1 Katutuan, katutuan, sasabian ku a buri ku mamiye kayung limus karing kalulu; dapot mingat ka a e mu daraptan ing kekang kabanalan arapan ding tau, bang pakit kamu karela; uling a magkang e na ka mika ablas kang Ibpa mung atiu banua.

2 Nung manlimus ka pin, e ka titiup pakakak arapan mu, anti mo ing daraptan da ding magbanalbanalan karing sinagogas at karing dalan, bang mika kaligayan la karing tau. Ing katutuan sasabian ku kekayu, tinggap da na ing karelang ablas.

3 Dapot nung manlimus ka e na sa ababalu ning kaili mu ing daraptan na ning wanan mu:

4 Bang milihim ing panlimus mu; at i Ibpa mung manakit keka king lihim ablasan na ka.

5 At nung manalangin ka, e ka sa anti ding magbanalbanalan: uling ila kapad da ing makatalakad at manalangin karing sinagogas ampon karing suluk ding dalan bang akit do ding tau. Ing katutuan sasabian ku kekayu, tinggap da na ing karelang ablas.

6 Dapot ika nung manalangin ka, lungub ka keng silid mu, at kaibat meng kebat ing pasbul, manalangin ka king Ibpa mung atiu banua makalihim, at i Ibpa mung manakit keka king lihim, ablasan na.

7 At king pamanalangin eya gagamitan ing alang kabaldugan a, ulit-ulit, anti ing daraptan ding Gentil: uling ila isipan da ing maramdam la uli ning dakal dang sinabi.

8 Eko pin makiapus karela, uling i Ibpa yu balu na ing bage kailangan yu bayu yu aduan kea.

9 Manalangin ko pin anti kanini: Ibpa mi, a atiu banua, samban da sa ing lagiu mu.

10 Mipamintuan ing kaburian mu keti sulip anti karin banua.

11 At ipatawad mu kekami ing utang mi, anti mo ing pamamatawad mi karing mika utang kekami.

12 Ampon e mu ke daralan king tuksu nung e ikabus mu kami king marok.

13 Uling keka ya ing kayarian, at ing upaya, at ing kapurian, kapilanman. Amen.

14 Uling, nung patawaran yo ding tau king karelang kasalanan, patawaran na kayu naman ning Ibpa yung atiu banua.

15 Dapot nung e yo patawaran ding tau king karelang kasalanan, ena kayu naman patawaran ning Ibpa yu king kekong kasalanan.

16 Bukud keta, nung magayunu kayu, e ko sa anti ding magbanalbanalan, a palumbayan de ing lupa ra; uling ila babayu re ing lupa ra, bang akit do ding tau a magayunu la. Ing katutuan sasabian ku kekayu, tinggap da na ing karelang ablas.

17 Dapot ika nung magayunu ka, lanian me ing buntuk mu, at imuan me ing kekang lupa.

18 Bara kang e akit magayunu ding tau, nung e i Ibpa mung atiu makasalikut at i Ibpa mu a manakit lihim keka ablasan na ka.

19 Ekayu titipun pibandian keti sulip, a nung nu ing pulilia at kalawang asira da, at nung nu ding mapanako akulkul da at apanako.

20 Nung e bagkus tumipun kong pibandian banua, a nung nu ing pulilia at kalawang e ra asira, at nung nu ding mapanako era akulkul at apanako.

21 Uling nung nukarin ing pibandian yu, atiu naman karin ing kekong pusu.

22 Ing sulu ning katawan yapin ing mata; nung ing mata mu pin mayap ya, ing mabilug mung katawan kumatmu yang sala.

23 Dapot nung ing mata mu marok ya, ing mabilug mung katawan kumatmu yang dalumdum. Nung ing salang atiu pin keka dalumdum ya kesa king sala, karagul nang bina ning dalumdum a ita!

24 Ninuman alang makasuyung aduang guinu, uling kamuan ne ing metung o luguran ne ing metung, o kumampi ya king metung at palmuran ne ing metung. E ko makasuyu king Dios ampon king pibandian.

25 At ngeni milyari a aniang i Jesus sinabi nala dening amanung deni linawe nala ding labingadua a pinili na, at sinabi na karela: Ganakan yu la ding amanung sinabi ku. Uling lawan, ikayu ilang kanakung pinili para suyuan la ding taung deni. Anya pin, sasabian ku kekayu, eko mababalisa king kekong bie, nung nanu ing kekong kanan o nung nanu ing kekong inuman, makanian mu naman king uli na ning kekong katawan, nung nanu ing kekong imalanan. E wari ing bie migit ya king pagkabie, at ing katawan migit king imalan?

26 Lawan yo ding ayup banua e la tatanam, e la papalut, e la mibabangan, at i Ibpa yung atiu banua pakanan na la. E ko wari maigit pa ulaga karela?

27 Ninu kekayu anggiyamang mabalisa ya atuglungan neng metung a siku ing sukad ning bie na?

28 At bakit mababalisa ko tungkul king imalan? Pagmasdan yo ding lirios king marangle nung makananu lang tutubu; e la magobra, ni ela mamabal;

29 At makanian man sasabian ku kekayu king i Solomon, king keang kaligayan e mipaimalanan anti ing metung kareti.

30 Dapot nung ing Dios paimalanan nang makanian ing dikut king marangle, a ngeni mabie, at bukas mitangab king kalang, ena ko lalung paimalanan, o ikayung ditak a kasalpantayanan?

31 Uli na niti e ko mababalisa ngayu, Nanung kanan mi? o, Nanung inuman mi? o, Nanung imalan mi?

32 Uling eganaganang ing Ibpa yung atiu banua balu na ing kailangan yu ing eganaganang bage a iti.

33 Dapot munang panintunan yu pa ing kayarian na ampon ing katuliran na; at ing eganaganang bage a iti miabie lang karagdagan kekayu.

34 Inya pin eko mababalisa king aldo bukas; uling ing aldo bukas pagmalasakitan na ing keang sarili. Makagiu king balang aldo ing sarili nang kaligaligan.