1 Ac tukun ma inge ke yac ahkonngoul ac luo ke kolyuck luhn mwet nuhnuhnkuh sahflah, ma inge nuhkwewa sikyak ac mwet Laman elos eklac, puhs selos, sie un mwet suwohswohs, yohkna oruh suwohswohs lalos ahluhkwelah suwohswohs luhn mwet Nephi, ke srihpen fokokoiyaclos ac muhtweng lalos ke luhlahlfongi.

2 Tuh liye, puhs sin mwet Nephi suc eklac upaclah ac sruhnga auliyak ac arulacna koluk, yohkna oruh elos tuh sruhnga kahs luhn God ac luti ac pahluh nuhkwewa ma tuh tuhkuh nuh inmahsrlolos.

3 Ne ohinge, mwet luhn alu uh engan yohk ke srihpen eklac pacptaislac luhn mwet Laman, ahok, ke srihpen alu luhn God, ma tuh akwucki inmahsrlolos. Ac elos tuh aengani sie sin sie, ac tuh engan wi sie sin sie, ac tuh engan yohk.

4 Ac tukun ma inge puhkantwen sin mwet Laman elos tuh tuhkuh nuh fin acn lal Zarahemla, ac tuh sulkackihn nuh sin mwet luhn mwet Nephi ohiyacn eklac pacptaislac lalos, ac tuh kwacfelos in luhlahlfongi ac auliyak.

5 Ahok, ac puhs mwet luti ke kuh ac wal yohk, in isyac mwet pucspucs selos in arulacna insepuhsisacllac, in mwet insepuhsisacl suc fahsr tukun God ac Lahm.

6 Ac tukun ma inge mwet Laman pucspucs elos tuh som nuh ke acn ma oan nuh lacyacn acir; ac oacyacpac Nephi ac Lehi elos som nuh ke acn nuh lacyacn acir, in luti nuh sin mwet uh. Ac ohinge sahflah yac ahkonngoul ac tolu.

7 Ac liye, oasr sie mislac fin acn uh, yohkna oruh mwet Nephi ah tuh som nuh ke oacna sie acn elos kena som nuh we, lah nuh inmahsrlon mwet Nephi kuh mwet Laman.

8 Ac tukun ma inge mwet Laman elos tuh oacyacpac som nuh ke oacna sie acn elos kena som nuh we, lah nuh inmahsrlon mwet Laman kuh inmahsrlon mwet Nephi; ac ohinge elos tuh sukohsohk in sramsram kuh mukwikwi nuh sin sie sin sie, in moli ac in kuhka, ac in eis kapwack, in fal nuh ke kena lalos.

9 Ac tukun ma inge elos arulacna kahsruhpi, kwewana mwet Laman ac mwet Nephi; ac arulacna puhkantwen kol, ac selfuh, ac kain in osra sacohk nuhkwewa, kwewana fin acn nuh lacyacn epang ac nuh fin acn nuh lacyacn acir.

10 Inge acn ma oan lacyacn nuh epang uh pahngpahng Lehi, ac acn ma oan lacyacn nuh acir uh pahngpahng Mulek, ma pahngpahng tukun wen nahtuhl Zedekiah; tuh Leum El usacllah Mulek nuh fin acn nuh lacyacn acir, ac Lehi nuh fin acn nuh lacyacn epang.

11 Ac liye, oasr kain nuhkwewa ke kol fin kwewana acn inge, ac ke selfuh, ac ke kain in sahk ohr sacohk nuhkwewa; ac oacyacpac oasr mwet orekma suhmaht, suc tuh orekmakihn kain in sahk ohr nuhkwewa ac ahkwoyelah ma inge; ac ohinge elos tuh kahsruhpi.

12 Elos tuh yok grain in puhkantwen, kwewana ke lacyacn acir ac ke lacyacn epang; ac elos tuh arulacna kapkapwack, kwewana ke lacyacn acir ac ke lacyacn epang. Ac elos tuh puhseni ac fokokoi na pwacye fin acn uh. Ac elos tuh tuhf sip ac kosro pucspucs, ahok, ma fuhsr fact pucspucs.

13 Liye muhtwacn lalos tuh orekma upac ac orek tuhret, ac oraclah kain in nuknuk nuhkwewa, ke nuknuk linen srihk eoa ac kain in nuknuk nuhkwewa, in afihnyac kohflohfohl lalos. Ac ohinge yac ahkonngoul ac ahkosr sahflah ke mislac.

14 Ac ke yac ahkonngoul ac limekohsr tuh oacyacpac oasr engan yohk ac mislac lalos, ahok, luti yohk ac pahluh pucspucs ke ma ac fah tuhkuh. Ac ohinge sahflah yac ahkonngoul ac limekohsr.

