Kapitulu 12
I Jesus mamaus ya at mamiye yang katungkulan karing Labingadua — Mamiye yang pamangamanu karing Nephite kalupa na mo ning Sermon king Bunduk — Sasabian nala ding Kanuanan — Ding keang turu manimuna la at mas maulaga la kesa karing kautusan nang Moises — Ding tau miutusan lang maging sakdal anti ya at ing keang Ibpa sakdal la — Ikumpara ya king Mateo 5.
1 At milyari a anyang asabi nalang Jesus dening amanu kang Nephi, at karetang meyaus na, (ngeni ding bilang da retang meyaus na, at tinanggap upaya at autoridad para maminiag, labingadua la) at kanita tutu, lidlad nala ding keang gamat karing keraklan, at ginulisak ya karela, a sasabing: Nuan kayu nung tuparan yula ding amanu da rening labingadua a kakung pinili ibat kekayu bang manibala kekayu, at maging kekayung talasuyu; at karela biniye ku ing upaya bang biniagan da kayu king danum; at kaibat yung mebiniag king danum, kanita lawan, biniagan da kayu king api at king Espiritu Santo; nung makanian nuan kayu nung maniwala kayu kaku at mabinyag, kaibat a ikit yu ku at abalu yu a aku pin.
2 At pasibayu, mas nuan la retang maniwala karing kekayung amanu uling magpatutu kayu a ikit yu ku, at abalu yu a aku pin. Wa, nuan la ding maniwala karing kekayung amanu, at magpakumbaba lang matingid at pabiniag, uling puntalan la king api at king Espiritu Santo, at tanggap lang kapatawaran karing karelang kasalanan.
3 Wa nuan la ding maluka king espiritu a lalapit kaku, uling karela ya ing kayarian banua.
4 At pasibayu nuan la ngan ding tatangis, uling mipatulan la.
5 At nuan la ding mamu lub, uling ilang magmana keti sulip.
6 At nuan la ngan ding daranup at mau king katuliran, uling mipasawan la king Espiritu Santo.
7 At nuan la ding mapamakalulu, uling manikua lang pakalulu.
8 At nuan la ngan ding malinis a pusu, uling akit de ing Dios.
9 At nuan la ngan ding mapamayapa, uling ilang mipalagiuwan anak ning Dios.
10 At nuan la ngan ding meligalig king uli na ning kakung lagiu, uling karela ya ing kayarian banua.
11 At nuan kayu nung palmuran dakayu at ligaligan da kayu, manga paniabianan king eganaganang klasi ning karokang alang katutuan king uli ku.
12 Uling mikamaragul kayung saya at tumula, uling maragul ing maging kayablasan kekayu karin banua; uling makanian dong pepalasan ding manulang minuna kekayu.
13 Katutuan, katutuan, sasabian ku kekayu, buri ku maging asin na kayu ning labuad; dapot nung milako kalat ing asin king nanu ing panalat king labuad? Ing asin man ibat kanita mayala neng kabaldugan nanuman nung e miugse na ya mu, at maramusak karing tau.
14 Katutuan, katutuan, sasabian ku kekayu, buri ku maging sulu da kayu dening taung deni. Ing metung a siudad a makabili babo ning bunduk-bundukan e misalikut.
15 Lawan, e ra naman daraptan ding tau a salangian de ing sulu at ibili lalam ning katabe? Ali, nung e king pibibilianan sulu, at aslagan no ngan ding anggang atiu bale;
16 Anya pin makanian yang sumala ing kekong sulu arapan ding taung deni, ba rang akit ing dapat yung mayap at mipaligayan ya ing Ibpa yung atiu karin banua.
17 E yu isipan ing mine kung labagan ku ing kautusan o ding manula. E ku mine bang labagan ku nung e bang tuparan;
18 Uling katutuan, sasabian ku kekayu, kapatak man o kagulis alang mawala king kautusan, dapot kanaku ing eganagana metupad ngan.
19 At lawan, aibiye ku ne ing batas at ding kautusan ning kakung Ibpa, bang maniwala ko kaku, at bang sumisi kayu karing kekayung kasalanan, at lumapit kayu kaku a maki malungkut a pusu at sisising espiritu. Tutu, atilu ding kautusan king arap yu, at ing batas metupad ne.
