1 At ngeni milyari a anyang i Jesus asabi nala dening amanung deni melikid yang pasibayu karing keraklan, at biklat neng pasibayu ing asbuk na karela, a sasabing: Katutuan, katutuan, sasabian ku kekayu, E kayu manatul bang eko miatulan.

2 Uling nung makananu ing kayatulan a inatul yu, makanian kong mayatul, at ing sukad a panyukad yu, ya namang panyukad da kekayu.

3 At baket lalawan me ing puling king mata na ning kapatad mu, at eme ukulan ing kabual a atiu king sariling mata mu?

4 O makananu mung sabian king kapatad mu: Paburen mu kung palual ke ing puling keng mata mu, at lawan ing kabual king sarili mung mata?

5 Magbanalbanalan, palual me pa ing kabual king sariling mata mu at kanita masala yang akit mung ipalual ing puling king mata ning kapatad mu.

6 Eyu babiye ing banal a bage karing asu, ni e yo iugse ding perlas arapan ding babi, a magkang damusakan da la mu at arapan dakayu at panginisan.

7 Maniawad kayu at mirinan kayu; manintun kayu, at manakit kayu, katuk kayu, at mibuklatan kayu.

8 Uling ing balang metung a maniawad, tanggap ya; at ing manintun, manakit ya; at ing kakatuk mibuklatanan ya.

9 O ninu ing tau kekayu, a nung aduananan neng tinape ning anak na, dinan neng metung a batu?

10 O nung aduananan neng metung a asan, dinan neng metung a ubingan?

11 Nung ikayu pin mangarok kayu, biasa kong magkalub karing anak yu, lalu ne kasi ing Ibpa yung atiu banua ing muniye mayap a bage karing maniawad kea.

12 Inya pin itang anggang bage buri yung daptan da kekayu ding tau, ya namang daptan yu karela, uling iti ya ing kautusan at ding propeta.

13 Lungub kayu king makiput a pasbul uling malualas ya ing pasbul, at malapad ya ing dalan papunta king kasiran, at dakal lang lungub ketang lugal a ita.

14 Uling makiput ya ing pasbul, at makitid ya ing dalan, papunta king bie, at ditak lamu ding manakit kea.

15 Mingat kayu karing e tutung propeta, a lalapit kekayung maka imalan tupa, dapot king lub da lobo lang ganid.

16 King karelang bunga akilala yu la. Anta gagtal ko waring ubas karing suksuk; o higus karing sapinet?

17 Makanian mu naman king balang mayap a tanaman mamunga yang mayap dapot ing tanaman a marok mamunga yang marok.

18 E malyaring mamungang marok ing tanaman a mayap, ni ing tanaman a marok mamungang mayap.

19 Ing balang tanaman a e maki bungang mayap, makutud ya at miugse king api.

20 Inya pin king bunga ra akilala yu la.

21 E ing balang metung a sasabi kanaku, Guinu, Guinu, lungub ya king kayarian banua: nung e itang darapat king kaburian ning Ibpa kung atiu banua.

22 Dakal la ding sumabi kanaku king aldo a ita: Guinu, Guinu, eke wari menula king lagiu mu ampon king lagiu mu pepalual keng demonios, at king lagiu mu dinapat keng dakal a mayupayang dapat?

23 At kanita itutul ku karela: Kapilan man e ra ko kakilala; kawani ko kanaku, mapaniapat marok.

24 Inya pin ing balang metung a makiramdam kareting amanu ku at daraptan nala, makaablas ya king metung a taung maisip, a mitalakad bale babo ning batu —

25 At ing uran mebaldug, at ing bulus dinatang, at ing angin tiniup at ing bale pingkulan de; at e miragsa; uling mitalakad ya babo ning batu.

26 At ing balang metung a makiramdam kareting amanu ku, at e no daraptan, makalupa ya king metung a taung alang isip a mitalakad bale babo balas.

27 At ing uran mebaldug at ing bulus dinatang, ing angin tiniup at pingkulan de itang bale; at mibual ya: at makatakut ing pangaragsa na.