1 Ao ngkai e a koro bukina bwa n aia kaabwi ma teniua n ririki n tautaeka taan moti, bon akea te itabaraaraa i buakoia ana botanaomata Nibwaai ma ti iai teutana te kainikatonga n te ekaretia, are e a karika te kakauntaeka teutana imarenaia aomata, ao aaro aikai ake a raoiakinaki ni banen te kaabwi ma teniua n ririki.

2 Ao ai bon akea naba te itabaraaraa i buakoia te botanaomata n te kaabwi ma aua n ririki; ao akea naba te itabaraaraa ae bati n te kaabwi ma nimaua n ririki.

3 Ao e a koro bukina bwa n te kaabwi ma onoua n ririki, eng, e a bon korakora te itabaraaraa ma kakauntaeka aika a mwaiti; are e karika kitanan Taraemera irouia aomata aika a korakora mwaitia, ma n nakon te aba are i meang bwa a na bwaibwai iai.

4 Ao a bon mwananga n te raroa ae abwaabwaki, n te aro are a roko n taabo aika e mwaiti te ran iai ma karaanga aika a mwaiti.

5 Eng, ao a bon kamaenakoia nakon mwakoron te aba ni kabane, nakon mwakorona nako ake a tuai ni bane bwaia ma n tuai n akea kaai iai, kioina ngkai a bon rangi ni mwaiti aomata ake a bon tia ni bwaibwai n te aba.

6 Ao ngkai bon akea mwakoron te aba ae akea bwain aona ma bon ti te kai ae akea, ibukin korakoran aia urubwai aomata ake a kaaina te aba arei mai i mwaaina ao e a aranaki bwa kamaroa.

7 Ao bon ti tabeua kaai iaon te aba arei, ma e ngae n anne te botanaomata are e mwananga a bon rianako rabakauia n aron te mwakuri ma te timanti; ngaia are a katei taian bata man te timanti are a bon maeka iai.

8 Ao e a koro bukina bwa a bon mwaiti aia kariki ao a maenako, ma ni mwananga nako man te aba i maiaki nakon te aba i meang, ma ni buta nako n te aro are a bon rabuna aon te aonaba ni kabuta, ma i taari i maiaki nakon taari i meang, ma i taari i maeao nakon taari i mainiku.

9 Ao botanaomata ake a mena n te aba are i meang a bon maeka n taian umwanrianna, ao n taian bata aika timanti, ao a bon kariaia bwa aekan kaai nako a na bwebwerake iaon te aba, bwa e aonga n roko te tai are e na reke aia kai bwa a na katei bataia iai, eng, aia kaawa, ma aia tembora, ma aia auti n nebo, ma aia tabo aika a tabu, ma aekan nako aia kateitei.

10 Ao e a koro bukina bwa ngkai e bon rang karako te kai n te aba are i meang, a bon kanakoaki kaai aika a mwaiti nako meang n te kaibuke.

11 Ao ngaia are e a reke angaia aomata ake n te aba are i meang bwa a na katei kaawa, n te kai ao te timanti.

12 Ao e a koro bukina bwa a bon mwaiti ana botanaomata Amon, ake bon Reimwanaite ngke a moan bungiaki, ake a bon nako nakon naba te aba aio.

13 Ao ngkai a bon mwaiti reekootiia te botanaomata aio ake a tauaki mwiia irouia te botanaomata aio aika a mwaiti, ake a babane rongorongo iai ma ni korakora mwaitia, ake a kaineti ma ngaiia.

14 Ma nooria, katebubuan mwakoron aia waaki te botanaomata aio, eng, rongorongoia Reimwanaite ma Nibwaite, ma aia bubuaka, ma itabaraaraia, ma aia kakauntaeka, ma aia kakabwarabwara, ma aia taeka ni burabeti, ma aia botaki ni kaibuke ma kabaan aia kaibuke, ma katean aia tembora, ma aia tinakoke, ma aia tabo aika a tabu, ma raoiroia, ma buakakaia, ma aia tiriaomata, ma aia mwakuri n iraa, ma aia anaibwai n te iowawa, ma aekan nako mwakuri aika bati n ribaki ma kabekaau, a bon aki tau nneia n te boki aei.

15 Ma nooria, a bon mwaiti taian boki ma reekootii n aekaia nako, ao a bon kaawakinaki raoi irouia Nibwaite.

16 Ao a bon karuoaki rikaaki man te roro teuana nakon te roro teuana irouia Nibwaite ni karokoa ae a bwaka n riaoan te tua ao a tia n tiringaki, n iraeaki aia bwai n te mwakuri n iowawa, ma ni kakaeaki ma ni kakiokioaki, ma n tiringaki, ao ma ni kamaenakoaki iaon te aba, ma n ikotaki ma Reimwanaite ni karokoa ae aikoa manga aranaki bwa Nibwaite, ma n riki ni buakaka ao ni moaanti, ao n unun, eng, n riki bwa Reimwanaite.

17 Ao ngkai I a manga okira au rongorongo; ngaia are te bwai are I a tia n taekinna e a tia n riki i mwin tian rikin te itabaraaraa ae korakora, ma te aki rau, ao bobobuaka, ma kakauntaeka, i buakoia ana botanaomata Nibwaai.

18 E a toki aia kaabwi ma onoua n ririki n tautaeka taan moti;

19 Ao e a koro bukina bwa e bon korakora naba te itabaraaraa n te aba, eng, n te kaabwi ma itiua n ririki, ao n te kaabwi ma waniua n ririki.