15 Ac tukun ma inge ke yac ahkonngoul ac ohnkohsr ke kolyuck luhn mwet nuhnuhnkuh, liye, Cezoram el acnwucki sin sie mwet tiac etweyuck ke el muhta ke siyah in nuhnuhnkuh. Ac tukun ma inge ke yac sacpacna, wen nahtuhl, suc tuh srihsrngiyucki sin mwet uh in aholuhl, el oacyacpac acnwucki. Ac ohinge sahflah yac ahkonngoul ac ohnkohsr.

16 Ac ke muhtwacwacackiyacn yac ahkonngoul ac itkohsr mwet uh muhtwacwacack in sifilpac arulacna koluklac.

17 Tuh liye, Leum El ahkinsewowoyaclos ke lusen pacl loeloes ke ma kahsruhp luhn facluh oruh tuh elos tiacna pihrihkyuckyak in kasrkuhsrak, in mweun, kuh in ahkmas; ke ma inge elos muhtwacwacack in sang insiaclos nuh ke kahsruhp lalos; ahok, elos muhtwacwacack in suk in kahsruhpi tuh elos in kuh in lucng liki siepac; ke ma inge elos muhtwacwacack in ahkmas ke lukmac, ac in pihsrapasr ac in fuhnmweti, tuh elos in kuh in kahsruhpi.

18 Ac inge liye, mwet ahkmas ac mwet pihsrapasr ingacn elos sie un mwet suc oreklac sel Kishkumen ac Gadianton. Ac na tukun ma inge oasr mwet pucspucs, finne inmahsrlon mwet Nephi, ke u lal Gadianton. Tuhsruhk liye, elos puhkantwen liki inmahsrlon u ma yohk koluk la sin mwet Laman. Ac elos pahngpahng mwet pihsrapasr ac mwet ahkmas lal Gadianton.

19 Ac elos pa suc tuh unilyac mwet nuhnuhnkuh fuhlwact Cezoram, ac wen nahtuhl, ke el muhta ke siyah in nuhnuhnkuh; ac liye, elos tiacna sukokyak.

20 Ac tukun ma inge ke mwet Laman elos sokwack lah oasr mwet pihsrapasr inmahsrlolos elos arulacna suhpwacr; ac elos tuh sang kuhiyaclos kwewa in kuhnausuhloslac liki facluh.

21 Tuhsruhk liye, Setuhn el tuh puhrakwack insiacn mwet pucspucs luhn mwet Nephi, yohkna oruh elos tuh toeni wi un mwet pihsrapasr ah, ac tuh ilyak nuh ke wuhlweacng lalos ac fuhlahk lalos, tuh elos in karuhnguhnwacng ac liyacacng sie sin sie ke kuhtwena ohiyac upac ma elos ac sun, tuh elos in tiac kweokkihn ahkmas lalos, ac kuhnaostwen lalos, ac pihsrapasr lalos.

22 Ac tukun ma inge tuh oasr sain lalos, ahok, sain lukmac lalos, ac kahs lukmac lalos; ac elos oruh ma inge tuh elos in kuh in etuh lah suc kac sin mwet wiyaclos tuh ilyak nuh ke wuhlweacng uh, tuh kuhtwena ma koluk ma mwet wiyacl oruh el ac tiac kihnetuh sin mwet wiyacl, kuh selos suc tuh wi u lal, suc tuh eis wuhlweacng se inge.

23 Ac ohinge elos in kuh in ahkmas, ac kuhnaus, ac pihsrapasr, ac orek kosro ac oruh kain in ma koluk nuhkwewa, in lain masap luhn acn uh ac oacyacpac masap luhn God lalos.

24 Ac kuhtwena selos suc wi u lalos enenuh in ahkkahlwemye nuh sin facluh ke ohiyac koluk lalos ac ma sruhngwacyuck lalos, enenuh in srihkeyuck, in tiac fal nuh ke masap luhn acn uh, tuhsruhk in fal nuh ke masap luhn ma koluk lalos, ma tuh ituckyang sel Gadianton ac Kishkumen.

25 Inge liye, pa inge fuhlahk ac wuhlweacng lukmac ma Alma el sapkihn wen nahtuhl tuh enenuh in tiac pwengwelihk nuh fin facluh, fin tiac ma inge, ac sie inkacnek in isyac mwet uh nuh ke kuhnausyucklac.

26 Inge liye, fuhlahk ac wuhlweacng lukmac lalos tiacna tuhkuh nuh yohrohl Gadianton liki ma sihmlac ma tuh ituckyang nuh sel Helaman; tuhsruhk liye, ma inge tuh likiyucki nuh insiacl Gadianton sin mwet se na ma tuh srihfe ninac ac pahpah tuhmwacsr emet in ipeis ke fukunsahk oal—

27 Ahok, mwet se na ma tuh pwacpa nuh sel Cain, lah el fin uniyac tamuhlwel wiyacl, Abel, ma inge ac tiac etweyuck sin facluh. Ac el tuh pwacpa nuh sel Cain ac mwet ma ukwacl ke pacl sac fahlac.

