1 At ngeni milyari inyang apupus na lang Jesus ding keang amanu belikid nala ding mata na palibut karing keraklan at sinabi na karela: Lawan, dimdam yu la ding bage tiru ku bayu ku minukiat king kanakung Ibpa: anya pin, ninumang makaganaka karening sinabi ku at gawan na la itas ke king tauling aldo.

2 At milyari a inyang i Jesus asabi nala dening amanung deni, abalu na a ating mapilan karela ing migtaka at mipamulala nung nanu ing buri na agpang king batas nang Moises: uling e ra aintindian ing sinabi na a ding minunang bage milabas na la, at ding anggang bage mibayu la.

3 At sinabi na karela: e kayu magtaka a sinabi ku kekayu a ding minunang bage milabas na la at ding anggang bage mibayu la.

4 Lawan, sasabian ku kekayu a ing batas a mibiye kang Moises metupad ne.

5 Lawan, aku ing memiye king batas, at aku ing mengaku karing kakung memaleng Israel; uli na niti, ing batas kanaku metupad ya, uling dinatang ku bang tuparan ku ing batas, inya pin, iti atin yang kapupusan.

6 Lawan, eku la sisiran ding propeta, uling kalupa da ring dakal a e pa metupad kanaku, katutuan sasabian ku kekayu, matupad ngan.

7 At uling sinabi ku kekayu a ding minunang bage milabas na la, e ko sisiran ding mesabi na agpang karing bage daratang.

8 Uling lawan, ing pangaku a gewa ku karing kanakung memalen e ngan metupad; dapot ing batas a mibiye kang Moises mepupus kanaku.

9 Lawan, aku ing batas, at ing sala. Lumawe ko kanaku, at mibata anggang kapupusan, at mie kayu; uling kea a makapibata anggang kapupusan miye kung alang anggang bie.

10 Lawan, biniye ku nala kekayu ding kautusan; inya pin pamintuan yu la ding kakung kautusan. At iti ing kakung kautusan, at ding propeta, uling tutu lang migpatutu agpang kanaku.

11 At ngeni milyari a inyang i Jesus asabi na nala dening amanung deni, sinabi na karing labing adua a keang pinili.

12 Ikayu ding kakung alagad; at ikayu ding sala karing taung deni, a mitagan king bale nang Jose.

13 Iti ing gabun yung mana, at ing Ibpa biniye ne kekayu ini.

14 At e kapilanman ing Ibpa miniye yang kautusan kanaku a dapat kung sabian karing kapatad yu king Jerusalem.

15 Ni kapilanman a ing Ibpa miniye yang kautusan kanaku a dapat kung sabian karela agpang karing aliwang tribu na ning bale ning Israel, a nung ninu ing Ibpa tinaid nalang parayu king gabun.

16 Iti ing inutus na ning Ibpa kanaku, a dapat kung sabian karela.

17 A atin naku mang tupa a ala king grupung iti; deti man idala ku la, at pakiramdaman da ing siwala ku; at magmetung lang kawan, at metung mung pastul.

18 At ngeni, uli ning kesiasan dang buntuk at kelan dang kapaniwalan era aintindian ing kanakung amanu; inya pin inutus na kaku ning Ibpa a e naku magsalita pa agpang karening bage a reni karela.

19 Dapot, katutuan, sasabian ku kekayu a ing Ibpa inutusan naku, at sasabian ku kekayu, a mikawani kayu ibat king busal da uli na ning karelang karokan; inya pin uli na ning karelang karokan a e da balu ing agpang keka.

20 At katutuan, sasabian ku kekayung pasibayu a ding aliwang tribu kewani no ning Ibpa ibat karela; at uli na ning karelang karokan a e da balu ing agpang karela.

21 At katutuan sasabian ku kekayu, a ikayu ding kanakung sinabi: Ding aliwang kakung tupa a nung ninu ela king kawan a reni; ila man dapat ku lang dalan, at karelang damdaman ing kakung siwala; at mika metung a kawan, at metung a pastul.

22 At era ku aintindian, uling bala ra ila pin ding Gentil; uling era aintindian a ding Gentil dapat lang magbalik lub kapamilatan ning karelang pamanaral.

23 At era ku aintindian neng sasabian ku a damdaman da ing siwala ku; at era ku aintindian a ding Gentil eda kapilanman damdaman ing siwala ku — a eku dapat ipakit ing sarili ku karela maliban mu nung iti king kapamilatan na ning Espiritu Santo.

24 Dapot lawan, pareu yung dimdam ing siwala ku, at ikit yu ku; at ikayu ding kanakung tupa, at mebilang kayu kareng biniye na kaku ning Ibpa.