1 At ngeni, kaluguran kung kapatad, makiramdam, sasabian ku kekayu a nung e kayu sumisi ding kekayung pamibalebale malakuan la kekayung malungkut.

2 Wa, maliban mu nung sumisi kayu, ding kekayung kababainan mika maragul lang sangkan para manangis la king aldo a magpasusu la; uling subukan yung tumakas at alang lugal a pisalikutan; wa, at kalulu la retang ating anak, uling maging mabayat la at e la mitakas; anya pin, mangadamusak la at malakuan la para mate.

3 Wa, kalulu la ring taung deni a ausan dang ding tau nang Nephi maliban nung sumisi la, potang akit dala ding anggang tanda at ding makapagmulala a mipakit karela; uling tutu, ila ding pinili nang tau ning Guinu, wa, ding tau nang Nephi a keang liguran, at kea la mu namang pengamanuan; wa, king aldo ning karelang karokan kea lang pengamanuan uling kaluguran nala.

4 Dapot makiramdam, kanakung kapatad, ding Lamanite kea lang kasaman uling ding karelang dapat menatili la king karokan, at iti uli ning karokan na ning kaugalian da ring karelang ninunu. Dapot lawan, ing kaligtasan dinatang ya karela king kapamilatan na ning pamanaral da ring Nephite; at kening kapagnasan a ini pepakaba na ning Guinu ing karelang aldo.

5 At buri kung dapat yung akit a ing maragul a dake karela atiu la king dalan na ning karelang katungkulan, at ila lalakad lang maingat king arapan ning Dios, at gagawan da ing pamintuan da la ring keang kautusan at ding keang batas at ding keang kayatulan agpang king batas nang Moises.

6 Wa, sasabian ku kekayu, ding maragul a dake karela gagawan da iti, at magsikap la king alang kapagalan a pamagsikap para adala da la ring mitagan dang kapatad king kabaluan na ning katutuan, uli na niti dakal lang miraragdag karela aldo-aldo.

7 At lawan, balu yu king sarili yu, uling asaksian yu iti, nung dakal la karela ding midala king kabaluan ning katutuan, at mabalu ing marok at makasumaming kaugalian da reng karelang ninunu, at mitake la king kapaniwalan karing banal a kasulatan, wa, ding ula da ring banal a propeta, a makasulat, a mitake karela king kasalpantayanan king Guinu, at king pamanisi, nung sanung kasalpantayanan at pamanisi a bibiye pamagbayu ning pusu karela-

8 Anya pin, nung makananu la karakal ding dinatang kaniti, balu yu ding kekayung sarili matibe la at matatag king kasalpantayanan, at king bage a nung nukarin megawa lang malaya.

9 At balu yu naman a kitkut da la ring armas king giyera, at tatakut lang damputan da la at pota maski makananu mu mikasala la; wa, akakit yung tatakut lang mikasala — uling lawan, paburen da la ring sarili dang mangadamusak at apate ding karelang kalaban, at edala itas ding ispada ra laban karela, at iti uli ning kasalpantayanan da kang Cristo.

10 At ngeni, king uli ning karelang katatagan aniang meniwala la karetang bage panualan da, uling uli ning karelang tibe a anyang misang mipamasalan karela, lawan, ing Guinu panuanan na la at pakaban na ing karelang aldo, sumangid na ning karelang karokan —

11 Wa, anggiyang miras la king kelan ning kapanualan ikaba nala ning Guinu ding karelang aldo, angga king datang ing panaun a sinabi da ring kekatamung ninunu, at makanian mu naman ning propetang Zenos, at dakal pang aliwang propeta, tungkul king pamagbalik da ring kekatamung kapatad, ding Lamanite, at pasibayu king kabaluan king katutuan —

12 Wa, sasabian ku kekayu, a karing tauling aldo ding pangaku na ning Guinu mibiye la karing kekatamung kapatad, ding Lamanite, at sumangid ning dakal a kasakitan a danasan da, at sumangid na ning ila mitabi la papunta karin at papunta keni king babo ning yatu, at panagalan, at pamarugan at mikalat marayu, alang lugal a pisalikutan, ing Guinu maging mapamakalulu ya karela.

13 At iti agpang king ula, a ila midala lang pasibayu king tune kabaluan, yapin ing kabaluan king karelang Manatbus, at ing karelang dakila at tune pastul, at mibilang la karing keang tupa.

14 Anya pin sasabian ku kekayu, iti makakayap karela kesa kekayu maliban mu nung sumisi kayu.

15 Uling lawan, nung ing mayupayang gawa mipakit karela a mipakit na kekayu, wa, karelang misadlak king kelan kapaniwalan king uli ning kaugalian da ring karelang ninunu; akit yu king sarili yu ing e nala pasibayung misadlak king kelan kapaniwalan.

16 Anya pin, sinabi ning Guinu: E kula lubus lasakan, dapot papalyarian ku king aldo ning kanakung beluan mibalik lang pasibayu kanaku, sinabi ning Guinu.

17 At ngeni makiramdam, sinabi ning Guinu, tungkul karing tau da ring Nephite: Nung ela sumisi, at magsumikap lang mamintu king kanakung kaburian, lasakan ku lang lubus, sinabi ning Guinu, uli ning karelang kelan kapaniwalan, sumangid ding dakal a mayupayang dapat a gewa ku karela; at tune kabang mabibie ya ing Guinu ding bage a reti makanian la, sinabi ning Guinu.