1. Erio egaika engaki Samuel, omolamani, akobana ebinto ebinge ebinene ebio bitarikwe.

2. Na rigereria, Akamotebia ng’a: Rigereria nakoeire ekerage eke; na ase emiaka etano amange agacha, na rigereria, ngocha are Omwana o’Nyasae kobaboria bosi baria baregene ase erieta riaye.

3. Na rigereria, aya naro intagete kobaa koba omogwekano bw’ogocha kwaye; rigereria oborabu mbobe igoro na oborabu obwo botaracha omosunte tokobao na nigo erabe buna mogaso.

4. Aseigo, ndibeo rituko erimo, obotuko nomobaso orabe buna rituko erimo na oborabu mbokobao; na aya nigo arabe ase more buna ekiorokererio; erio imomanye ogotongia kwerioba na okorimeria kwaye; erio imbamanye ng’a amatuko nigo arabe abere na obotuko obomo na obotuko obwo mbokoba nomosunte; na nigo rirabe rituko nyuma ataraiborwa.

5. Na rigereria, erio eng’enang’enia neoroke ere enyia, eyio onde atanya korora; naboigo aya nabe ekiorokererio ase more.

6. Na manya ng’a aya tari onsi, mbibeo ebirage na amakumia igoro.

7. Erio neike engaki ekero morakumie na goichana na kogwa inse.

8. Na neike engaki eria onde bwensi arabe okwegena omwana o Nyasae ase ere nanyore obogima bwa kare na kare.

9. Rigereria Omonene nigo anchigete, ase omomaraika oye, ng’a inchiche erinde imbatebie amang’ana aya, nigo anchigete ng’a inyare kobana amang’ana aya ase more; agantebia ng’a rera ase abanto aba koangama, na koba ang’e ase chinchera chio Omonene.

10. Na bono ase engencho inde omolamani, na nabatebirie amang’ana onsi Omonene anchigete, na asengencho yobokong’u mamincha yaino, nigo mogechirie na nigo morigetie gonsiria, na gonseria korwa egati yaino.

11. Imoigwe amang’ana ane ase engencho ya aya nimbe igoro yenyasi y’omochi oyo erinde nario moraigwe nakomanya ekina kia Nyasae ekio kebaganyete ase engencho yebibe biaino, erinde nario moranyare koangama.

12. Naboigo momanye ogocha kwa Yeso Kristo, omwana o’Nyasae, Tata oigoro na ense, omotongi bwebinto bionsi korwa omochakano; na boigo komanya ebirage bioogocha kwaye, ase okogania ng’a monyare komwegena ase erieta riaye.

13. Na onye mokwegena ase erieta riaye imoangame ebibe biaino, na ase ayio imonyore okwaberwa kwebibe ase obuya bwaye.

14. Naende rigereria nabaeire ekerage kende ekerage giogokwa kwaye.

15. Ekeene ere nakwe erinde nario ogotoreka korache ase okoreta okobokigwa kw’abakure, erinde nario abanto bararetwe ase obosio bw’Omonene.

16. Amakweri aya nabe akoreta okobokigwa na gokonya abanto bonsi korwa ase ogokwa ogotang’ani – – na amakweri yekemoika ase abanto bonsi agacha asengencho yokogwa gwa Adamu akanachwa korwa ase obosio bw’Omonene, nigo kobarire buna ogokwa, aya onsi nigo akoreta ebinto biekemobere na ase ebinto biekemoika.

17. Rigereria okobokigwa kwa Kristo gogakonya abanto, na kobareta ase obosio bw’Omonene.

18. Na aya narete okoangama, ng’a oria onde bwensi oraangame oyio takorutwa ase omorero; korende oria otaangametie nabe okorutwa ase omorero na naende amakweri yekemoika neirane ase bare, amakweri akabere, na nigo baranachwe buna ebinto bibwate obochenu.

19. Inwe angama ekiagera momanyete ebinto ebi aseigo nigo morachandeke inwe abanyene na gocha ase ekina na koretwa ase amakweri akabere.

20. Buna nabatebia igoro yegekone kende kiogokwa kwaye, ase amatuko ayio nakwe, na erioba nigo rirabe omosunte na tirikorokia oborabu bwaye ase more; naboigo ase omotienyi na ching’enang’eni; erio borabu mbokoba aroro ase ense eye, nonya nekero agochaka gochandeka gokwa korende ase egeka kia amatuko atato, nabe okoboka naende korwa ase amakweri.

21. Asengaki eyio nabe okoreta omoika na chinkoba nchibe chikomesa ase engaki yechinse chitari inke, erio ense ebe egotengecha; na ebitare bire inse ase ense naigoro ase ense erio mbibe bikonyia na kobuneka.

22. Mbitandoke arakabere, na mbibe bikoba nebimao botambe, na konyorekana bire ebing’ese ase ense engima, onsi igoro na inse na ase ense.

23. Na omoondoko nobe omonene na ebitunwa ebinge mbigwe, na koba buna omweya, na chinsemo chinde chire omweya nchibe chikoba ebitunwa, bibwate obotambe obonene.

24. Erio chinchera chinene nchisareke na emechie emenene emenge nebe egosareka.

25. Chimbera chinyinge inchigoke, na inchisokie abakwete korwa asechire; na abachenu abange mbaoroke ase abanto abange.

26. Rigereria omomaraika akaba ogontebia; ng’a chinkoba nchibeo na okomesa ase engaki yechinsa chitari inke.

27. Erio agantebia ng’a buna chinkoba chigendererete na okomesa na emetengecho, na ekero ekio bigendererete omosunte nobe ase engaki ya amatuko atato.

28. Erio abanto mbarore amange amanene kobua aya, na komanya ng’a ebinto ebi goika bibe ase ense engima, na kende tigegokwanwa ase abategenwa egati ya abana bamwanyabanto.

29. Naboigo onde bwonsi oregene nabe ogokonyeka, na oria otegeneti ekina egechenu nkebe igoro yaye; na onye bakogambigwa nigo barabe bereteire ekina ase bare.

30. Inyora inwe abaminto ng’a onde bwensi orasire nigo arasire bweka omonyene; na oria ogokora ebibe, nigo agokora ase bweka omonyene, aseigo rora nigo abasibore; naboigo mwaborigwe mworokie inwe mweka, rigereria Nyasae obaeire obong’aini na obakorire abasibore.

31. Na obaeire ase more ng’a mobe mokomanya obuya korwa ase ebibe, na obaeire ase more ng’a monyare gochora obogima gose amakweri; na nigo morakore amaya na koretwa ase ayare amaya; gose gokora amabe, na nigo morabe mokoba ase ebibe.