1 Ac inge, tukun ma inge oasr mwet pucspucs suc lohng kahs lal Samuel, suc mwet Laman, ma el sramsramkihn fin pot ke siti uh. Ac elos suc luhlahlfongi ke kahs Lal elos som ac sokol Nephi; ac ke elos tuhkuh ac sokolwack elos fahkwack nuh sel ke ma koluk lalos ac tiac lahfwekihn, kena tuh elos in kuh in pacptaislac nuh sin Leum.

2 Tuhsruhk tuh elos suc tiacna luhlahlfongi ke kahs lal Samuel elos kasrkuhsrak sel; ac elos tuhngaluhl ke yot nuh ke pot uh, ac oacyacpac mwet pucspucs pihsrki suhkan pihsr nuh yohrohl ke el tulac fin pot uh; tuhsruhk Nguhn luhn Leum weluhl, yohkna oruh elos tiacna kuh in tuhngalilyac ke yot lalos kuh ke suhkan pihsr nahtuhlos.

3 Inge ke elos liye tuh elos tiacna kuh in tuhngalilyac, oasr kuhtuh pac mwet suc tuh luhlahlfongi ke kahs lal, yohkna oruh elos som nuh yohrohl Nephi in pacptaislac.

4 Tuh liye, Nephi el pacptaisi, ac palye, ac luti, fahk in auliyak nuh sin mwet uh, ahkkahlwemye akucl ac ma usrnguck, oruh ma usrnguck inmahsrlon mwet uh, tuh elos in kuh in etuh lah Kraist El ac tuhkuh ke pacl fototo—

5 Fahk nuh selos ke ma suc ac tuhkuh ke pacl na fototo, tuh elos in kuh in etuh ac esam ke pacl in tuhkuh lalos lah ahkkahlwemyeyuck nuh selos ma inge met liki, nuh ke srihpac se tuh elos in kuh in luhlahlfongi; ke ma inge elos suc luhlahlfongi ke kahs lal Samuel elos som nuh yohrohl in pacptaislac, tuh elos tuhkuh auliyak ac fahkwack ke ma koluk lalos.

6 Tuhsruhk inkaiyaclos tiacna luhlahlfongi ke kahs lal Samuel; ke ma inge ke elos liye tuh elos tiacna kuh in tuhngalilyac ke yot lalos ac ke suhkan pihsr nahtuhlos, elos wowoyak nuh sin sifac luhn mwet mweun lalos, fahk: Eis mwet se inge ac kaprilyac, tuh liye oasr sie devil kacl; ac ke srihpen kuh luhn devil suc oasr kacl kuht tiacna kuh in tuhngalilyac ke yot lasr ac suhkan pihsr nahtuhsr; ke ma inge eisacl ac kaprilyac, ac usacllah.

7 Ac ke elos som in fihliyac paholos facl, liye, el ahtulac nuh ten liki pot uh, ac tuh kahinglac liki acn selos, ahok, finne nuh ke acn sel sifacna, ac muhtwacwacack in luti ac in palye inmahsrlon mwet lal sifacna.

8 Ac liye, el tiacna sifilpac lohngyuck inmahsrlon mwet Nephi; ac pa inge ohiyac luhn mwet uh.

9 Ac ohinge sahflah yac ahkalngucul ac ohnkohsr ke kolyuck luhn mwet nuhnuhnkuh fin mwet lal Nephi.

10 Ac ohinge oacyacpac sahflah yac ahkalngucul ac itkohsr ke kolyuck luhn mwet nuhnuhnkuh, inkaiyacn mwet uh muhta na ke inse fuhlwact ac koluk lalos, ac mwet puh fahsr suwohswohs ye muhtuhn God.

11 Ac pa inge pac ohiyac, ke yac ahkalngucul ac alkosr ke kolyuck luhn mwet nuhnuhnkuh.

12 Ac tuh srihklac ma eklac ke ohiyac luhn mwet uh, sahyacn na mwet uh muhtwacwacack in upaclah liki met ah ke ma koluk, ac oruh yohk liki na met ah ma suc lain masap luhn God, ke yac ahkalngucul ac yuc ke kolyuck luhn mwet nuhnuhnkuh.

