1 Нифайг нас барсны дараа, Нифайн дүү Иаковын Нифайн хүмүүст ярьсан тэрхүү үгс оршвой.

2 Эдүгээ, хайрт ах дүү нар минь, Иаков би, Бурханы өмнө хүлээсэн хариуцлагынхаа дагуу өөрийн албан тушаалыг эрхэмлэн чанд биелүүлэхээр, мөн би өмсгөлөө та нарын нүглүүдээс ангижруулж болохын тулд, би энэ өдөр та нарт Бурханы үгийг тунхаглаж болохын тулд ариун сүм өөд та нар дээр ирлээ.

3 Мөн би дуудлагынхаа албан тушаалд өдийг хүртэл хичээнгүй байсныг та нар өөрсдөө мэднэ; гэвч би энэ өдөр өдийг хүртэл байснаас үлэмж илүүгээр та нарын бодгалиудын сайн сайхны төлөө хүсэл тэмүүлэлдээ болон зовнилдоо дарагдан байна.

4 Учир нь болгоогтун, миний та нарт өгсөн Их Эзэний үгэнд та нар эдүгээ болтол дуулгавартай байсаар буй билээ.

5 Гэвч болгоогтун, намайг анхааран сонсогтун, мөн тэнгэрийг болон газрыг Бүтээгч бүхнийг чадагч түүний тусламжтайгаар би та нарын бодлуудын талаар хэлж чадна гэдгийг мэдэгтүн, миний хувьд машид жигшүүрт гэгдэх, тийм ээ, мөн Бурханд ч жигшүүрт болох тэр нүгэлд та нар хэрхэн замнаж эхэлж байгаа талаар буюу.

6 Тийм ээ, зүрх сэтгэлийн тань ёс бусын талаар би та нарт гэрчлэх ёстой болов, энэ нь миний сэтгэлийг гашуудуулж, мөн өөрийн Бий Болгогчийн оршихуйн өмнө намайг ичсэндээ нугдайхад хүргэж байна.

7 Мөн түүнчлэн эхнэр, хүүхдүүдийн чинь өмнө би та нарын талаарх яриандаа маш их шулууныг хэрэглэх ёстой болов, энэ нь намайг гашуудуулж байна, мөн эхнэр, хүүхдүүдийн тань олон нь Бурханы өмнө үлэмж энхрий, ариун мөн эмзэг мэдрэмж бүхий бөгөөд энэ нь Бурханд таалагддаг зүйл буюу;

8 Мөн тэд Бурханы таалалт үгийг, тийм ээ, шархадсан сүнсийг эдгээгч тэрхүү үгийг сонсохоор нааш ирсэн хэмээн надад бодогдоно.

9 Иймийн тул, Бурханаас миний хүлээн авсан чанд зарлигийн учир, шархыг нь эдгээж мөн тайтгаруулахын оронд, аль хэдийн шархалсан тэдгээрийн шархыг томсгохоор; мөн шархлаагүй тэдэнд Бурханы таалалт үгсээс зооглохын оронд тэдний сүнсийг цоо хатгах мөн тэдний эмзэг оюуныг шархлуулах чинжаал хутгууд дүрэгдэхээр болгож, гэмт хэргүүдийн чинь дагуу та нарыг зэмлэн буруутгахаар би албадуулах болсон нь зүрх сэтгэлийг минь хүндрүүлнэ.

10 Гэвч, уг үүрэг хүнд хэдий ч, би Бурханы чанд зарлигуудын дагуу үйлдэж мөн цэвэр сэтгэлтэй мөн харууссан зүрхтэй тэдний дэргэд, мөн Бүхнийг Чадагч Бурханы цоо ширтэх мэлмийн харцан дор өөрсдийн чинь ёс бус мөн жигшүүрт хэргүүдийн чинь талаар та нарт хэлэх ёстой.

11 Иймийн тул, Бурханы үгийн тодорхой байдлын дагуу би үнэнийг та нарт хэлэх ёстой. Учир нь болгоогтун, Их Эзэнээс хүссэний минь дагуу, уг үг надад ийн ирж, хэлсэн нь: Иаков, маргааш ариун сүм өөд яв, мөн чамд миний өгөх үгийг энэ ард түмэнд тунхагла.

