1 At ngeni, milyari a dakal a mekaramdam karing amanu nang Samuel, ing Lamanite, a sinabi na babo da ring pader na ning siudad. At nung makananu la karakal ding meniwala king keang amanu meko la at penintun de i Nephi; at anyang meko la at akit de, mengumpisal la kea karing kasalanan da at era tinggian, at mignasa lang mabinyag king Guinu.

2 Dapot nung makananu la karakal ding e meniwala karing amanu nang Samuel mimua la kea; at pemasibas deng batu babo ning pader, at dakal mu namang memana kea kabang makatalakad ya babo ning pader; dapot ing Espiritu na ning Guinu atiu kea, angga king ere turan karing karelang batu ni karing karelang pana.

3 Ngeni anyang akit da ing ere turan, dakal la pang meniwala karing keang amanu, angga king minta la kang Nephi para mabinyag.

4 Uling lawan, i Nephi maminiag ya, at manula, at manaral, gugulisak king pamanisi karing tau, mipapakit tanda at makapagmulala, gagawang milagru busal ding tau para abalu da a i Cristo dapat neng datang.

5 Sasabian na karela ring bage a malapit nang datang, bang kanita abalu ra at ganakan king panaun ning karelang pamaniatang ing pepabalu na na karela anyang minuna pa, king kapagnasan a maniwala la, anya pin ding dakal a meniwala karing amanu nang Samuel minta la kea para mabinyag, uling dinatang lang sisisi at mangumpisal karing kasalanan da.

6 Dapot ding maragul a dake karela e la meniwala karing amanu nang Samuel; anya pin anyang akit da ing ere turan kareng karelang batu at pana, ginulisak la karing karelang manimuna, a sasabing: Dakpan ye ing taung ini itali ye, uling lawan, atiu kea ing demonyu; at uli ning upaya ning demonyu a atiu kea e taya turan karing kekatamung batu at karing kekatamung pana; anya pin dakpan ye at itali ye, at idayu ye.

7 At kabang lalapit la para atalan de, itang oras a ita, linundag ya pababa manibatan king pader, at tinakas yang palual king karelang labuad, wa, anggiyang king sarili nang balen, at megumpisa yang menaral at menula busal da ring keang sariling tau.

8 At kaibat, ene meramdam pa karing busal da ring Nephite; at karing kapulungan da ring tau.

9 At kanita mepupus ing walung pulu at anam a banuang pamanibala da ring ukum karing tau nang Nephi.

10 At kanita mepupus mu rin ing walung pulu at pitung banua ning pamagari da ring ukum, ding maragul a dake da ring tau menatili la king karelang pamagmatas at karokan, at ding malating dake linakad lang mitmung ingat king arapan na ning Dios.

11 At anti mu naman kanini ing kabilian king kawalung pulu at walung banua king pamagari da ring ukum.

12 At mika kabud ditak a pamagbayu karing gagawan da ring tau, maliban karing taung megumpisang lalu pang mesias king karokan, at ginawa pang dakal at dakal king salungat karing kautusan ning Dios, king kawalung pulu at siyam a banua king pamagari da ring ukum.

13 Dapot milyari a king kasiam a pulung banua king pamagari da ring ukum, mika dakilang tanda a mibiye karing tau, at makapagmulala; at ding amanu da ring propeta megumpisa lang metupad.

14 At ding anghel pepakit la karing tau, biasang tau, at sinabi da karela ing mangayap a balita king maragul a tula; anya king banuang ini ding kasulatan megumpisa lang metupad.

15 Makanian man, ding tau pegumpisan da lang pepasias ding pusu da, ila ngan maliban karing dake a igit maniwala karela, pareu karing Nephite at karing Lamanite mu rin, at megumpisang menaya karing karelang sariling sikanan at karing karelang sariling kabiasnan, a sasabing:

16 Mapilan karing bage mapalyaring aula dang ustu, karing keraklan; dapot tutu, balu mi a dening anggang dakila at makapagmulalang gawa ela malyari, a nung sanung mesabi na.

17 At megumpisa lang mengatuliran at misalangsangan king karelang sarili, a sasabing:

18 A e mangaintulid a metung a melalang anti mo i Cristo ing datang; nung makanian, at nung ya ing anak ning Dios, ing Ibpa ning banua at ning yatu, kalupa ning mesabi na, bakit ena ipakit ing sarili na kekatamu at karela mu naman a atiu king Jerusalem?

19 Wa, bakit ena ipakit ing sarili na kening labuad a ini makanian mu naman king labuad ning Jerusalem?

20 Dapot, lawan, balu tamu a iti metung yang marok a kaugalian, a pepamana ra kekatamu ring kekatamung ninunu, bang apapaniwala ra katamu king mapilan a dakila at makapagmulalang bage at dapat malyari, dapot e kekatamu, nung e king gabun a marayu, metung yang labuad a e tamu balu; king uli na nini apanatili ra katamung mangmang, uling etamu asaksian king sarili tamung mata ing tutu la.

21 At ila, king kapamuraitan at king misteryosung paralan ning metung a marok, gagawa lang maragul a misteryu a e tamu aintindian, a magpanatili kekatamu para maging ipus karing amanu ra, at maging ipus mu naman karela, uling mamasa tamu karela para ituru da kekatamu ing amanu; at king paralan a ini asabi mi, apanatili ra katamung mangmang nung isuku taya ing sarili tamu karela, karing anggang aldo ning kekatamung bie.

22 At dakal pang bage ing inisip da ring tau karing karelang pusu, a kamuritan at alang ulaga; at ila megulu la uling i Satanas inamuyut nala para misundung gawang karokan; wa, linibut yang mikakalat pisasabian at pamisalangsangan king babo na ning kabilugang labuad, ba na lang apasias ding pusu da ring tau laban king mayap at king dapat datang.

23 At sumangid da ring tanda at ding makapagmulalang megawa king busal da ring tau ning Guinu, at ding dakal a milagrung karelang gewa, masyadu na lang atalan Satanas ding pusu da ring tau king babo ning kabilugang labuad.

24 At kanita mepupus na ing kasiam a pulung banua ning pamagari da ring ukum karing tau nang Nephi.

25 At kanita mepupus ne ing libru nang Helaman, agpang karing kasulatan nang Helaman at ding keang anak.