1 At ngeni milyari a anyang i Jesus asabi na nala deting bage inisplika nala karing keraklan; at inisplika nala ding anggang bage karela, maging maragul at malati.

2 At sinabi na: Deting banal a kasulatan a ala kekayu, ing Ibpa inutus na a dapat ku lang ibiye kekayu; uling kabiasnan kea a dapat lang mibiye karing daratang a salinlahi.

3 At inisplika nala ding anggang bage, anggiyang ibat king simula angga king panaun a dapat yang datang king keang glorya — wa, anggiyang ding anggang bage a dapat datang king lupa ning yatu, anggiyang angga king ding elementu malaso la king sobrang pali, at ing yatu dapat yang mibalut abeabe antimong lulun, at ing banua at ing yatu dapat nalang milabas;

4 At anggiyang king dakila at tauling aldo, potang ding anggang tau, at ding anggang mikakamaganak, at ding anggang bansa, at amanu talakad la king arapan ning Dios, ba lang miatulan karing karelang gawa, nung mayap la o nung marok la —

5 Nung mayap la, king pamanyubling mie ning bie alang angga; at nung marok la, king pamanyubling mie ning pangasumpa; bilang miyayagape, ing metung king metung a banda at ing metung king aliwang banda, agpang king lunus, at king justicia, at ing kabanalan a atiu kang Cristo, a mebie bayu ing yatu megumpisa ya.

6 At ngeni alang malyaring misulat king librung ini anggiyang ing kadinalan a parti da ring bage a i Jesus tutu nang tiru karing keang tau;

7 Dapot lawan ding lamina nang Nephi maglaman lang mas marakal a parti karing bage a keang tiru karing tau.

8 At deting bage sinulat kula, a metung lang malating parti da ring bage a keang tiru karing tau; at sinulat ku la king kapagnasan a midala lang pasibayu karing taung deni, manibat karing Gentil, agpang karing amanu a sinabi nang Jesus.

9 At potang atanggap da ne ini, a maulagang dapat atiu karelang mumuna, bang subukan ing karelang kasalpantayanan, at nung maniwala la kareting bage kanita ding mas dakilang bage mipakit la karela.

10 At nung e la maniwala kareting bage, kanita ding mas dakilang bage misalikut la karela, king karelang pangasumpa.

11 Lawan, malapit ku nalang isulat deti, ilangan a makadukit karing lamina nang Nephi, dapot ing Guinu binawal na, a sasabing: Subukan ku ing kasalpantayanan da ring kanakung tau.

12 Uli na niti aku, i Mormon, susulat kula ring bage inutus na kaku ning Guinu. At ngeni aku, i Mormon, pupupusan ku na ing kakung pamanisplika, at isundu kung isulat ding bage a inutus da kaku.

13 Anya kanita, pagnasan ku a dapat yung abalu a ing Guinu tutu nalang tiru ding tau, kilub ning atlung aldo; at kaibat nang pepakit ing keang sarili karelang madalas, at memirasung tinapeng madalas, at binindisyunan ne iti, at biniye ne karela.

14 At milyari a tinuru at sinaup ya karing anak da ring keraklan a mesabi, at pepalaya nala ring karelang dila, at miniabi la karing karelang ninunu dakila at makapagmulalang bage, anggiyang mas dakila kesa king keang sinabi karing tau; at pepalaya nala ring karelang dila ba lang makapagsalita.

15 At milyari a kaibat nang minukiat king banua — ing kaduang besis a pepakit na ing keang sarili karela, at minta ya king Ibpa, kaibat nalang pepakayap ding anggang masakit, at ding karelang pile, at biklat ding mata da ring bulag at leko ding bara da ring balugbug da ring maklak, at agawa nala ding anggang paralan ning pamipakayap busal da, at apatalakad ing metung a tau ibat king mete, at apakit ing keang upaya karela, at mekaukiat king Ibpa —

16 Lawan, milyari a king aldo bukas a ding keraklan tinipun da ing karelang sarili abe-abe, at pareu dalang ikit at dimdam deting anak; wa, anggiyang ding bingut biklat dala ding karelang asbuk at migsalitang makapagmulalang bage; at ding bage a karelang sinabi mibawal la a dapat alang ninumang taung sumulat kareta.

17 At milyari a ding alagad a pinili nang Jesus megumpisa la ibat king panaun a ita para maminiag at para turu nung makananu la karakal ding linapit karela; at nung makananu la karakal ding mebiniag king lagiu nang Jesus kinatmu la king Espiritu Santo.

18 At dakal karela ding menakit at mekaramdam karing e masasabing bage, a e makaayun king tuntunan para isulat.

19 At tinuru la, at sinaup king metung at metung; at gewa da ing anggang bage pare-pareu busal da, ing balang tau makiutus yang pante, metung king metung.

20 At milyari a gewa ra ngan ing anggang bage antimo ing inutus nang Jesus karela.

21 At detang mebiniag king lagiu nang Jesus meyaus lang ing pisamban nang Cristo.