13 Tuhsruhk tukun ma inge ke yac ahkyucnguhul ke kolyuck luhn mwet nuhnuhnkuh, oasr akucl na wo ituckyang nuh sin mwet uh, ac ma usrnguck; ac kahs luhn mwet pahluh muhtwacwacack in ahkpwacyeiyuck.

14 Ac lipufacn sikme nuh sin mwet uh, mwet lahlmwetmwet, ac tuh fahkwack nuh selos pweng wo ke engan yohk; ohinge ke yac se inge ma suhmuhslah uh muhtwacwacack in ahkpwacyeiyuck.

15 Ne ohinge, mwet uh muhtwacwacack in ahkkwekweye insiaclos, mwet nuhkwewa sahyacn na elos suc luhlahlfongi emet selos, kwewana mwet Nephi ac oacyacpac mwet Laman, ac elos muhtwacwacack in muhngnguh kuhiyaclos sifacna ac lahlmwetmwet lalos sifacna, fahk:

16 Kuhtuh ma uh elos palye pwacye, inmahsrlon ma pucspucs; tuhsruhk liye, kuht etuh lah orekma yohk ac wolacna inge nuhkwewa tiacna kuh in tuhkuh, ke ma sruhmuhnyuck uh.

17 Ac elos muhtwacwacack in nuhnkuh ac in sruhmuhn inmahsrlolos sifacna, fahk:

18 Tuh wacngihn srihpac tuh sie mwet suc oacna Kraist ac fah tuhkuh; fin ohinge, ac El pa Wen nuhtin God, Pahpah luhn kuhsrao ac facluh, oacna ke sruhmuhnyuck uh, efuh kuh El tiacna ahkkahlwemyacl sifacna nuh sesr ac oacyacpac nuh selos suc ac fah oasr Jerusalem?

19 Ahok, efuh kuh El ac tiacna ahkkahlwemyacl sifacna fin acn se inge ac oacyacpac fin acn Jerusalem?

20 Tuhsruhk liye, kuht etuh lah facsin koluk se pa inge, ma tuhtahflah nuh ten nuh sesr sin pahpah tuhmwacsr, in oruh kuht in luhlahlfongi ke kuhtuh ma yohk ac wolacna ma ac fah tuhkuh, tuhsruhk tiac nuh inmahsrlosr, tuhsruhk ke sie acn ma oan loesuhlah, sie acn ma kuht tiacna etuh; ke ma inge elos kuh in oruh kuht in muhta na ke lohsr, tuh kuht tiac kuh in liye ke muhtahsr sifacna lah ma inge pwacye.

21 Ac elos fah, ke ohiyac kuhtasrihk ac lukmac luhn el suc koluk, oraclah kuhtuh ma lukmac yohk ma kuht tiacna kuh in kahlwem kac, ma fah sruokkuhti na in mwet kuhlwacnsap nuh ke kahs lalos, ac oacyacpac in mwet kuhlwacnsap nuh selos, tuh kuht muhngngwelos in luti kuht kahs uh; ac ohinge elos ac sruokkuhti na ke lohsr uh fin kuht eiskuhtyang sifacna nuh selos, ke lusen moul lasr nohfohn.

22 Ac ma pucspucs pac mwet uh tuh motkweack ke insiaclos, ma lahlfon ac wacngihn srihpac; ac elos arulacna pihrihkyuckyak, tuh Setuhn el puhrakwelosyak in oruh ma koluk pacl nuhkwewa; ahok, el tuh som osrwaclihk lwesrihk ac fohs fin acn ah nohfohn, tuh elan kuh in ahkkwekweye insiacn mwet uh in lain ma wo ac in lain ma ac fah tuhkuh.

23 Ac finne ke akucl ac ma usrnguck ma tuh orek inmahsrlon mwet luhn Leum, ac ma usrnguck pucspucs ma elos tuh oruh, Setuhn el tuh sruokyac yohk insiacn mwet fin acn ah nohfohn.

24 Ac ohinge sahflah yac ahkyucnguhul ke kolyuck luhn mwet nuhnuhnkuh fin mwet lal Nephi.

25 Ac ohinge sahflah puk lal Helaman, in fal nuh ke ma sihmlac lal Helaman ac wen nahtuhl.