1 Ac na tukun ma inge Samuel, suc mwet Laman, el tuh palye ke ma yohk pucspucs ma tiac kuh in sihmihsyucklac.

2 Ac liye, el fahk nuh selos: Liye, nga usot nuh suwos sie akucl; tuh yac limekohsr ac tuhkuh, ac liye, na Wen nuhtin God El ac tuhkuh in molweloslac nuhkwewa suc fah luhlahlfongi ke Inel.

3 Ac liye, ma se inge nga fah usot nuh suwos in sie mwe akucl ke pacl in tuhkuh Lal; tuh liye, ac oasr kahlwem yohk inkuhsrao, yohkna tuh ke fong se met liki El ac tuhkuh ac tiac lohsrlah, yohkna oruh ac kahlwem oacna in muh lwen na.

4 Ke ma inge, ac fah oasr sie lwen ac sie fong ac sie lwen, ac oacna in muh lwen sefanna ac tiacna fongweni; ac ma se inge ac sie mwe akucl nuh suwos; tuh kowos fah etuh ke takwack luhn faht uh ac oacyacpac ke tihli la uh; ke ma inge elos fah etuh na pwacye lah ac oasr lwen luo ac fong se; ne ohinge fong uh ac tiacna lohsrwacni; ac fah fong se met liki El isuslac.

5 Ac liye, ac fah oasr sie itu sikyak, oacna sie ma kowos soenna liye; ac ma se inge ac fah oacyacpac sie akucl nuh suwos.

6 Ac liye tiac pa inge nohfohn, ac fah oasr pac akucl pucspucs ac ma usrnguck ke yen engyeng uh.

7 Ac ma inge fah sikyak tuh kowos nuhkwewa fah lut, ac fwefwelac, yohkna tuh kowos fah puhtatlac nuh infohk uh.

8 Ac ma inge fah sikyak tuh kuhtwena mwet suc fah luhlahlfongi ke Wen nuhtin God, mwet sacn pacna fah eis moul ma pahtpaht.

9 Ac liye, ohinge Leum El sapkihn nuh sihk, sin lipufacn Lal, tuh nga enenuh in tuhkuh ac fahk ma se inge nuh suwos; ahok, El sapkihn tuh nga enenuh in palye ma inge nuh suwos; ahok, El fahk nuh sihk: Fahk nuh sin mwet inge, auliyak ac ahkolah inkacnek luhn Leum.

10 Ac inge, ke srihpen nga sie mwet Laman, ac nga sruhmuhn nuh suwos kahs ma Leum El sapkihn nuh sihk, ac ke srihpen ma inge lain kowos upac, kowos kasrkuhsrak sihk ac suk in kuhnausyuclac, ac lihsyuclac liki inmahsrlowos.

11 Ac kowos fah lohng kahs luhk, tuh, tuh ke srihpac se inge nga tuhkuh nuh fin pot ke siti se inge, tuh kowos in kuh in lohng ac etuh ke nuhnuhnkuh luhn God ma sane kowos ke srihpen ma koluk lowos, ac oacyacpac tuh kowos in kuh in etuh ke ohiyac luhn auliyak;

12 Ac oacyacpac tuh kowos in kuh in etuh ke tuhkuh luhn Jisus Kraist, Wen nuhtin God, Pahpah inkuhsrao ac facluh, Mwet Oraclah luhn ma nuhkwewa e ke muhtwacwacackiyac ah; ac tuh kowos in kuh in etuh ke akucl ke tuhkuh Lal, in oruh tuh kowos in kuh in luhlahlfongi ke Inel.

13 Ac kowos fin luhlahlfongi ke Inel kowos fah auliyak ke ma koluk lowos nuhkwewa, tuh ohinge kowos in eis iyucklac ke ma inge ke orekma wo Lal.

14 Ac liye, sifilpac, siepac akucl nga usot nuh suwos, ahok, sie akucl ke misac Lal.

15 Tuh liye, pwacyena El enenuh in misac tuh molwelah uh in kuh in tuhkuh; ahok, yohk srihpac nuh Sel ac enenuh se na tuh Elan misac, in use sifilpac moulyak luhn mwet misac, tuh ohinge mwet uh in kuh in utucklac nuh ye muhtuhn Leum.

16 Ahok, liye, misac se inge use sifilpac moulyak, ac molwelah mwet nuhkwewa liki misac se emet ah—misac luhn nguhn; tuh mwet nuhkwewa, ke puhtatlac lal Adam el lihsyucklac liki ye muhtuhn Leum, ac motkoeyuck muh misac, kwewana ke ma luhn moul in mahno ac nuh ke ma luhn nguhn.

17 Tuhsruhk liye, sifilpac moulyak luhn Kraist molwelah mwet uh, ahok, finne mwet nuhkwewa, ac in usaclos fohlohk nuh ye muhtuhn Leum.

