Kapitulu 19
Ding labingaduang alagad magsilbi la karing tau at menalangin la para king Espiritu Santo — Ding alagad mabiniag la at tinggap de ing Espiritu Santo at ing pamakipagsalita da karing angeles — I Jesus manalangin ya gagamit yang amanung e malyaring isulat-Ya magpatutu ya king masyadung maragul a kasalpantayanan da dening Nephite.
1 At ngeni milyari a aniang i Jesus minukiat ya king banua, ding keraklan mikakawani la, at balang tau tiki ne ing keang asawa at ding keang anak at mibalik la king karelang sariling bale.
2 At agad mikalat karing tau, bayu medalumdum a ding keraklan ikit de i Jesus, at mekipagsalita ya karela, at ya pakit na ing sarili na king aldo bukas karing keraklan.
3 Wa, at anggiyang king kabilugan ning bengi mikalat ing tungkul kang Jesus; at ila mipadala lang amanu karing tau a dakal la, wa, ing masyadung maragul a bilang, migsumikap lang masyadu king kabilugan a kabengian a ita, bang ila atiu la king aldo bukas king lugal nung nukarin i Jesus pakit ya karing keraklan.
4 At milyari a king aldo bukas, aniang ding keraklan mitipuntipun la, lawan, i Nephi at ing keang kapatad a pepatikdon na ibat karing mete, a ing lagiu na Timoteo, at ing keang anak, ing lagiu na Jonas, at i Mathoni mu naman, at i Mathonihah, ing keang kapatad, at i Kumen, at i Kumenonhi, at i Jeremias, at i Shemmon, at i Jonas, at i Zedekiah, at i Isaias, — ngeni deni ila ding lagiu da ring alagad a pinili nang Jesus-at milyari a ila minta la at tinalakad la king libutad ding keraklan.
5 At lawan, ding dakal a tau mitipuntipun la a ding alagad gewa ra ding tau mikakawani la king labingaduang grupu.
6 At ding labingadua tiru dala ding dakal a tau; at kanita tutu, gewa da a ding tau dapat lang siklaud babo ning yatu, at dapat lang manalangin king Ibpa king lagiu nang Jesus.
7 At ding alagad menalangin la king Ibpa king lagiu na namang Jesus. At milyari ing ila tinalakad la at sinaup karing tau.
8 At kaibat dalang apasiag ding pareung amanung asabi nang Jesus-alang pamialiwa karing amanung asabi nang Jesus-kanita tutu, ila siniklaud lang pasibayu at menalangin king Ibpa king lagiu nang Jesus.
9 At ila menalangin la para ketang pekaburi da; at pignasan da a ing Espiritu Santo mibiye ya karela.
10 At kaibat dang menalangin minta la king pampang, at ding keraklan tikian dala.
11 At milyari a i Nephi minta ya king danum at mebiniag ya.
12 At linto yang ibat king danum at megumpisa yang meminiag. At bininiag nala ngan ding pinili nang Jesus.
13 At milyari a kaibat da ngang mebiniag at linto ibat king danum, ing Espiritu Santo minta ya karela, at ila kinatmu la king Espiritu Santo at king api.
14 At lawan, ila mipadurutan lang balamu api; at migbaba iti ibat banua, at ding keraklan asaksian da iti, at migpatutu la; at ding angeles tinipa la ibat banua at mekisabi la karela.
15 At milyari a kabang ding angeles makisabi la karing alagad, tutu, i Jesus dinatang at tinalakad ya busal da at mekisabi ya karela.
16 At milyari a migsalita ya karing keraklan, at inutus nala a dapat lang siklaud pasibayu babo ning gabun, at makanian mu naman ding keang alagad dapat lang siklaud babo ning gabun.
17 At milyari a kaibat da ngang siniklaud babo ning gabun, inutus nala ding keang alagad a dapat lang manalangin.
18 At kanita lawan, ding alagad megumpisa lang menalangin; at menalangin la kang Jesus, ausan deng karelang Guinu at karelang Dios.
