1 At ngeni milyari a agpang king kasulatan tamu at balu tamu ding kekatamung kasulatan tutu la, uling lawan, metung ya mung makatuliran a tau ing miningat karing kasulatan-uling tutung dakal ya gewang milagru king lagiu nang Jesus; at alang ninumang makagawang milagru king lagiu nang Jesus maliban mu nung malinis ya king balang malating parti ning keang karokan.

2 At ngeni milyari a nung ala yang pamagkamaling gewa ing taung ini king pamamilang king kekaming panaun, ing atlung pulu at atlung banua milabas na:

3 At ding tau megumpisa lang menaya king maragul a kapagnasan para karing tanda a biniye na ning propetang Samuel, ing Lamanite, wa, king panaun a mika dalumdum kilub ning atlung aldo king lupa ning kabilugang gabun.

4 At megumpisang mika maragul a pamikakunu at pamisalangsangan busal da ring tau, sumangid da ring dakal a tanda a mibiye na.

5 At milyari a king katlung pulu at apat a banua, king mumunang bulan, king kapat a aldo ning bulan, mika maragul a bagiu, iti ing ena pa denasan ning anggang lugal.

6 At mika maragul mu naman at makakilabut a bagiu; at mika makapangilabut a duldul, angga king inugun ne niti ing kabilugang yatu anti ya mong mangapirasu.

7 At mika mangataram a kildap, iti ena pa denasan ning kabilugang labuad.

8 At ing siudad ning Zarahemla mesilab ya.

9 At ing siudad ning Moroni limbug ya king lalam na ning dagat, at ding manuknangan karin mengalumud la.

10 At mitambunan yang gabun ing siudad nang Moronihah, a king lugal na ning siudad mika maragul a bunduk.

11 At mika maragul at makapangilabut a pangalasak king lugal bandang paroba.

12 Dapot lawan mika mas maragul at makapangilabut a pangalasak king lugal king bandang paralaya; uling tutu, ing lupa na ning labuad migbayu ya, uli na ning bagiu at ding alisus, at ding duldul at kildap, at ing sobrang sikan na ning pangaugun na ning kabilugang yatu;

13 At ding dalan mengalasak la, at ding dalan a pante mengasira la, at dakal a patag a lugal a meging kulkul-kulkul.

14 At dakal a mangaragul at kilalang siudad ding limbug, at dakal la ding mengasilab, at dakal la ring meugun anggang ding mangaragul a bale karin mibagsak la king yatu, at ding manuknagan karin mengamate la at ding lugal melakuan lang malungkut.

15 At ating mapilan a siudad a mitagan; dapot ding mengasira karin masyadung maragul, at dakal la karela ding mengamate.

16 At ating mapilan a dela na ning alisus; at nung nukarin la mipunta alang taung makibalu, maliban mu a balu ra a ila mituki la.

17 At anya pin ing lupa na ning kabilugang labuad mibayu ya itsura, uli na ning bagiu, at ding duldul, at ding kildap, at ing pangaugun na ning yatu.

18 At lawan, ding batu mepitna la king adua; mengabalbal la king lupa na ning yatu, angga king meyakit lang pira-pirasu, at king pisuglung at king lamat, king lupa na ning gabun.

19 At milyari a anyang ding duldul, at ding kildap, at ing bagiu, at ing unus, at ing pangaugun na ning yatu tinuknang — uling lawan, deti melambat la kilub na ning atlung oras; at ing sinabi da ring aliwa a ing oras migit pa; makanian man, ding anggang maragul at makapangilabut a bage milyari la kilub na ning atlung oras — at kaibat bigla mika dalumdum king lupa na ning kabilugang labuad.

20 At milyari a mika makapal a dalumdum king lupa na ning kabilugang labuad, angga king ding manuknangan karin a e mete mekaramdam lang ambun ning dalumdum;

21 At e mika sala, uli na ning dalumdum, ni ding kandila, ni ding sulu, ni makapanyinding api king kapamilatan ning karelang masanting at malanging dutung, anya e mika nanumang sala.

22 At alang nanumang salang meyakit, ni api, o kislap, ni ing aldo, o ning bulan, o ding batwin, uling masyadung makapal ing ulap ning dalumdum a atiu king lupa ning labuad.

23 At milyari a iti melambat kilub na ning atlung aldo a alang sala a meyakit; at mika maragul a pamagmalun at pamangaga at pamanangis busal da ring anggang tau alang tuknang; wa, maragul ing pamagmalun da ring tau, pauli na ning dalumdum at ing maragul a pangalasak a dinatang karela.

24 At king metung a lugal ila dimdam da lang manangis, a sasabing: O nung sinisi kami mu bayu ining maragul at makapangilabut a aldo, at sana ding kekaming kapatad mengaligtas la, at ela sana mengasilab ketang maragul a siudad ning Zarahemla.

25 At king aliwang lugal dimdam da lang menangis at megmalun, a sasabing: O nung sinisi kami bayu ining maragul at makapangilabut a aldo, at e mila pete at pemasibas ding propeta, at penabi mi lang palual; kanita sana ding kekaming ima at ding kekaming mangalagung anak a babai, at ding kekaming anak mengaligtas la, at e la mikutkut ketang maragul a siudad ning Moronihah. At anya ding pamanangis da ring tau maragul at makapangilabut.