1 At ngeni lawan, sasabian ku kekayu a potang ing Guinu akit nang ustu, king keang kabiasnan, a deting salita datang la karing Gentil agpang king keang amanu, kanita abalu yu a ing pangaku a gewa ning Ibpa karing anak ning Israel, agpang king karelang pamitipuntipun pasibayu karing labuad a karelang mana, magumpisa neng matupad.

2 At abalu yu a ding amanu ning Guinu, a sinabi da ring banal a propeta, matupad la ngan; at e yu na kailangan sabian a ing Guinu palambatan na ing keang pamaniatang karing anak ning Israel.

3 At e yu na kailangan pang isipan karing kekayung pusu a ding amanung mesabi ala lang kuwenta, uling lawan ing Guinu ganakan ne ing keang pangaku a keang gewa karing keang tau king bale ning Israel.

4 At potang akit yu la deting salita datang la busal yu, kanita e yu na kailangan pang tumanggi karing gawa ning Guinu, uling ing ispada ning keang justicia atiu king keang wanan a gamat; at tutu, king aldo ita, nung tumanggi kayu karing keang gawa keang papalyarian a atagal na kayu.

5 Kalulu ya a tatanggi karing gawa na ning Guinu; wa, kalulu ya a maglingad kang Cristo at karing keang gawa!

6 Wa, kalulu ya a maglingad karing patilip na ning Guinu, at ya sasabian na ing Guinu ene gagawa king pamipatilip, o king pamanula, o karing kalam, o karing amanu, o karing pamipakayap o king upaya na ning Espiritu Santo!

7 Wa, at kalulu ya a sasabi king aldo a ita, ba yang manakitan, a e malyaring mika milagrung gewa nang Jesucristo; uling ya a gagawa kanini maging anti ya king anak ning infierno, para kea alang lunus, agpang king amanu nang Cristo!

8 Wa, at e na kayu dapat mipamiru, o tumanggi, o pamialungan ding Judio, o ninuman karing mitagan na ning bale ning Israel; uling lawan, ing Guinu ganakan ne ing keang pangaku karela, at gawan na karela agpang ketang keang sinumpa.

9 Anya kanita e yu isipan a malyari yeng ibalikid ing wanan nang gamat ning Guinu king kaili, bang e na kayu ayatul potang tuparan ne ing pangaku a keang gewa king bale ning Israel.