1 Ug karon nahitabo human milabay ang pipila ka tuig, adunay tawo nga miabot taliwala sa katawhan ni Nephi, nga ang ngalan si Sherem.

2 Ug nahitabo nga nagsugod siya sa pagsangyaw sa taliwala sa katawhan, ug namahayag kanila nga gayod walay Kristo. Ug nagsangyaw siya og daghang butang nga makabayaw sa garbo sa katawhan; ug iya kining gibuhat sa pagdaot sa doktrina ni Kristo.

3 Ug makugihon siyang naghago sa paglingla sa kasingkasing sa katawhan, hinungdan nga nalingla niya ang daghang kasingkasing; ug kay nasayod man siya nga ako, si Jacob, adunay pagtuo kang Kristo kinsa moabot, nangita siya og daghang kahigayonan nga magkaatubangay kami.

4 Ug makinaadmanon siya, nga siya adunay hingpit nga kahibalo sa pinulongan sa katawhan; busa, migamit siya og daghan nga pag-ulog-ulog, ug makusganong gahom sa pakigpulong, subay sa gahom sa yawa.

5 Ug naglaom siya nga iya akong matay-og gikan sa akong gituohan, bisan pa sa daghang mga pagpadayag ug sa daghang butang nga akong nakita mahitungod niining mga butanga; kay sa pagkatinuod nakakita ako og mga anghel, ug nangalagad sila kanako. Ug usab, nakadungog ako sa tingog sa Ginoo nga namulong kanako sa mao gayod nga pulong, matag karon ug unya; busa, dili ako matarog.

6 Ug nahitabo nga miduol siya kanako, ug sa ingon niini nga paagi siya misulti kanako, nag-ingon: Igsoong Jacob, nangita ko og daghang higayon aron makigsulti kanimo; kay nakadungog ko ug nasayod usab nga daghan kaayo ka og giadtoan, nagsangyaw sa gitawag nimo nga ang ebanghelyo, o doktrina ni Kristo.

7 Ug gilingla nimo ang daghan niining katawhan nga gituis nila ang matarong nga paagi sa Dios, ug wala magtuman sa balaod ni Moises nga mao ang sakto nga paagi; ug giusab ang balaod ni Moises ngadto sa pagsimba sa usa ka binuhat nga imong giingon nga moabot sa daghang gatosan ka tuig gikan karon. Ug karon tan-awa, ako, si Sherem, mopahayag kanimo nga kini usa ka pagpanamastamas; kay walay tawo nga nasayod sa ingon nianang mga butanga; kay siya dili makasulti sa mga butang nga umaabot. Ug sa ingon niini nga paagi nakiglantugi si Sherem kanako.

8 Apan tan-awa, ang Ginoong Dios mibu-bo sa iyang Espiritu ngari sa akong kalag, hangtod nga nalupig nako siya sa tanan niyang mga pulong.

9 Ug gisultihan nako siya: Ilimod ba nimo ang Kristo kinsa moabot? Ug miingon siya: Kon aduna may Kristo, dili nako siya ilimod; apan nasayod ko nga walay Kristo, sukad sa una, gani bisan kanus-a.

10 Ug gisultihan nako siya: Motuo ka ba sa mga kasulatan? Ug siya miingon, Oo.

11 Ug gisultihan nako siya: Nan wala diay ikaw makasabot niini; kay kini sa pagkatinuod nagpamatuod kang Kristo. Tan-awa, sultihan ko ikaw nga walay usa sa mga propeta nga nagsulat, ni nanagna, gawas kon sila namulong mahitungod kang Kristo.

12 Ug dili pa kini mao ang tanan—gipakita kini kanako, kay nakadungog ko ug nakakita; ug kini usab gikapakita kanako pinaagi sa gahom sa Espiritu Santo; busa, nasayod ako nga kon walay pag-ula nga himoon ang tanang katawhan mawala gayod.

13 Ug nahitabo nga miingon siya kanako: Pakit-a ko og timailhan pinaagi niini nga gahom sa Espiritu Santo, diin daghan ka og nasayran.

14 Ug gisultihan nako siya: Kinsa ba ako nga motintal sa Dios aron mopakita kanimo og timailhan sa butang nga nahibaloan na nimong tinuod? Apan ilimod nimo kini, kay ikaw iya sa yawa. Bisan pa niana, dili ang akong kabubut-on ang matuman; apan kon ang Dios mosilot kanimo, himoa nga kana usa ka timailhan kanimo nga siya adunay gahom, sa langit ug sa yuta; ug usab, nga si Kristo moabot. Ug ang imong kabubut-on, O Ginoo, maoy matuman, ug dili ang ako.