18 Ahok, ac ma inge use ohiyac luhn auliyak, tuh el suc auliyak mwet sacn pac na tiac pakpucki ac tolyuckyang nuh ke e uh; tuhsruhk el suc tiacna auliyak ac pakpucki ac tolyuckyang nuh ke e uh; ac sifilpac tuhkuh nuh faclos sie misac luhn nguhn, ahok, misac ahkluo, tuh elos sifilpac lihsyucklac liki ma luhn ma suwohswohs.

19 Ke ma inge kowos auliyak, kowos auliyak, kowos fin etuh ke ma inge ac tiacna oruh kowos fah lwelah kowos sifacna in tuhkuh nuh ye nuhnuhnkuh, ac kowos utucklac nuh ke misac ahkluo se inge.

20 Tuhsruhk liye, oacna ke nga fahk nuh suwos ke siepac akucl, sie akucl ke misac Lal, liye, ke lwen se ma El fah kweokkihn misac faht ah ac fah sralsrallah ac tiac usot kahlwem nuh suwos; ac oacyacpac mahlwem ac itu uh; ac fah wacngihn kahlwem fin acn se inge, finne ke pacl se ma El ac kweokkihn misac, ke lusen lwen tolu, ne ke na pacl se ma El fah sifilpac moulyak liki misac.

21 Ahok, e ke pacl se ma El ac fah fuhlweack nguhnal ac fah oasr puhlahl ac sahrom ke lusen ao pucspucs, ac facluh fah kusrusr ac rarrar; ac yot ma oan fin fohk ke facluh se inge, ma kwewana oasr fin fohk uh ac ye fohk uh, ma kowos etuh ke pacl se inge muh kwekwe, kuh inkaiyac uh fohnlah kwekwe, ac fah ipelihk;

22 Ahok, yot uh fah ipelihk nuh ke ip luo, ac fah tohkoh fahlac ac sukokyak ke inmahsrlon acn srasrwelihk, ac ke acn ma ipelihk infohk uh fin facluh nohfohn, ahok, kwewana fin fohk uh ac ye fohk uh.

23 Ac liye, ac fah oasr af eng upac, ac fah oasr finohl pucspucs ma rahklac, oacna sie infahlfahl, ac fah oasr acn pucspucs ma ingena pahngpahng infahlfahl ac fah eklac finohl, ma fuhlwactiyac arulacna yohk.

24 Ac inkacnek pucspucs fah muhsahllah, ac siti pucspucs ac fah eklac pihsaclah.

25 Ac kuclyuck pucspucs ac fah ikacklah, ac fah otyak mwet misac pucspucs; ac mwet luhlahlfongi pucspucs ac fah sikyak nuh sin mwet pucspucs.

26 Ac liye, ohinge lipufacn sac fahk ma inge nuh sihk; tuh el fahk nuh sihk lah ac fah oasr puhlahl ac sahrom ke lusen ao pucspucs.

27 Ac el fahk nuh sihk lah ke puhlahl ac sahrom, ac af eng upac, lah ma inge enenuh in ohinge, ac lah lohsr uh ac afuhnlah fin facluh nohfohn ke lusen lwen tolu.

28 Ac lipufacn sac fahk nuh sihk lah mwet pucspucs ac fah liye ma yohk liki na ma inge, nuh ke srihpac se tuh elos in kuh in luhlahlfongi lah akucl inge ac ma usrnguck inge enenuh in sikyak nuh fin acn nuhkwewa inge, nuh ke srihpac se tuh in wacngihn srihpac in suhlahlahlfongi inmahsrlon tuhlihk nuhtin mwet—

29 Ac srihpac luhn ma inge pa tuh el suc ac fah luhlahlfongi in kuh in moliyucklac, ac tuh el suc fah tiacna luhlahlfongi, sie nuhnuhnkuh suwohswohs ac tuhkuh nuh facl; ac oacyacpac elos fin nuhnuhnkweyuck elos sang nuh faclos sifacna nuhnuhkuh lalos sifacna.

30 Ac inge esam, esam, mwet wiyuck, lah el suc misac, misac ke srihpacl sifacna; ac el suc oruh ma koluk, oruh nuh sel sifacna; tuh liye, kowos sukohsohk; kowos lwelah in mukwikwi keiwos sifacna; tuh liye, God El usot nuh suwos sie etwacack ac El oruh tuh kowos in sukohsohk.

31 El tuh usot nuh suwos tuh kowos in kuh in etuh ma wo liki ma koluk, ac El usot nuh suwos tuh kowos in kuh in sulaclah moul kuh misac; ac kowos kuh in oruh ma wo ac fohlohkihnyuckyak nuh ke ma suc wo, kuh ma wo uh in fohlohkihnyuckyak nuh suwos; kuh kowos kuh in oruh ma koluk, ac ma koluk uh in fohlohkihnyuckyak nuh suwos.