh fahfahlac na, ac orekma in kuhnaustwen ke katlas tuh tui tuhsruhk upaclah ke sracl in mongo sac.

6 Ac orekma in kuhnaustwen se inge tuh oacyacpac fahfahlac na nuh ke yac ahkitngucul ac limekohsr. Tuh facluh tuh srihngihlyuck tuh acn uh paho, ac tiacna acse yohk grain ke puhlan pacl luhn grain; ac facluh nohfohn srihngihlyuck, finne inmahsrlon mwet Laman ac oacyacpac inmahsrlon mwet Nephi, tuh elos srihngihlyuck oruh tausin mwet misac ke acn ma koluk na pwacye fin acn uh.

7 Ac tukun ma inge mwet uh liye tuh elos ac misac ke sracl in mongo, ac elos muhtwacwacack in esam Leum God lalos; ac elos muhtwacwacack in esam kahs lal Nephi.

8 Ac mwet uh muhtwacwacack in kwacfe sin mwet nuhnuhnkuh fuhlwact lalos ac mwet kol lalos, tuh elos in fahk nuh sel Nephi: Liye, kuht etuh lah kom sie mwet luhn God, ac ke ma inge pruhe nuh sin Leum God lom tuh Elan furohklah liki kuht sracl in mongo se inge, fin tiac kahs nuhkwewa ma kom tuh fahk ke kuhnausyucklac lasr uh ac ahkpwacyeiyucklac.

9 Ac tukun ma inge mwet nuhnuhnkuh elos fahk nuh sel Nephi, in fal nuh ke kahs ma elos kena kac. Ac tukun ma inge ke Nephi el liye lah mwet ah auliyak ac tuh ahkpuhsisaclyelos sifacna ke nuknuk mah, el sifilpac pruhe nuh sin Leum, fahk:

10 O Leum, liye mwet inge auliyak; ac elos luhslah un mwet lal Gadianton liki inmahsrlolos yohkna oruh elos wacngihnlac, ac elos okanlah plwacn lukmac lalos fin facluh.

11 Inge, O Leum, ke srihpen puhsisacl lalos yac Kom kuh in furohklah kasrkuhsrak Lom, ac lwelah kasrkuhsrak Lom in ahkmisyeyucklac ke kuhnausyucklac luhn mwet koluk suc Kom kuhnahoslah tari.

12 O Leum, yac Kom kuh in furohklah kasrkuhsrak Lom, ahok, kasrkuhsrak upac Lom, ac oruh tuh sracl in mongo se inge in sahflah fin acn se inge.

13 O Leum, yac Kom porongweyuc, ac oruh tuh ac kuh in oreklac in fal nuh ke kahs luhk, ac suhpwacma af nuh fin acn uh, tuh acn uh in foklac ke fahko la, ac grain uh ke puhlan pacl luhn grain.

14 O Leum, Kom tuh porongo nuh ke kahs luhk ke nga tuh fahk, Lwelah tuh in oasr sie sracl in mongo, tuh mas ke katlas uh in kuh in tui; ac nga etuh lah Kom ac fah, finne ke pacl se inge, porongo nuh ke kahs luhk, tuh Kom fahk lah: Fin mwet inge auliyak Nga fah molweloslac.

15 Ahok, O Leum, ac Kom liye lah elos auliyak, ke srihpen sracl in mongo ac mas ac kuhnanuc ma tuhkuh nuh faclos.

16 Ac inge, O Leum, yac Kom kuh in furohklah kasrkuhsrak Lom, ac sifilpac srihke elos fin kuhlwacnsapi Kom? Ac fin ohinge, O Leum, Kom kuh in ahkinsewowoyelos in fal nuh ke kahs Lom ma Kom tuh fahk ah.

17 Ac tukun ma inge ke yac ahkitngucul ac ohnkohsr Leum El tuh furohklah kasrkuhsrak Lal liki mwet uh, ac oruh tuh af in kahklah fin facluh, yohkna oruh foklac fahko ke pacl in fok la. Ac tukun ma inge foklac grain uh ke puhlan pacl luhn grain.

18 Ac liye, mwet ah tuh engan ac kaksakihn God, ac acn nuhkwewa we tuh sesseslah ke engan; ac elos tuh tiacna sifilpac suk in kuhnausuhllah Nephi, tuhsruhk elos tuh motkwacl oacna sie mwet pahluh wo, sie mwet luhn God, suc kuh ac wal yohk ituckyang nuh sel sin God.

19 Ac liye, Lehi, tamuhlwel wiyacl, el tiacna apkuhran nuh sel ke ma nuh ke ma suwohswohs uh.

20 Ac ohinge tukun ma inge mwet lal Nephi elos muhtwacwacack in sifilpac kapkapwack fin acn uh, ac muhtwacwacack in muhsaheack acn ma kuhnausyucklac lalos, ac muhtwacwacack in puhseni ac osrwaclihk, finne ne ke na elos tuh afuhnlah nohfohn acn uh, kwewana nuh acir, ac nuh epang, liki meoa ma oan rohtoh nuh ke meoa ma oan nuh kuhtuhlacp.

21 Ac tukun ma inge yac ahkitngucul ac ohnkohsr tuh sahflah ke mihs. Ac yac ahkitngucul ac itkohsr muhtwacwacack ke mihs; ac alu uh tuh maelihk fin acn nuhkwewa; ac inkaiyacn mwet ah, kwewana mwet Nephi ac mwet Laman, elos tuh wi alu uh; ac oasr mislac na yohk yohrohlos fin acn uh; ac ohinge sahflah yac ahkitngucul ac itkohsr.

