1 Мөн эдүгээ улиран тохиох дор хэдэн жил улиран одсоны дараа, Нифайн хүмүүсийн дунд Шерим хэмээн нэрлэгдсэн нэгэн хүн ирэв.

2 Мөнхүү улиран тохиох дор тэрээр ард түмний дунд номлож, мөн Христ гэж үгүй байх болно хэмээн тунхаглаж эхлэв. Мөн тэрээр хүмүүсийг зусардсан олон зүйл номлосон ажгуу; мөн Христийн сургаалыг устгаж болохын тулд тэр үүнийг хийсэн ажээ.

3 Мөн тэрээр ард түмний зүрх сэтгэлийг төөрөгдүүлж болохын тулд хичээнгүй хөдөлмөрлөсөн, үүнийхээ хэрээр тэр олон зүрх сэтгэлийг төөрөгдүүлсэн ажээ; мөн Иаков намайг, ирэх тэрхүү Христэд итгэлтэй гэдгийг мэдсэний учир, тэрээр над дээр ирэх боломжийг ихэд эрэлхийлж байв.

4 Мөн тэрээр эрдэмт нэгэн байснаас хүмүүний хэл ярианы төгс мэдлэгийг эзэмшсэн байв; иймийн тул, чөтгөрийн хүчний дагуу тэр ихээхэн зусардалтыг, мөн ярианы агуу чадварыг хэрэглэдэг байв.

5 Мөн тэрээр намайг шашнаас минь гуйвуулахаар найдаж байв, эдгээр зүйлийн талаар миний үзсэн олон зүйл мөн олон илчлэл байсан хэдий ч буюу; тодруулбал би үнэхээр тэнгэр элч нарыг харж, мөн тэд надад тохинуулж байсан билээ. Мөн түүнчлэн, Их Эзэний дуу хоолой цагаас цагт надад бодит үгээр ярихыг би сонссон байв; иймийн тул, би гуйвуулагдаж чадахааргүй байв.

6 Мөнхүү улиран тохиох дор тэрээр надад ирж, мөн ийм янзаар тэрээр надад ярьж, хэлсэн нь: Иаков ах аа, би тантай ярьж болох боломжийг ихэд эрэлхийлэв; учир нь та сайн мэдээ гэж нэрлэх тэрнийг буюу Христийн сургаалыг номлон, ихэд явдгийг тань би сонссон мөн түүнчлэн мэднэ.

7 Мөн та энэ хүмүүсийн олныг нь төөрөгдүүлснээс тэд Бурханы зөв замыг гажуудуулсан, мөн зөв зам болох Мосегийн хуулийг эс дагадаг; мөн Мосегийн хуулийг, одоогоос олон зуун жилийн дараа ирэх болно гэж таны хэлдэг тэр нэгэн биетийг бишрэн шүтэхэд зориулан өөрчилдөг. Мөн эдүгээ болгоогтун, Шерим би, энэ бол Бурханыг доромжилсон хэрэг гэдгийг танд тунхаглаж байна; учир нь нэг ч хүн ийм зүйлийн талаар мэдэхгүй; учир нь тохиох зүйлсийн талаар хүн хэлж чадахгүй. Мөн иймэрхүү маягаар Шерим миний эсрэг маргав.

8 Гэвч болгоогтун, Их Эзэн Бурхан өөрийн Сүнсийг миний бодгальд юүлж, үүний хэрээр би бүх үгэнд нь түүнийг мадалсан бөлгөө.

9 Мөн би түүнд хэлэв: Та ирэх Христийг үгүйсгэнэ үү? Мөн тэр хэлэв: Хэрэв Христ гэж байх аваас, би түүнийг үгүйсгэх нь үгүй; гэвч Христ байхгүй гэдгийг би мэднэ, мөн байсан нь ч үгүй, бас хэзээ ч байх нь үгүй.

10 Мөн би түүнд: Судруудад та итгэдэг үү? гэв. Мөн тэр, Тийм гэв.

11 Мөн би түүнд хэлэв: Тэгвэл та тэдгээрийг ойлгодоггүй юм байна; учир нь тэдгээр нь Христийг үнэхээр гэрчилдэг. Болгоогтун, энэхүү Христийн талаар өгүүлээгүй л бол, нэгээхэн ч бошиглогч бошиглосон нь эсвээс бичсэн нь үгүйг би танд хэлнэ.

12 Мөн үүгээр ч зогсохгүй—дараах нь надад үзүүлэгдсэн, учир нь би сонсож бас үзсэн; мөн дараах нь түүнчлэн надад Ариун Сүнсний хүчээр үзүүлэгдсэн болой; иймийн тул, хэрэв цагаатгал хийгдэхгүй аваас бүх хүн төрөлхтөн алдагдах ёстойг би мэднэ.

13 Мөнхүү улиран тохиох дор тэрээр надад хэлэв: Та маш ихийг дамжуулан мэдэх түүгээр, Ариун Сүнсний хүчээр надад тэмдэг үзүүлээч.

14 Мөн би түүнд хэлэв: Үнэн гэдгийг нь таны мэдэх зүйлд танд тэмдэг үзүүлэхийн тулд Бурханыг турших би хэн билээ? Гэсэн ч та үүнийг үгүйсгэнэ, яагаад гэвэл та чөтгөрийнх болой. Гэсэн хэдий ч, миний хүслээр болох нь үгүй; гэхдээ хэрэв Бурхан таныг цохивол, тэр нь түүний тэнгэрт мөн газарт хүчтэйг танд үзүүлэх тэмдэг болог; мөн түүнчлэн, тэр нь Христ ирэх болно гэсний тэмдэг болог. Мөн, ай Их Эзэн минь, минийх бус харин таны тааллаар хийгдэх болтугай.

