1 At milyari a inutus nala a dapat dalang isulat ding amanung biniye ning Ibpa kang Malaquias, a dapat nang sabian karela. At milyari a kaibat dang misulat inisplika nala. At deti ila ding amanung sinabi na karela, a sasabing: Anya pin ngana ning Ibpa kang Malaquias — Lawan padala ke ing kakung tubud, at isadia ne ing dalan king arapan ku, at ing Guinu a kekayung panintunan bigla yang datang king keang templo, at ing tubud na ning tipan, a kekayung buri; tutu, daratang ya, sasabian nang Guinu da ring ejercitos.

2 Dapot ninu ing makapibata king aldo ning keang pamaniatang, at ninu ing mitalakad potang pakit na ya? Uling anti ya mo ing api na ning mandalise, at anti yang sabun da ding batanero.

3 At lukluk yang anting metung a talapandalise at miyuyuri king pilak; at urian nala ding anak nang Levi, at dalisayan nalang antimong gintu at pilak, bang main king Guinu king ain ning katuliran.

4 Kanita ing ain na ning Juda at ning Jerusalem malyaring makatula ya king Guinu, anti karing minunang aldo, at anti karing minunang banua.

5 At lumapit ku kekayu king panaun ning pamanatul; at aku maging mabilis kung saksi laban karing malaram a manula, at laban karing makiapid, at laban karing mangalaram a susumpa at laban karing manalipit king makiupa karing keang kaupahan, karing babaing mebalu at karing ulilang tata, at ila a tatangging sumaup king tau king aliwang labuad, at e tatakut kanaku, sasabian nang Guinu da ring ejercitos.

6 Uling aku ing Guinu, eku mibabayu; anya pin ikayung anak nang Jacob ekayu megisan.

7 Manibat karing kayaldawan da ring kekayung ninunu migpakalili kayu karing kakung tuntunan at e yula pemintuan. Mibalik kayu kanaku at aku mibalik ku kekayu, sasabian nang Guinu da ring ejercitos. Dapot sasabian yu: Kaisanu kami mibalik?

8 Apanakawanan ne wari ning tau ing Dios? Makanian man panakawanan yu ku. Dapot sasabian yu: Kaisanu a ikami penakawanan daka? King sikapulu at karing ain.

9 Misumpa kayu king sumpa, uling panakawanan yu ku, iting mabilug ping bansa.

10 Dalan yu ing mabilug a sikapulu king bangan, bang mika pamangan king kanakung bale; at subukan yu ku ngeni kaniti, sasabian nang Guinu da ring ejercitos, nung e kula buklatan kekayu ding awang ning banua, at itugtug ku kekayu ing metung a kanuanan, a alang silid a managiu bang tanggap kaniti.

11 At ibawal kula ding manlaklak king uli yu, at e dala siran ding bunga da ring kekayung gabun; ni e la man kalugusan bunga ding kekayung wake king marangle, ngana ning Guinu da ring ejercitos.

12 At ausan da kayung masaya ding anggang bansa, uling maging metung kong maligayang labuad, sasabian nang Guinu da ring ejercitos.

13 Ding kekayung amanu meging kalapastanganan la laban kanaku, sasabian ning Guinu. Makanian man sasabian yu: Nanu ing sinabi mi laban kekayu?

14 Sinabi yu: Alang kabaldugan ing sumuyu king Dios, at nanung pakinabang kaniti a memintu tamu karing keang bilin at linakad kaming malulungkut king arapan ning Guinu da ring ejercitos?

15 At ngeni ausan tayang masaya ing palalu; wa, ding darapat karokan mitalakad la; wa, tutuksuan de ing Dios at tatakas la.

16 Kanita ding tatakut king Guinu misabisabi la king metung at metung, at pekiramdaman na la ning Guinu at dimdam na; at ing metung a libru ning kapigaganakan misulat ya king arapan na para karela a tatakut king Guinu at ding minisip king keang lagiu.

17 At ila maging kanaku la, sasabian nang Guinu da ring ejercitos, king aldo a kanakung gawan ing kanaku ping sariling bandi, at aku pasayangan kula a anti mo ing pamipasayang ning metung a tau king keang anak a lalaki a susuyu kea.

18 Kanita mibalik kayu at lawan yu ing pamialiwa ning matulid at ning marok, itang susuyu king Dios at itang e susuyu kea.