1 Ngeni milyari a ing siam a pulu at metung a banua milabas at iti anam a ralan a banua manibat king panaung i Lehi meko ya Jerusalem; at king banuang iti a i Lachoneus ya ing pamuntuk a ukum at gobernador ning labuad.

2 At i Nephi, ing anak nang Helaman, mekalako ne king labuad ning Zarahemla, a manabilin king keang anak a i Nephi, a pangane nang anak a lalaki, tungkul karing laminang tansu, at ding anggang kasulatan a misalikut, at ding anggang bage a sagradung misalikut manibat anyang pangalako nang Lehi king Jerusalem.

3 Kaibat likuan ne ing labuad, at nung nukarin ya minta, alang taung makibalu; at ing keang anak i Nephi sininup nala ding kasulatan a manalili kea, wa, ding kasulatan da ring taung a reni.

4 At milyari a king pamagumpisa na ning kasiam a pulu at aduang banua lawan, ding ula da ring propeta megumpisa na lang magaganap; uling megumpisa nang mika marakal a tanda at dakal a milagrung milyari busal da ring tau.

5 Dapot ating mapilan a megumpisang migsalita a ing panaun milabas na para karing amanu para matupad, a sinabi nang Samuel, ing Lamanite.

6 At megumpisa da lang kelian ding karelang kapatad, a sasabing: Lawan ing panaun milabas na, at ding amanu nang Samuel ela metupad; nung makanian ing kekayung tula at kasalpantayanan tungkul king bage ini meyala lang kabaldugan.

7 At milyari a ginawa lang maragul a kainge king kabilugan na ning lugal; at ding taung maniwala megumpisa na lang melungkut, uling pota king nanu mang paralan dening bage deni a mesabi mapalyaring ela maganap.

8 Dapot lawan, matatag lang magbante king aldo ita at king benging ita at ing aldo ita malyari yang maging metung mung aldo a anti mong alang bengi, bang abalu ra a ing kasalpantayanan da eya meyalang kabaldugan.

9 Ngeni milyari a ating metung a aldo a misadia karing alang kapaniwalan, a ding anggang meniwala karing makanian a kaugalian dapat lang paten maliban mu nung ing tanda maganap ya, a biniye nang Samuel ing propeta.

10 Ngeni milyari a anyang i Nephi, a anak nang Nephi, ikit na ining karokan da ring keang tau, ing pusu na masyadu yang melungkut.

11 At milyari a linual ya at diku na ing keang sarili king gabun at menangis yang masikan king keang Dios king kapakanan da ring tau na, wa, detang malyaring malasak uli ning karelang kasalpantayanan king kaugalian da ring karelang ninunu.

12 At milyari a menangis yang masikan king Guinu, king anggang aldo ita; at lawan, ing siwala na ning Guinu dinatang ya kea, a sasabing:

13 Itas me ing buntuk mu at magsaya; uling ngeni tutu, ing oras malapit na, at king benging iti ing tanda mibiye ne, at pangabukas datang ku king tau king yatu, bang ipakit ku king yatu a gawan ku ing anggang pepagawa kung pasabi king asbuk da ring banal kung propeta.

14 Lawan, datang ku karing kakung tau, bang tuparan ku ing anggang bage a pepabalu ku karing anak ning tau manibat king pamagumpisa ning yatu, at para gawan ing pareung kaburian, ning Ibpa at ning Anak — na ning Ibpa king uli ku, at ning Anak uli na ning kanakung laman. At tutu, ing oras dinatang ne, at king benging ini ing tanda mibiye ne.

15 At milyari a ding amanung ibat kang Nephi metupad nala, agpang king pangasabi ra; uling king karelang pangabigla, potang lumbug ya ing aldo e mika dalumdum; at ding tau megumpisa lang mipamulala uling alang dalumdum anyang dinatang ing bengi.

16 At ating dakal, a e meniwala karing amanu da ring propeta, a mengaragsa king gabun at mengari lang mete, uling balu da ing maragul a planu ning pamanyira a karelang sidia para karetang maniwala karing amanu da ring propeta mebigu la; uling ing tanda a mibiye na dinatang ne.