28 Ac oacyacpac pa ingacn mwet se pacna ma likiyac ke insiacn mwet uh in muhsaheack sie tower fuhlwact tuh elos in kuh in som nuh inkuhsrao. Ac pa ingacn mwet se pacna ma kohllah mwet suc tuh tuhkuh liki tower sac nuh ke acn se inge; suc osrwaclihk orekma luhn lohsr ac ma sruhngwacyuck nuh fin acn nuhkwewa, ne ke na el ulyac mwet uh in kuhnausyucklac, ac nuh ke sie hell ma wacngihn sahflahiyac.

29 Ahok, pa ingacn mwet se pacna ma likiyac ke insiacl Gadianton in ahkfahsrye orekma luhn lohsr, ac luhn ahkmas lukmac; ac el use ma inge e ke na muhtwacwacackiyacn mwet uh finne nuh ke pacl se inge.

30 Ac liye, el pa mwet suhmuhslah luhn ma koluk nuhkwewa. Ac liye, el ahkfahsrye orekma luhn lohsr ac ahkmas lukmac lal, ac el tahfwelah nuh ten pwacpa lalos, ac fuhlahk lalos, ac wuhlweacng lalos, ac plwacn lalos ke orekma koluk, liki fihlin mwet nuh ke fihlin mwet in fal oacna ke el kuh in sruokyac insiacn tuhlihk nuhtin mwet.

31 Ac inge liye, el tuh sruokyac kuh insiacn mwet Nephi; ahok, yohkna oruh elos tuh eklac arulacna koluk; ahok, inkaiyaclos forlah liki ohiyac luhn suwohswohs, ac elos tuh longyac masap luhn God ye niyaclos, ac tuh foracng nuh ke ohiyac lalos sifacna, ac tuh muhsaheack nuh selos sifacna ma sruhlwaclah ke kol lalos ac selfuh lalos.

32 Ac tukun ma inge ma koluk inge nuhkwewa tuh tuhkuh nuh faclos ke lusen yac tiac puhs, yohkna oruh inkaiyacn ma inge tuh tuhkuh nuh faclos ke yac ahkonngoul ac itkohsr ke kolyuck luhn mwet nuhnuhnkuh fin mwet lal Nephi.

33 Ac elos tuh oacyacpac kapwack ke ma koluk lalos ke yac ahkonngoul ac alkosr, nuh ke ahsor yohk ac yoksrah luhn mwet suwohswohs.

34 Ac ohinge kuht liye lah mwet Nephi elos tuh muhtwacwacack in kais kuhtuh na muhnahslah ke suhlahlahlfongi, ac kapwack ke ma koluk ac ma sruhngwacyuck, a mwet Laman elos muhtwacwacack in kapkapwack ke etwacack luhn God lalos; ahok, elos tuh muhtwacwacack in liyacacng sap ac masap Lal, ac in fahsr ke inkacnek pwacye ac suwohswohs ye Muhtahl.

35 Ac ohinge kuht liye lah Nguhn luhn Leum muhtwacwacack in som liki mwet Nephi, ke srihpen ma koluk ac kwekwe luhn insiaclos.

36 Ac ohinge kuht liye lah Leum El muhtwacwacack in okwaclah Nguhn Lal nuh fin mwet Laman, ke srihpen fihsrwacsr ac luhngse lalos in luhlahlfongi ke kahs Lal.

37 Ac tukun ma inge ke mwet Laman elos tuh suk un mwet in pihsrapasr lal Gadianton; ac elos tuh luti kahs luhn God inmahsrlon mwet ma koluk kuhtuh selos, yohkna oruh un mwet pihsrapasr se inge tuh kuhnausyucklac liki inmahsrlon mwet Laman.

38 Ac tukun ma inge ke lacpo se sahyac an, mwet Nephi elos tuh ahkkweyaclos ac kahsrelos, muhtwacwacack yurun mwet koluk kuhtuh selos, ne ke na elos maelihk nuh ke acn nuhkwewa luhn mwet Nephi, ac tuh srihfe yohk mwet suwohswohs ne ke na elos kuhi in luhlahlfongi ke orekma lalos ac ipeis ke ma elos pihsrwaclah, ac in weluhlosyang ke ahkmas ac orekma lukmac lalos.

39 Ac ohinge elos tuh eislah usyacn kafucrmacn, yohkna oruh elos tuh longyac ye niyaclos ac srihngihl ac ahkkweok ac forlah liki mwet suhkahsruhp ac mwet fakpacp, ac mwet puhsisacl suc fahsr tukun God.

40 Ac ohinge kuht liye lah elos tuh oasr ke sie ohiyac na koluk, ac koluklac ahkolah nuh ke sie kuhnanuclac ma wacngihn sahflahiyac.

41 Ac tukun ma inge tuh sahflah yac ahkonngoul ac alkosr ke kolyuck luhn mwet nuhnuhnkuh fin mwet lal Nephi.