15 Ug nahitabo nga sa dihang ako, si Jacob, nakapamulong na niini, ang gahom sa Ginoo miabot kaniya, hangtod nga natumba siya sa yuta. Ug nahitabo nga gialimahan siya sulod sa daghang mga adlaw.

16 Ug nahitabo nga miingon siya sa katawhan: Pagpundok kamo ugma, kay ako mamatay na; busa, nagtinguha ako nga makapamulong sa katawhan sa dili pa ako mamatay.

17 Ug nahitabo nga sa pagkaugma ang katawhan nagpundok; ug namulong siya sa yano ngadto kanila ug gibakwi ang mga butang nga iyang gipangtudlo kanila, ug gipamatuod ang Kristo, ug ang gahom sa Espiritu Santo, ug ang pagpangalagad sa mga anghel.

18 Ug namulong siya sa yano ngadto kanila, nga gilimbongan siya sa gahom sa yawa. Ug namulong siya mahitungod sa impyerno, ug sa kahangtoran, ug sa silot nga walay kataposan.

19 Ug miingon siya: Nahadlok ako basin og nakasala ko sa dili mapasaylo nga sala, kay ako nakapamakak sa Dios; kay gilimod nako ang Kristo, ug miingon nga mituo ko sa mga kasulatan; ug kini sa pagkatinuod nagpamatuod kaniya. Ug tungod kay nakapamakak ko sa Dios dako ang ang kahadlok basin pa unya og ang akong kahimtang mahimong makalilisang; apan ako mokompisal sa Dios.

20 Ug nahitabo nga sa dihang nasulti na niya kining mga pulonga dili na siya makasulti, ug mibiya ang iyang espritu.

21 Ug sa diha nga ang pundok sa katawhan nakasaksi nga siya misulti niing mga butanga sa hapit na mobiya ang iyang kalag, natingala sila sa hilabihan; nga sa ingon niana ang gahom sa Dios mikunsad kanila, ug gidaog sila nga nangatumba sila sa yuta.

22 Karon, kining butanga nakapahimuot kanako, si Jacob, kay gihangyo ko man kini sa akong Amahan nga anaa sa langit; kay gidungog niya ang akong pangamuyo ug gitubag ang akong pag-ampo.

23 Ug nahitabo nga ang kalinaw ug ang gugma sa Dios nabalik na usab sa katawhan; ug nagsiksik sila sa mga kasulatan, ug wala na mopatalinghog sa mga pulong niining tawo nga daotan.

24 Ug nahitabo nga daghang paagi ang gihimo aron mabawi ug mapahiuli ang mga Lamanita ngadto sa kahibalo sa kamatuoran; apan nakawang ra kining tanan, kay maoy ilang kahimuot ang mga gubat ug pagpaagas sa dugo, ug anaa kanila ang walay kataposang pagdumot batok kanamo, nga ilang kaigsoonan. Ug pinaagi sa gahom sa ilang mga hinagiban nagtinguha sila sa padayon nga paglaglag kanamo.

25 Busa, ang katawhan ni Nephi nagpalig-on batok kanila pinaagi sa ilang mga hinagiban, ug sa tibuok nilang kusog, misalig sa Dios ug bato sa ilang kaluwasan; busa, nahimo gihapon silang mga mananaog sa ilang mga kaaway.

26 Ug nahitabo nga ako, si Jacob, nagkatigulang na; ug ang talaan sa kasaysayan niini nga katawhan gitipigan nganha sa ubang mga palid ni Nephi, busa, ako motapos niini nga talaan, magpahayag nga akong gisulat kutob sa akong nahibaloan, pinaagi sa pag-ingon nga ang panahon milabay dungan kanamo, ug usab ang among kinabuhi milabay nga para kanamo sama sa usa ka damgo, kami nga nag-inusara ug maligdong nga katawhan, mga laag, gisalikway gikan sa Jerusalem, natawo sa kalisdanan, sa kamingawan, ug gidumtan sa among kaigsoonan, nga maoy hinungdan sa mga gubat ug mga panagbingkil; busa, nagbangotan kami sa among mga adlaw.

27 Ug ako, si Jacob, nakakita nga sa dili madugay moadto na ako sa akong lubnganan; busa, akong gisultihan ang akong anak nga si Enos: Kuhaa kini nga mga palid. Ug gisultihan nako siya sa mga butang nga gisugo kanako sa akong igsoon nga si Nephi, ug misaad siya nga mosunod sa mga sugo. Ug gitapos nako ang akong pagsulat niini nga mga palid, diin diyotay ra ang mga sinulat; ug ngadto sa magbabasa manamilit ako, manghinaot nga daghan sa akong kaigsoonan ang mobasa unta sa akong mga pulong. Kaigsoonan, adios.