1 Ket ita, kitaen, kakabsatko, sipud idi imbagak kadakayo a mangipadtoak, kitaen, daytoy ti padtok—a dagiti bambanag nga insao daytoy a propeta a Zenos, a maipanggep iti balay ti Israel, nga inyarigna ida iti napatanor a kayo ti olibo, sigurado a nasken a mapasamakto.

2 Ket iti aldaw nga isagsaganana a rugian manen iti maikadua a gundaway a mangpasubli kadagiti taona, isunto ti aldaw, wen, isunton ti maudi a gundaway, a sumurotto dagiti katulongan ti Apo iti bilegna, a mangtaraon ken mangarbas iti bangkagna; ket kalpasan dayta umayto iti mabiit ti panungpalan.

3 Ket anian ti pannakabendision unay dagiti nagtrabaho a sipapasnek iti bangkagna; ken anian ti pannakailunod dagiti maipuruakto iti lugar a naituding kadakuada! Ket mapuoranto ti lubong.

4 Ket anian ti kinamanangngaasi ti Dios kadatayo, agsipud ta laglagipenna ti balay ti Israel, dagiti ramut ken dagiti sanga; ket un-unnatenna dagiti imana kadakuada iti agmalem; ket nasukirda ken mannuppiatda a tattao; ngem kas iti kaadunto dagiti saan a mangpatangken kadagiti pusoda ti maisalakanto iti pagarian ti Dios.

5 Gapuna, patpatgek a kakabsatko, dawatek kadakayo a sipaparbeng a nasken nga agbabawikayo, ket umasidegkayo a sipupudno iti amin a pusoyo, ket kumpetkayo iti Dios a kas iti ikakapetna kadakayo. Ket bayat ti pannakayunnat ti naasi a takiagna kadakayo iti lawag ti aldaw, saanyo koma patangkenen dagiti pusoyo.

6 Wen, ita nga aldaw, no mangngegyo ti timekna, saanyo a patangkenen dagiti pusoyo; ta apay koma a mataykayo?

7 Ta kitaen, kalpasan a nataraonankayon babaen iti napintas a balikas ti Dios iti agmalem, mangtedkayonto kadi iti dakes a bunga, ta nasken a mapukankayo ken maipuruak iti apuy?

8 Kitaen, ilaksidyo kadi dagitoy a balikas? Ilaksidyo kadi ti balbalikas dagiti propeta; ken ilaksidyo kadi amin a balikas a nasaon maipanggep ken ni Cristo, kalpasan ti adu a nagsaon maipanggep kenkuana; ket ilibakyo dagiti naimbag a balikas ni Cristo, ken ti bileg ti Dios, ken ti sagut ti Espiritu Santo, ket lapdanyo ti Nasantuan nga Espiritu, ket laisenyo kadi ti naindaklan a plano ti pannakasubbot, a naaramiden para kadakayo?

9 Saanyo kadi ammo a no aramidenyo dagitoy a bambanag, a ti bileg ti pannubbot ken panagungar, nga adda ken ni Cristo, iturongnakayto nga agtakder nga addaan bain ken nakaam-ames a basol iti sango ti pangukoman ti Dios?

10 Ken mayannurot iti bileg ti linteg, ta saan a mailibak ti linteg, nasken a mapankayto iti dayta a dan-aw ti apuy ken asupre, a saan a masebseban ti gil-ayabna, ket agnanayonto nga agpangato ti asukna, ti dan-aw ti apuy ken asupre nga isu ti awan patinggana a panagtutuok.

11 O ngarud, patpatgek a kakabsatko, agbabawikayo, ket sumrekkayo iti nailet a ruangan, ket ituloyyo ti magna iti dalan nga akikid, agingga a magun-odyo ti agnanayon a biag.

12 O agmasiribkayo; ania pay ti mabalinko nga ibaga?

13 Kamaudiananna, agpakadaakon, agingga nga agkikitatayto iti makaay-ayo a pangukoman ti Dios, pangukoman a mangaring iti panunot ti dakes iti nakaam-ames nga amak ken buteng. Amen.