20 Nung makanian munta kayu kaku at miligtas; uling katutuan sasabian ku kekayu, nung pamintuan yu la ding kakung kautusan, a kakung inutus kekayu king oras a ini, king makananu mang bage lungub king kayarian banua.
21 Dimdam yu ing mesabi karing minunang tau, sinabi da aniang minunang panaun, at ini misulat ya mu naman king arap yu, ing e ka makamate, at ing ninumang makamate mibili ya king panganib na ning kayatulan ning Dios;
22 Dapot aku sasabian ku kekayu, ninuman itang mimua king kapatad na mibili ya king panganib ning kayatulan. At ing sumabi, king kapatad na, Raca, mibili ya king panganib king concilio; at ninuman ing sumabi, Mangmang ka, mibili ya king panganib ning api king infierno.
23 Uli na niti, nung munta kayu kaku, o magnasang munta kaku, at aganaka mung ing kapatad mu atin yang sukal a lub keka —
24 Ume ka king kekang kapatad, at makikasundu ka pamu king kapatad mu, at kaibat munta ka kaku a mitmung katapatan ning pusu, at tanggapan da ka.
25 Makikasundu kang agad keng kasalang mu kabang abe me keng dalan; a magkang kuanan naka, at mibili ka king sukulan.
26 Katutuan, katutuan, sasabian ku keka, e ka milako karin anggang e ka makabayad king katataulian a senine. At kabang atiu ka king sukulan makabayad ka kaya anggiyang metung a senine? Katutuan, katutuan, sasabian ku keka, Ali.
27 Lawan, iti sinulat da ring minunang tau, a e ka darapat pamakiapid;
28 Dapot aku sasabian ku kekayu, ninuman ing lumawe keng metung a babai, a magdalang pamangaibugan, dinapat neng pamakiapid kea king pusu na.
29 Makiramdam, bibiye ku ing kautusan kekayu, bang eyula pabureng lungub deng bage a reni king kekayung pusu.
30 Uling mayap pang e me paburen ing kekang sariling gawa karing bage a reni, a kanini dalan me ing kekang krus, at kesa king miugse ka king infierno.
31 Misulat na, a ninuman ing kawani king asawa na, dinan neng kasulatan king pamikawani ra.
32 Katutuan, katutuan, sasabian ku kekayu, a ninuman ing kawani king asawa na, nung eya murin pepaliwas, gagawan neng metung a paliwas: at ing ninumang makiasawa king kewanian, mikasala ya king pamipaliwas.
33 Pasibayu ini misulat ne, e ka susumpa king kekang sarili, nung e tuparan mu ing panata mu king Guinu;
34 Dapot katutuan, katutuan, sasabian ku kekayu; king makananu mang bage e ko susumpa; anggiyang king uli ning banua, uling yang luklukan na ning Dios;
35 Anggiang king uli ning yatu, uling yang dalpakan da ding keang bitis.
36 E kayu mu naman susumpa king uli na ning buntuk yu uling e yu arapat ing metung mumang buak maging maputi ya o matuling.
37 Dapot ing kekong pamaniabi maging Wa, wa; Ali, ali; at nanuman ing migit kaniti manibatan king marok.
38 At lawan, misulat na mata king mata, at ipan king ipan:
39 Dapot sasabian ku kekayu, e ko bablas king marok, dapot nung ninuman ing sumugat keka king pisngi mung wanan, ipalad mea naman kea ing kaili.
40 At ing bisang makiamanu keka, at kunan ne ing imalan mu, ibiye mea naman ing balabal mu.
41 At nung ating mamilit kekang papusan lumakad metung a milla, daptan mu aduang milla.
42 Dinan me ing maniawad keka; at ing bisang mandam keka e me gugulutan.
43 At lawan, misulat na mu naman, luguran me ing kalupa mung tau, at pikasaman me ing kasalang mu:
44 Dapot lawan, sasabian ku kekayu, luguran yula ding kekayung kasalang, at panalangin yo detang kekayu liligalig.
45 Bang maging anak na kayu ning Ibpa yung atiu banua; uling ya pasikat ne pin ing keang aldo karing marok at mayap.
46 Anya pin detang bage ketang minunang panaun, a atiu king lalam ning batas, kanaku ing eganagana matupad.
47 Ding lumang bage milabas nala, at ding eganaganang bage meging bayu la.
48 Uli na niti, pignasan ku ing maging sakdal kayung kalupa ku, o ing Ibpa yung atiu banua sakdal ya.