1 At kanita itang makasulat malyari na: Dalit ka, O baug, ika a e menganak; bigla kang dalit, at kulisak kang masikan, ika a e miramdam king pamanganak; uling maigit la karakal ding anak na ning magdilidili kesa karing anak da ring ating asawa, nganang Guinu.

2 Paragulan mu ing karinan ning kekang kubu, at paburen mung miladlad la ding tabing da ding kekang tuknangan; e ka pasayang; ikatkat mu la ding kekang lubid at tibayan mula ding kekang tulos;

3 Uling miladlad ka king wanan at king kaili, at ing kekang bini manan dala ding Gentil at gawan mong maguing panuknangan ding lasak a siudad.

4 E ka tatakut, uling e ka mipakarine; ni eka paitulig, uling e ka mibili king kamarinayan; uling akalinguan mu ing marine ning kekang kayanakan, at e mu na aganaka ing kapintasan ning kekang kayanakan, at e mu na aganaka pa ing kapintasan ning kekang pangabalu.

5 Uling ing mengawa keka, ing kekang asawa, i Guinu da ring ejercitos ya ing keang lagiu; at ing kekayung Manatbus, ing Banal na ning Israel-ing Dios ning mabilug a labuad ing mipalagiu kea.

6 Uling inaus na kang Guinu a anti mong metung a asawang babai a mipaimburisan at melungkut king espiritu, at metung ping asawang babai ning kayanakan, aniang misakuil ya, sasabian na ning kekang Dios.

7 King binang sinaguli mung pinandit pepaimburisan daka, dapot aku tipunan daka king kapamilatan na ning mangaragul a pakalulu.

8 King ditak a pamikasbu pimpan ke ing kanakung lupa keka sinaguli, dapot aku pakaluluan daka king kapamilatan na ning alang anggang ganaka, nganang Guinu a kekang Manatbus.

9 Uling iti, kanaku anti mo ing danum nang Noe, uling nung makananung simpa ku king ing danum nang Noe ena sampa king yatu, makanian kung simpa a e naku mikasbu keka.

10 Uling ding bunduk malyaring dayu la at ding bundukbundukan malyaring mialis la dapot ing kanakung kapakaluluan e kawani keka, ni ing kaku mang tipan king kapayapan e milako, sasabian nang Guinu a maki lunus keka.

11 O ikang mipasakitan, a depulpul na ning bagiu at e mipatulan! Oini, kanaku lang ibili ding kekang batu a ating malagung kule, at ibili kula ding kekang pititibayan a ating saliro.

12 At gawan kong rubi ding kekang awang, at carbungco ding kekang pasbulan dalan, at ding anggang kekang angganan karing maulagang batu.

13 At ding anggang kekang anak turwanan na la ning Guinu at maging maragul ing kapayapan da ding kekang anak.

14 King katuliran mitatag ka; maguing marayu ka king pangayalipit, uling e ka tumakut, at king makapangilabut uling e ya lumapit keka.

15 Oini, malyaring mitipun lang makapamisan laban keka, e king kapamilatan ku; ninumang mitipun makapamisan laban keka miragsa la king uli mu.

16 Oini, lelangan ke ing pande a lalabul baya, at papalual ne ing metung a sandata dikil king keang dapat; at lelangan ke ing manlasak bayang manyira.

17 Alang sandata a megawang laban keka a mipala; at ing balang dilang manamak kekayu king kayatulan parusan me. Iti ya ing mana da ring talasuyu nang Guinu, at ing karelang katuliran a atiu kaku, nganang Guinu.