15 Мөнхүү улиран тохиох дор Иаков би, эдгээр үгийг ярьсны дараа, Их Эзэний хүч түүн дээр ирж, үүний хэрээр тэр газарт унав. Мөнхүү улиран тохиох дор тэр олон өдрийн турш сувилуулсан бөлгөө.

16 Мөнхүү улиран тохиох дор тэрбээр хүмүүст: Маргааш нэгдэн цугларцгаа, учир нь би үхэх болно; иймийн тул, би үхэхээсээ өмнө хүмүүст ярихыг хүсэж байна хэмээв.

17 Мөнхүү улиран тохиох дор маргааш нь олон хүн нэгдэн цуглуулагдсан байв; мөн тэрээр тэдэнд тодорхой ярьж мөн тэдэнд өөрийн заасан зүйлсээ үгүйсгэв, мөн Христийг, мөн Ариун Сүнсний хүчийг, мөн тэнгэр элч нарын тохинууллыг тунхаглан зарлав.

18 Мөн тэрээр чөтгөрийн хүчээр мэхлэгдсэн байснаа тэдэнд тодорхой ярив. Мөн тэрээр тамын тухай, мөн үүрд мөнхийн тухай, мөн мөнхийн шийтгэлийн тухай ярьсан бөлгөө.

19 Мөн тэрээр хэлэв: би Бурханд худал хэлсний учир, уучлагдашгүй нүгэл үйлдлээ хэмээн айж байна би; учир нь би Христийг үгүйсгэж, мөн би судруудад итгэдэг хэмээн хэлсэн билээ; мөн тэдгээр нь үнэхээр түүнийг гэрчилдэг. Мөн би тийн Бурханд худлаа хэлсэн учир миний байдал аймшигтай байх болно хэмээн маш их айж байна; гэвч би Бурханд нүглээ хүлээж байгаа болой.

20 Мөнхүү улиран тохиох дор тэр тэдгээр үгийг хэлээд тэрээр өөр юу ч хэлж чадсангүй, мөн түүний сүнс орхин одов.

21 Мөн тэрээр бараг сүнс нь орхих гэж байхад эдгээр зүйлийг ярихыг олон түмэн гэрчлээд, тэд үлэмж ихээр гайхширсан байв; үүний хэрээр Бурханы хүч тэдэн дээр доошлон ирж, мөн тэд эзэгнэгдсэнээс газарт унасан болой.

22 Эдүгээ, энэ явдал нь Иаков надад тааламжтай байв, учир нь тэнгэр дэх Эцэгээсээ би үүнийг хүссэн юм; өөрөөр хэлбэл тэрээр миний гуйлтыг сонсож мөн миний залбиралд хариулсан бөлгөө.

23 Мөнхүү улиран тохиох дор амар амгалан болон Бурханы хайр ард түмний дунд дахин сэргээгдсэн байв; мөн тэд судруудыг судалж, мөн ёс бус энэ хүний үгсийг дахин анхаарсангүй.

24 Мөнхүү улиран тохиох дор леменчүүдийг үнэний мэдлэгт дахин оруулах болон сэргээхийн тулд олон арга сэдэгдсэн байлаа; гэвч энэ бүгд үр дүнгүй байв, учир нь тэд дайнуудад болон цус урсгахдаа баясдаг байв, мөн өөрсдийнх нь ах дүүс болох бидний эсрэг мөнхийн үзэн ядалтыг агуулдаг байв. Мөн тэд зэвсгийнхээ хүчээр биднийг устгахыг үргэлж эрэлхийлж байв.

25 Иймийн тул, Нифайн ард түмэн өөрсдийн Бурханд болон авралын хаданд итгэж, мөн өөрсдийн зэр зэвсэг, мөн өөрсдийн бүх хүч чадлаар тэдний эсрэг бэхлэн хамгаалсан билээ; иймийн тул, тэд дайснуудаа ялан дийлэгсэд хэвээр байсан бөлгөө.

26 Мөнхүү улиран тохиох дор Иаков би өтөлж эхлэв; мөн энэ хүмүүсийн цэдэг Нифайн бусад ялтас дээр хадгалагдсан учир, иймийн тул, өөрт буй мэдлэгийн дагуу бичиглэснээ тунхагласнаар би энэхүү цэдгийг дуусгая, бид ганцаардмал мөн нухацтай хүмүүс, бэдрэгчид, Иерусалимаас хөөгдсөн, аглаг буйдад зовлон дунд төрсөн, түүнчлэн дайн тэмцлийг өдөөсөн үзэн ядалтаар ах дүүсээрээ үзэн ядагдаж байсан учир; иймийн тул, бид өөрсдийн өдрүүдээ гашуудалд өнгөрөөн, цаг хугацаа бидэнтэй хамт улиран одож, мөн түүнчлэн бидний амьдрал зүүдэнд байсан мэт улиран оджээ хэмээн хэлснээр дуусгая.

27 Мөн Иаков би, булшиндаа удахгүй доош орох ёстойгоо ойлгов; иймийн тул, би хүү Иностоо хэлэв: Энэ ялтаснуудыг авагтун. Мөн миний ах Нифайн надад зарлигласан зүйлийг би түүнд хэлсэн бөлгөө, мөн тэрээр зарлигуудад дуулгавартай байхаа амласан болой. Мөн би багахныг бичиглэсэн буй эдгээр ялтас дээрх бичиглэлээ төгсгөл болгоё; мөн ах дүүсийн маань олон нь миний үгсийг унших болов уу гэж найдан, уншигчтай би салах ёс гүйцэтгэе. Ах дүүс минь, Бурхан та нартай хамт байг.