17 At megumpisa dang abalu a ing Anak ning Dios malapit neng datang; wa, king ditak a amanu, ding anggang tau king babo ning mabilug a yatu ibat king albugan angga king aslagan, pareung king labuad ning paralaya at king labuad ning paroba, masyadu lang mipamulala a mengaragsa la king gabun.

18 Uling balu da a ding propeta migpatutu la karing bage deni king dakal a banua, at itang tanda a mibiye na dinatang ne; at megumpisa lang mitakutan uli ning karelang karokan at ing karelang kelan kapaniwalan.

19 At milyari a e mika dalumdum king anggang benging ita, dapot iti kasing sala na ning kaugtuan a aldo. At milyari a ing aldo sinlag ya naman pangaabak, anti ing sadia; at abalu da a iti ing aldo a ing Guinu dapat yang mibait, uling ing tanda mibiye ne.

20 At iti milyari, wa, ding anggang bage, balang malating parti agpang karing amanu da ring propeta.

21 At milyari mu naman a ing bayung batwin sinlag ya agpang king amanu.

22 At milyari a manibat king panaun a ini megumpisa ing kalaraman busal da ring tau, nang Satanas; para pasiasan la ding karelang pusu, king kapagnasan a ela maniwala karetang tanda at makapagmulala a karelang ikit; dapot sumangid da rening pamaglaram at pamamurait dakal la karing tau deng meniwala, at mibalik la lub king Guinu.

23 At milyari a i Nephi minta ya king busal da ring tau, at karing dakal mu namang aliwa, maminiag karing sisisi, nung kesanu mika maragul a pamagpatawad karing kasalanan. At anya pin ding tau megumpisa lang pasibayung mika kapayapan king lugal.

24 At e mika pamisalangsangan, maliban karing mapilan a megumpisang menaral, a magsikap magpatune king kapamilatan da ring banal a kasulatan a ena la kailangang pamintuan ding kautusan nang Moises. Ngeni king bage a ini migkamali la uling edala aintindian ding kasulatan.

25 Dapot milyari a e melambat mibalik la lub, at tinggap da ing karelang kamalian, uling mipabalu karela a ing kautusan e pa metupad, at ini dapat yang matupad king balang malating parti; wa, ing amanu dinatang ya karela a ini dapat yang matupad; wa, a ing metung a tuldik o gulis e ya dapat milabas anggang metupad; nung makanian king banua mu ring iti midala king kabaluan da ing karelang kamalian at tinggap da ing karelang kamalian.

26 At anya pin ing kasiam a pulu at aduang banua milabas, a magdalang masayang balita karing tau uli da ring tanda a milyari na, agpang karing amanu da ring ula da ring anggang banal a propeta.

27 At milyari a ing kasiam a pulu at atlung banua milabas mu naman king kapayapan, maliban mu karetang Gadianton a mapanako a menuknangan kareng bunduk, a mamugad king lugal; uling masyadu lang matibe ding karelang kuta at sikretung lugal a ding tau e da la asambut; uli na niti mekagawa lang dakal a pamakamate, at pete dala ding dakal a tau.

28 At milyari a king kasiam a pulu at apat a banua megumpisa lang merakal king maragul a kabilangan, uling dakal a ginulut karing Nephite a tinakas angga karela, a memiye maragul a kalungkutan karing Nephite a menatili king lugal.

29 At atin mu ring sangkan ing maragul a kalungkutan busal da ring Lamanite; uling lawan, dakal a anak a meragul at megumpisa lang metua, a ila pinili da king karelang sarili, at metaid parayu karing mapilan a Zoramite, king karelang pamaglaram at karing karelang pamamuring amanu, para makiabe la karing Gadianton a mapanako.

30 At anya pin ding Lamanite misakitan la mu naman, at megumpisang mebawas ing karelang kasalpantayanan at kayapan, uli na ning karokan da ring daragul a salinlahi.