1 Ac ohinge kuht kuh in liye lah fuhkah suhtuhelac, ac oacyacpac tihkuclkucl luhn insiacn tuhlihk nuhtin mwet; ahok, kuht kuh in liye lah Leum ke wolacna yohk Lal ma wacngihn sahflahiyac El ahkinsewowoye ac ahkkweye elos suc fihliyac luhlahlfongi lalos in El.

2 Ahok, ac kuht kuh in liye ke pacl se na ma El ahkkahsruhpye mwet Lal, ahok, ke kapkapwack luhn imac lalos, un sip nahtuhlos ac un kosro nahtuhlos, ac ke kol, ac ke selfuh, ac ke ma sacohk nuhkwewa ke kain nuhkwewa ac kain in sroal nuhkwewa; molwelah moul lalos, ac molweloslac liki poun mwet lokoalok lalos; ahkfihsrwacsryelah insiacn mwet lokoalok lalos tuh elos in tiac sulkackihn in mweun laenuhlos; ahok, ac in ahkkahlwemye, oruh ma nuhkwewa nuh ke mwe ahkwoye ac engan luhn mwet lal; ahok, na pa pacl se ma elos ahkkwekweye insiaclos, ac muhlkuhnlah Leum God lalos, ac longyac ye niyaclos El suc Muhtahl—ahok, ac ma se inge ke srihpen fihsrwacsriyac, ac kahsruhp na yohk lalos.

3 Ac ohinge kuht liye lah fin Leum El tiac kaiyac mwet Lal ke ma upac pucspucs, ahok, fin El tiac sang nuh selos misac ac sahngweng, ac sracl in mongo ac ke kain in mas nuhkwewa, elos fah tiac esamuhl.

4 O fuhkah lahlfoniyac, ac fuhkah wacngihn srihpaciyac, ac fuhkah kolukiyac, ac fuhkah pihsrpihsriyac in oruh ma koluk, ac fuhkah sihpihsrpihsriyac in oruh ma wo, luhn tuhlihk nuhtin mwet; ahok, fuhkah pihsrpihsriyac in porongo nuh ke kahs luhn el suc koluklacna, ac in fihliyac insiaclos nuh ke ma wacngihn srihpac luhn facluh!

5 Ahok, fuhkah pihsrpihsriyac in insefuhlwactyak; ahok, fuhkah pihsrpihsriyac in fihlacngwack, ac in oruh kain ma nuhkwewa ma koluk; ac fuhkah sihpihsrpihsriyaclos in esam Leum God lalos, ac in sang srwaclos nuh ke kahs in kahsruh Lal, ahok, fuhkah sihpihsrpihsriyac in fahsr ke inkacnek luhn lahlmwetmwet!

6 Liye, elos tiac kena tuh Leum God lalos, suc oracloslac, in kol ac leum faclos; finne ke wolacna ac pahkotwen yohk Lal nuh selos, elos tiac lohacng nuh ke kaiyuck Lal, ac elos fah tiacna lwelah tuh Elan kohlohlos.

7 O fuhkah wacngihn srihpaciyacn tuhlihk nuhtin mwet; ahok, finne elos srihk srihpac liki kutkut srihsrihk fin facluh.

8 Tuh liye, kutkut srihsrihk fin facluh uh mukwiwot ac mukwime, in maelihk, ke sap luhn God wolacna ac ma pahtpaht lasr.

9 Ahok, liye ke puhsrwacl inging uh ac finohl uh rarrar ac kusrusr.

10 Ac ke kuh luhn puhsrwacl inging uh ac finohl uh srasrwelihk, ac eklac fwel, ahok, finne in oacna sie infahlfahl.

11 Ahok, ke kuh luhn puhsrwacl facluh nohfohn kusrusr;

12 Ahok, ke kuh luhn puhsrwacl, pwelucng uh kusrusryak, finne nuh ke infulwac ah.

13 Ahok, ac El fin fahk nuh sin facluh—Mukwilac—ac mukwilac.

14 Ahok, El fin fahk nuh sin facluh—Kom in fohlohk, tuh in loesaclihk lusen lwen uh ke lusen ao pucspucs—ac oreklac;

15 Ac ohinge, in fal nuh ke kahs Lal facluh ac fohlohklac, ac oacna nuh sin mwet uh lah faht ah tui tilac mukwi; ahok, ac liye, ac ohinge; tuh pwacyena lah facluh pa mukwi uh ac tiac faht ah.

16 Ac liye, oacyacpac, El fin fahk nuh sin kof ke acn loal—Kom in paholah—ac oreklac.

17 Liye, El fin fahk nuh sin finohl soko inge—Kom in mayak, ac tuhkuh ac puhtati nuh fin siti se ingoh, tuh in pihkihnyac—liye ac oreklac.

18 Ac liye, fin sie mwet okanlah sie ma kahsruhp infohk uh, ac Leum El fah fahk—Lwelah ma se inge in selngawiiyucki, ke srihpen ma koluk lal suc okanlah ma inge—liye, ma se inge ac fah selngawiiyucki.

19 Ac fin Leum El ac fahk—Kom selngawiiyucki, tuh in wacngihn mwet fah sukkomyak ke pacl se inge fahlac ac ne tok ma pahtpaht—liye, wacngihn mwet ac eis inge fahlac ac ne tok ma pahtpaht.

20 Ac liye, Leum El fin fahk nuh sin sie mwet—Ke srihpen ma koluk lom, kom fah selngawiiyuck ne tok ma pahtpaht—ac fah oreklac.

21 Ac fin Leum El ac fahk—Ke srihpen ma koluk lom kom fah lihsyucklac liki ye muhtuhk—El fah oruh tuh in ohinge.

22 Ac we nuh sel suc El fah fahk ma se inge, tuh ac fah ohinge nuh sel suc ac fah oruh ma koluk, ac el tiac kuh in moliyucklac; ke ma inge, ke srihpac se inge, tuh mwet uh in kuh in moliyucklac, fin auliyak uh fahkyuck.

23 Ke ma inge, insewowo elos suc fah auliyak ac porongo puhsren Leum God lalos; tuh elos inge pa elos suc fah moliyucklac.

24 Ac lwelah tuh God Elan lwelah, ke fohnlah wolacna Lal, tuh mwet uh in kuh in utuckuh in auliyak ac in oruh orekma wo, tuh elos in kuh in sifilpac fohlohkyak nuh ke luhng kuhlwacng nuh ke luhng kuhlwacng, in fal nuh ke orekma lalos.

25 Ac nga kena tuh mwet nuhkwewa in kuh in moliyucklac. Tuhsruhk kuht riti lah ke lwen luhlahp ac sahflah sac ac oasr mwet suc ac fah lihsyucklac, ahok, suc fah lihsyucklac liki ye muhtuhn Leum;

26 Ahok, suc fah fihliyucki ke sie ohiyac ma wacngihn sahflahiyacn kweok, in ahkpwacyeiye kahs ma fahk: Elos suc oruh ma wo ac fah eis moul ma pahtpaht; ac elos suc oruh ma koluk fah eis misac ma pahtpaht. Ac ohinge na. Amen.