12 Мөн эдүгээ болгоогтун, ах дүү нар минь, та нарт миний тунхаглах тэрхүү үг энэ болой, та нарт болон та нарын үр удамд амлалтын нутаг болох энэхүү нутагт элбэг дэлбэгээр бялхах алт, мөн мөнгө, бас бүх төрлийн үнэт хүдрийг та нарын олон тань эрж хайж эхэлсэн бөлгөө.

13 Мөн хангагч мутар та нарын дээр ихэд тааламжтайгаар инээмсэглэж байсны учир та нар их баялгийг эзэмшсэн билээ; мөн та нарын зарим нь ах дүүсээсээ илүү баялгийг эзэмшсэний учир та нар зүрх сэтгэлийн бардамналд өргөгдөж, мөн өмсгөл чимгийнхээ үнэтэйн улмаас хүзүүгээ хөшөөж мөн дээгүүр харах, мөн та нар өөрсдийгөө тэднээс илүү хэмээн бодох учир ах дүүсээ хавчдаг бөлгөө.

14 Мөн эдүгээ, ах дүүс минь, Бурхан та нарыг энэ зүйлд чинь зөвтгөнө хэмээн бодно уу? Болгоогтун, би та нарт хэлнэ, Үгүй. Харин тэр та нарыг буруутгана, мөн хэрэв та нар эдгээр зүйлд энэ хэвээрээ үлдэх аваас түүний шүүлтүүд та нар дээр даруй ирэх ёстой.

15 Ай тэрбээр та нарыг цоо хатгаж, та нарыг мэлмийнхээ ганц зэрвэс харцаар газарт унатал цохиж чадахаа тэрбээр үзүүлээсэй!

16 Ай тэрбээр та нарын энэ алдас мөн жигшүүрт хэргээс та нарыг ангижруулаасай. Мөн, ай та нар түүний зарлигуудын үгийг сонсож, мөн та нарын зүрх сэтгэлийн энэ бардамнал сүнсийг тань устгахыг бүү зөвшөөрөөсэй!

17 Ах дүүсээ өөрсөдтэйгөө адилаар бод, мөн тэд та нарын адил баян байж болохын тулд бүгдтэй нөхөрсөг, бас эд баялгаа хуваалцах өгөөмөр сэтгэлтэй бай.

18 Гэхдээ баялгуудыг эрэлхийлэхийнхээ өмнө, та нар Бурханы хаант улсыг эрэлхийлэгтүн.

19 Мөн та нар Христэд найдах найдварыг олсныхоо дараа хэрэв та нар баялгуудыг эрэлхийлэх аваас, та нар тэдгээрийг олох болно; мөн та нар тэдгээрийг сайныг үйлдэх зорилгын төлөө эрэлхийлэх болно—нүцгэнийг хувцаслахад, мөн өлссөнийг хооллоход, бас олзлогдсоныг чөлөөлөхөд, мөн өвдсөн бас зовсныг халамжлахад буюу.

20 Мөн эдүгээ, ах дүү нар минь, би та нарт бардамналын талаар ярьсан болой; мөн Бурханы та нарт өгсөн тэр зүйлсийн улмаас зүрхэндээ бардамналыг тээсэн учир хөршийгөө зовоож, мөн түүнийг хавчсан та нар үүнийхээ талаар юу хэлэх билээ?

21 Бүх маханбодыг бүтээсэн түүний хувьд ийм зүйлс нь жигшүүртэй хэмээн та нар бодохгүй байна уу? Мөн түүний хувьд нэг маханбод нь нөгөөгийн адил эрхэм болой. Мөн бүхий л маханбод тоосноос билээ; мөн тэд түүний зарлигуудыг сахиж мөн түүнийг үүрд алдаршуулбал зохино гэсэн нэгэн адил зорилгын учир тэдгээрийг тэрбээр бүтээсэн ажгуу.

22 Мөн эдүгээ би энэхүү бардамналын талаар та нарт ярихаа төгсгөл болгоё. Мөн та нарт би үүнээс илүү жигшим гэмт хэргийн талаар ярих ёстой байгаагүйсэн бол, миний зүрх сэтгэл та нарын учир үлэмж их баясахсан.

23 Гэвч та нарын илүү жигшим гэмт хэргүүдийн учир Бурханы үг намайг шаналгана. Учир нь болгоогтун, ийн Их Эзэн хэлэв: Энэ хүмүүс ёс бус байдалд нэмэгдэж эхэлжээ; тэд судруудыг ойлгодоггүй, учир нь Давид мөн түүний хүү Соломоны талаар бичигдсэн тэдгээр зүйлийн улмаас тэд шалиг завхайг үйлдэхдээ өөрсдийгөө зөвтгөхөөр эрэлхийлдэг бөлгөө.