22 Ac oacyacpac oasr mislac yohrohlos ke yac ahkitngucul ac alkosr, sahyacn na kuhtuhsrihk fohs ke ip yohk luhn mwe luti ma tuh akwucki sin mwet pahluh.

23 Ac ke yac ahkitngucul ac yuc muhtwacwacack in oasr akuhkuhin yohk. Tuhsruhk tukun ma inge Nephi ac Lehi, ac puhs sin mwet wiyaclos suc etuh ke ip yohk pwacye luhn mwe luti, elos eis fwackyuck pucspucs ke lwen nuhkwewa, ke ma inge elos tuh luti nuh sin mwet uh, yohkna oruh elos tuh tulokihnyac akuhkuhin lalos ke yac sac pac na.

24 Ac tukun ma inge ke yac ahkalngucul ke kolyuck luhn mwet nuhnuhnkuh fin mwet lal Nephi, oasr pihsac se mwet lain sin mwet lal Nephi, suc ke kuhtuh yac met ah elos tuh som nuh yurun mwet Laman, ac eis nuh faclos sifacna ine luhn mwet Laman, ac oacyacpac pihsac se suc sucu na pwacye tuhkuh kacn mwet Laman, elos tuh pihrihkyuckyak in kasrkuhsrak selos, kuh sin mwet lain ingacn, ke ma inge elos muhtwacwacack in mweun nuh sin mwet wiyaclos.

25 Ac elos tuh ahkmas ac fuhnmweti; ac na elos kahing fohlohk nuh finohl uh, ac nuh ke innimac ac acn lukmac, wihklac tuh elos in tiac sukokyak, elos kapwack puhseni, yohkna ke oasr mwet lain ma som in weluhlos.

26 Ac ohinge ke pacl, ahok, finne ke lusen yac puh, elos eklac u arulacna yohk se ke mwet pihsrapasr; ac elos tuh soklah nohfohn plwacn lukmac lal Gadianton; ac ohinge elos eklac mwet pihsrapasr lal Gadianton.

27 Inge liye, mwet pihsrapasr inge elos tuh oraclah kuhnausyuck luhlahp, ahok, finne kuhnahoslah yohk inmahsrlon mwet lal Nephi, ac oacyacpac inmahsrlon mwet luhn mwet Laman.

28 Ac tukun ma inge enenuh se na tuh in oasr tulokihnyacn orekma in kuhnausyucklac se inge; ke ma inge elos suhpwaclah sie un mwet mweun ke mukul fokoko nuh innimac ah ac nuh finohl ah in suk un mwet pihsrapasr inge, ac in kuhnausuhloslac.

29 Tuhsruhk liye, tukun ma inge tuh ke yac sac pac na elos tuh ukohkyak nuh tok finne nuh ke acn selos sifacna. Ac ohinge sahflah yac ahkalngucul ke kolyuck luhn mwet nuhnuhnkuh fin mwet lal Nephi.

30 Ac tukun ma inge ke muhtwacwacackiyacn yac ahkalngucul ac sie elos tuh sifilpac som in lain un mwet pihsrapasr se inge, ac elos tuh uniyac mwet pucspucs; ac elos tuh oacyacpac sun kuhnausyucklac yohk.

31 Ac elos sifilpac enenuh in fohlohk liki innimac ah ac liki finohl ah nuh ke acn selos sifacna, ke srihpen arulacna puhslac pihsac se luhn mwet pihsrapasr ingacn suc puhslac muhta ke finohl ac innimac ah.

32 Ac tukun ma inge sahflah yac se inge. Ac mwet pihsrapasr ah elos tuh srwackna kap ac fokokoi, yohkna oruh elos tuh lainyac un mwet mweun nuhkwewa luhn mwet Nephi, ac oacyacpac luhn mwet Laman; ac elos tuh oruh sahngweng yohk in tuhkuh nuh yurun mwet fin acn ah nuhkwewa.

33 Ahok, tuh elos fahsri acn pucspucs fin acn we, ac tuh oruh kuhnausyucklac yohk nuh selos; ahok, elos tuh uniyac mwet pucspucs, ac tuh uslah som mwet sahyac in srohoh nuh innimac ah, ahok, ac yohkna muhtwacn lalos ac tuhlihk nahtuhlos.

34 Inge ma koluk yohk se inge, ma tuhkuh nuh fin mwet uh ke srihpen koluk lalos, tuh sifilpac moklwelosyak in esam Leum God lalos.

35 Ac ohinge sahflah yac ahkalngucul ac sie ke kolyuck luhn mwet nuhnuhnkuh.

36 Ac ke yac ahkalngucul ac luo elos sifilpac muhtwacwacack in muhlkuhnlah Leum God lalos. Ac ke yac ahkalngucul ac tolu elos muhtwacwacack in upaclah ke ma koluk. Ac ke yac ahkalngucul ac ahkosr elos tiacna ekuhllah ohiyaclos.

37 Ac tukun ma inge ke yac ahkalngucul ac limekohsr elos tuh fokokoi ac upaclah nuhnkwaclos, ac ke koluk lalos; ac ohinge elos tuh sifilpac ahkolah in kuhnausyucklac.

38 Ac ohinge sahflah yac ahkalngucul ac limekohsr.