20 Ma e ngae n anne ao Ereman e bon kaaina te kaintekateka ni motikitaeka ma te momotiraoi ao te aki nanonano; eng, ao e bon kaawakin ana tua te Atua; ao e bon karaoa ae eti imatan te Atua n aki toki; ao e bon nakonako ni kawain tamana, n te aro are e bon nakoraoi arona n te aba.

21 Ao e a koro bukina bwa iai natina uoman mwaane. E arana are te karimoa bwa Nibwaai, ao are e uarereke bwa Riaai. Ao a rikirake i nanon te Uea.

22 Ao e a koro bukina bwa a rikirake ni karako taian bobobuaka ma itabaraaraa, i buakoia te botanaomata ae Nibwaite, ni banen aia kaabwi ma waniua n ririki n tautaeka taan moti i aoia ana botanaomata Nibwaai.

23 Ao e a koro bukina bwa n aia kaabwi ma ruaiwa n ririki n tautaeka taan moti, ao e bon reitinako te rau n te aba, ma ti botaki ni karaba aika buakaka are Kateanton are te tia iraa e a tia ni katei ni mwakoron te aba are a rang ni kaainaki riki, are aki ataaki n te tai anne irouia mataniwin te tautaeka; ngaia are a bon aki kamaunaki man te aba.

24 Ao e a koro bukina bwa n te ririki naba anne ao e rikirake ni korakora te nakoraoi n te ekaretia, n te aro are a kaaina te ekaretia ngaa ma ngaa ao a bwabetitoaki nakon te rairannano.

25 Ao e a bon rangi ni korakora te rikirake n te ekaretia, ao a bon rangi ni mwaiti kakabwaia ake a bwaro i aoia aomata, n te aro are taian ibonga aika rietata ao tia reirei a bon rianako naba miimiia.

26 Ao e a koro bukina bwa e nako raoi ana mwakuri te Uea n te aro are a bwabetitoaki ma ni katiteuanaki nakon ana ekaretia te Atua, aomata aika a mwaiti, eng, bwii ni ngaa ma ngaa.

27 Ikai are ti a nooria bwa e nanoanga te Uea nakoia ni kabane ake, a na wetea arana ae tabu, ma nanoia ni koaua.

28 Eng, ngaia are ti nooria bwa mataroan karawa e uki nakoia aomata ni kabane, nakoia naba ake a na kakoaua aran Iesu Kristo, ae natin te Atua.

29 Eng, ti nooria bwa ane e taua ana taeka te Atua, are e bon tawe ma ni mwaaka, are e na bwenaua ni kabane ana mwakuri ni mwaamwanaa te aba ma ana bwai ni kamwane, ma ana babaire ni kamwamwane te riaboro, ma ni kairiia ana aomata Kristo n te kawai ae eti ma ni wariki n riaon te marawa ni kananokawaki ae aki totoki are e katauraoaki bwa e na kabwautia aika a buakaka—

30 Ma ni kona ni karokoa tamneia, eng, tamneia ae aki maamate, i angaatain te Atua n ueana i karawa, bwa a na tekateka ma Aberaam, ao Itaaka, ao Iakobwa, ma ara bakatibu ni kabane aika a tabu, bwa a na aki manga oki nako.

31 Ao n te ririki aei ao e reitinako te kakukurei n te aba are Taraemera, ao n aba ni kabane ake a uakaan, ao n aaba ni kabane ae a bwainaki irouia Nibwaite.

32 Ao e a koro bukina bwa iai te rau ao te kimwareirei ae korakora n nikiran te kaabwi ma ruaiwa n ririki; eng, ao e bon reitinako naba te rau ao te kimwareirei ae korakora n aia kanimabwi n ririki n tautaeka taan moti.

33 Ao n aia kanimabwi ma teuana n ririki n tautaeka taan moti ao bon iai naba te rau, ma iai te kainikatonga are e moanna n rin n te ekaretia—tiaki i nanon ana ekaretia te Atua, ma inanoia aomata ake a tataekinna bwa a kaaina ana ekaretia te Atua—

34 Ao a bon tabekaki rake n te kainikatonga, n te aro are a bwainikirinia tariia aika a mwaiti. Ngkai te bwai aei bon te buakaka ae korakora, are e a bon karika korakoran bwainikirinaia mwakoroia te botanaomata ake a nanorinano riki, ao a rinanon te karawawataki ae korakora.

35 Ma e ngae n anne a bon aki toki n aki mamatam ma n tataro, ao a rikirake ni matoatoa ma ni matoatoa riki n aia nanorinano, ma n nene ao n nene riki n onimakinan Kristo, n onrake tamneia n te kimwareirei ma te raunnano, eng, n te aro are a itiaki ma ni katabuaki nanoia, ao katabuan nanoia e reke ibukin anganakin te Atua nanoia.

36 Ao e a koro bukina bwa n te kanimabwi ma uoua n ririki e bon bane naba i nanon te rau, ma bon iai te kainikatonga ae korakora are e a rin inanoia aomata; ao e riki aio man rianakon korakoran kaubwaia ma nakoraoia iaon te aba; ao e rikirake irouia man te bong teuana nakon te bong teuana.

37 Ao e a koro bukina bwa n aia kanimabwi ma teniua n ririki n tautaeka taan moti, ao e mate Ereman, ao natina are te karimoa are Nibwaai e a waaki n tautaeka i mwina. Ao e a koro bukina bwa e kaaina te kaintekateka ni motikitaeka ma te momotiraoi ao te aki nanonano; eng, e bon kaawakina ana tua te Atua, ma n nakonako ni kawain tamana.