24 Болгоогтун, Давид, Соломон хоёр үнэхээр олон эхнэр мөн татвар эмстэй байсан, энэ зүйл нь миний өмнө жигшүүртэй байсан болой хэмээн Их Эзэн хэлэв.

25 Иймийн тул, Их Эзэн ийн хэлэв, би өөртөө Иосефын хэвлийн үрээс зөв шударга мөчрийг өсгөж болохын тулд би өөрийн мутрын хүчээр энэ хүмүүсийг Иерусалим нутгаас удирдан гаргасан билээ.

26 Иймийн тул, Их Эзэн Бурхан бибээр энэ хүмүүс эрт цагийн тэдэнтэй адил үйлдэхийг зөвшөөрөхгүй.

27 Иймийн тул, ах дүүс минь, намайг сонсогтун, мөн Их Эзэний үгийг анхаарцгаа: Өөрөөр хэлбэл та нарын дунд хэн боловч нэгээс илүү эхнэртэй байж үл болно; мөн тэрбээр нэг ч татвар эмсийг авах ёсгүй;

28 Учир нь, Их Эзэн Бурхан би эмэгтэйчүүдийн ариун явдалд баясдаг билээ. Мөн завхайрал нь миний өмнө жигшүүрт хэрэг; тийн Түмний Их Эзэн хэлдэг бөлгөө.

29 Иймийн тул, энэ ард түмэн миний зарлигуудыг сахих болно, эсвээс уг нутаг тэдний улмаас зүхэгдэг хэмээн Түмний Их Эзэн хэлэв.

30 Учир нь хэрэв, Түмний Их Эзэн бибээр, өөртөө үр удмыг өсгөхийг хүсвэл, би өөрийн хүмүүст зарлиглах болно; өөрөөр бол тэд эдгээр зүйлийг анхааран сонсох болно хэмээн хэлэв.

31 Учир нь болгоогтун, Их Эзэн бибээр, Иерусалим нутагт, тийм ээ, мөн миний хүмүүсийн бүх нутагт, миний хүмүүсийн охид нь эр нөхрүүдийнхээ ёс бус болон жигшүүрт явдлуудын улмаас гашуудахыг сонсож, бас харамсахыг нь харсан билээ.

32 Мөн, Түмний Их Эзэн хэлрүүн, бибээр Иерусалим нутгаас удирдан гаргасан тэдгээр болох энэ хүмүүсийн үзэсгэлэнтэй охидын уйлаан, миний хүмүүсийн эрчүүдийн эсрэг над дээр ирэхийг би зөвшөөрөхгүй хэмээн Түмний Их Эзэн хэлэв.

33 Учир нь эмзэг зөөлнийх нь улмаас тэд миний хүмүүсийн охидыг олзлон авахгүй, тэгвэл би тэдэнд бүр устгалд хүргэх зовлонт зүхлээр айлчлах болно; учир нь тэд эрт цагийн тэдний адил садар самууныг үйлдэх ёсгүй хэмээн Түмний Их Эзэн хэлэв.

34 Мөн эдүгээ болгоогтун, ах дүүс минь, эдгээр зарлиг бидний эцэг Лихайд өгөгдсөнийг та нар мэднэ; иймийн тул, та нар тэдгээрийг урьд нь мэддэг байв; мөн та нар агуу буруутгалд унасан бөлгөө; учир нь та нар хийх нь зохисгүй эдгээр зүйлийг үйлдсэн бөлгөө.

35 Болгоогтун, та нар бидний ах дүүс болох леменчүүдээс илүүтэй алдсыг үйлдсэн бөлгөө. Та нар тэдний өмнөх өөрсдийн муу жишээнүүдийн учир эмзэг зөөлөн эхнэрүүдийнхээ зүрхийг эмтэлж, мөн хүүхдүүдийнхээ итгэлийг алдсан; мөн тэдний зүрхний мэгшилтүүд та нарын эсрэг Бурхан өөд дээш ирж байна. Мөн та нарын эсрэг доош ирэх Бурханы үгийн хатуу чандын учир олон зүрх гүнзгий шархнуудаас цоорч үхсэн билээ.