19 At milyari a i Jesus meko ne karela, at dinayu yang bagya karela at diku ne ing keang sarili king gabun, at sinabi na:
20 Ibpa, pasalamat ku a ika biniye me ing Espiritu Santo karening kakung pinili; at uli na ning karelang kapaniwalan kaku a ila mepili la ibat king yatu.
21 Ibpa, manalangin ku keka bang ibiye me ing Espiritu Santo karela ngan a maniwala karing karelang amanu.
22 Ibpa, biniye ye karela ing Espiritu Santo uling ila maniwala la kaku; at kekayung akakit a ila maniwala la kaku uling ikayu pakiramdaman yu la, at ila manalangin la kaku; at ila manalangin la kaku uling kayabe da ku.
23 At ngeni Ibpa, manalangin ku kekayu para karela, at makanian mu naman para karetang anggang maniwala karing karelang amanu, a ila malyari lang maniwala kaku, a aku malyaring atiu ku karela anti ika, Ibpa, atiu ka kaku, a itamu malyaring maging metung.
24 At milyari a kaibat nang mekapanalangin Jesus king Ibpa, minta ya karing keang alagad, at lawan, ila sindu da, alang tuknang, ing manalangin kea; at eda na ginamit ing marakal a amanu, uling mesabi na karela nanu ing dapat dang panalangin, at ila kinatmu lang pamagnasa.
25 At milyari a i Jesus binindisyunan nala kabang ila manalangin la kea; at ing keang lupa tiniman ya karela, at ing sala ning keang lupa sinlag ya karela, at lawan ila meging kasingputi nala ning lupa at susulud nang Jesus; at lawan ing kaputian na nita mas maputi kesa king anggang kaputian, wa, anggiyang alang akasimputi babo ning yatu ning kaputiang ita.
26 At i Jesus sinabi na karela: Sundu yu ing pamanalangin; at ela tinuknang king pamanalangin.
27 At ginulut yang pasibayu karela, at dinayu yang bagya at dinuku ya king gabun; at menalangin yang pasibayu king Ibpa, a sasabing:
28 Ibpa, pasalamat ku a ika lininis mula ding kakung pinili, uli ning karelang kasalpantayanan, at manalangin ku para karela, at makanian mu naman para karela a maniwala karing karelang amanu, bang ila luminis la king uli ku, king kapamilatan ning kasalpantayanan karing karelang amanu, anti ing melinis la king uli ku.
29 Ibpa, manalangin ku e para king yatu, dapot para karela a biniye yu kaku a atiu lual ning yatu, uli ning karelang kasalpantayanan, a ila luminis la king uli ku, a aku malyaring atiu ku karela anti ikayu, Ibpa, atiu kayu kaku, ba tamumg maging metung, ba kung maging kapuripuri karela.
30 At anyang i Jesus asabi nala dening amanu linapit yang pasibayu karing keang alagad; at lawan ila matatag lang manalangin, alang tuknang, kea, at tiniman ya karelang pasibayu; at lawan ila maputi la antimo i Jesus.
31 At milyari a dinayu yang bagyang pasibayu at menalangin ya king Ibpa;
32 At ena malyaring iagkas ning dila ding amanung keang penalangin, ni malyaring isulat ning tau ding amanung keang panalangin.
33 At ding dakal dimdam da at migpatutu la; at ding karelang pusu mibuklat la bang aintindian da king karelang pusu ding amanung keang penalangin.
34 Makanian man, pekadakila at makapagmulala la ding amanung keang penalangin a eda la malyaring isulat ni malyaring iagkas ning tau.
35 At milyari a anyang i Jesus meyari neng menalangin linapit yang pasibayu karing keang alagad, at sinabi na karela: Pekadakila ing kasalpantayanan a eku pa ikit karing Judio; uli na niti eku apakit karela ing anti ini kadakilang milagru, uli na ning kelan dang kapaniwalan.
36 Katutuan sasabian ku kekayu, ala metung man karela ing menakit anti ita kadakilang bage a ikit yu; ni karelang dimdam ing anti kanita kadakilang bage a dimdam yu.