Bix Chicpahic
U Libroil Mormon
Jose Smitheʼ le maʼx oʼolal hók tiʼ sásil u Libroil Mormonoʼ tu yoʼolal u sibal yétel u páhtalil Hahal Dios yétel sutaab le tʼanoʼob ich ingles le úchben dzíbaʼ kahólaʼan bey, letiʼ le Jose Smithoʼ tu láh tsolah hach heʼebix úchaʼanileʼ. Tu yaʼalaheʼ tu yákabil veintiʼuno tiʼ u mesil septiʼembre tiʼ u haʼabil 1823, tán u kátiʼc tiʼ Yumtsil ichil oracion yétel tulácal u yól tiʼ u pucsiʼkaleʼ. Lelaʼ letiʼ le baʼax cu yaʼalic Jose Smithaʼ:
“Hach le tán in kátiʼc tiʼ Diosoʼ, ca tiʼn wilah u chícpahal humpʼél sásil teʼ ichnah tuʼux yaneʼnoʼ, yétel ca hoʼopʼ u hach sásiltal tac cah pʼaʼat hach táh sásil tiʼ u sasílil tán chúmuc kin; tu séblaquiʼl cah chicpah tánil ten huntúl maʼc tu tsél in camaʼ chén tiʼ ik wáʼalacbal tumen u yoqueʼ maʼ tán u pechʼahtiʼc luʼum.
“U búquiʼntmaʼh humpʼél chowác nok hach sén sac. Hach maʼs sac saquiʼl tiʼ tulácal baʼal wáy yókolcabeʼ mix huntén in wilmaʼh; in tucultiʼc xaneʼ minaʼan ulak baʼal yókolcabeʼ cu páhtal u betuba heʼebix u lémbal yétel u saquiʼl. U kaboʼobeʼ maʼ u pixmaʼhiʼ beyxann u muk u kaboʼob humpʼít maʼs caʼanalil tiʼ u cal u kab; bey xan maʼ u pixmaʼhiʼ u yocoʼob, bey heʼebix xan u muk u yocoʼob, humpʼít maʼs caʼanalil tu tuk u yoqueʼ. Bey xan u pol maʼ pixmaʼhiʼ mix u cal. Le betiʼqueʼ háchah in wiliqueʼ minaʼan ulak nok tu yókol, chén le chowác nokoʼ, tumen tiʼ heʼekab anil u nok cu páhtal in wilic u tsem. Maʼ chén u chowác nok hach sac heʼebixoʼ baʼaleʼ tac xan u wínclil maʼs cu lémbal tiʼ cu páhtal u tsoʼololoʼ yétel u yicheʼ bey u lémbal cháqueʼ. Ichil le nah tuʼux yaneʼnoʼ hach sásilchahiʼ, baʼaleʼ maʼ yétel le sásil yan tu baʼpach u wíncliloʼ. Le ca tiʼn yáx ilaheʼ sahacchaheʼn, baʼaleʼ hach séb lukic in sahaquiʼl.
“Ca tu tʼanaheʼn tiʼn kabaʼeʼ. Ca tu yaʼalah teneʼ letiʼ huntúl mensajero túxtaan actán tiʼ Hahal Dios, yételeʼ Moroni bin u kabaʼoʼ. Ca tu yaʼalah de que Hahal Dioseʼ yan tiʼ humpʼél meyah intiʼaʼal ten yételeʼ ichil tulácal maʼc, wét luʼumiloʼob yétel tʼanoʼobeʼ bin chʼaʼabac in kabaʼ utiaʼal uts yétel kas, wá u kát yaʼaleʼ bin úchuc tʼan maʼalob wá kas tiʼn woʼolal ichil tulácal le cahoʼ.
“Tu yaʼalaheʼ yan bin humpʼél libro dzíbaʼan tiʼ laminaoʼob de oro. Lelaʼ cu yeʼesic bix heʼel u páhtal u tsoʼolol tiʼ u cahnaliloʼob le luʼum wáyaʼ heʼebix xan chuʼumpahic u talbaloʼoboʼ. Tu yaʼalah xaneʼ tiʼ letiʼ yan u chucaʼaniʼl le evangelio minaʼan u xuloʼ heʼebix u yaʼalmaʼhil Cristo tiʼ le úchben cahnaloʼoboʼ.
“Tu yaʼalah xaneʼ, dzaʼan tiʼ le laminaoʼoboʼ caʼapʼél tunich wol formaʼrtaan yétel plata, le heʼeloʼobaʼ taacaʼan maʼalob tiʼ humpʼél baʼal utiaʼal u tsemeʼ, cu kabaʼtiʼc Urim yétel Tumim; le maʼx yan tiʼ, yétel cu meyah yétel le tunichoʼobaʼ letiʼ betiʼc u yoheltiʼc maʼcoʼob tiʼ le kinoʼoboʼ wá le anchahoʼob maʼiliʼ le ulak maʼcoʼoboʼ; yételeʼ Dios preparartiʼc utiaʼal u traducirtaal tiʼ yanal tʼan le librooʼ.”
· · · · · · ·
“Ulák baʼaxeʼ tu yaʼalah teneʼ, le quen in kam le laminaoʼob dzoʼoc u yaʼalic tenoʼ — tumen maʼ kuchuc tu kinil u kuʼubul teniʼ — maʼ debe ser ca eʼesaʼac tiʼ mixmaʼquiʼ; mix le baʼal utiaʼal tsemoʼ yétel le Urimoʼ beyxann le Tumimoʼ, baʼaleʼ chén tiʼ le maʼxoʼob cun aʼalbil ten in weʼes tiʼoʼobeʼ. Wá quiʼn weʼesiqueʼ, quiʼn xuʼulsaʼal. Caʼaliquiʼl tán u tʼan tiʼn wétel tu yoʼolal le laminaoʼoboʼ, h tal tiʼn tucul le visionoʼ, ca tiʼn wilah le cúchil tuʼux dzaʼanoʼoboʼ; tiʼ hach sásilil tiʼn wilahileʼ, tiʼn kahóltah cah kuchén yicnal.
“Le cah dzoʼoc u dzaʼabal in wohélt leloʼ, ca tiʼn wilaheʼ le sásil yan teʼ ich nah tuʼux yaneʼnoʼ tán u cáhal u múchʼquiʼntiʼcuba tu baʼpach le maʼcoʼ, sám hoʼopʼoʼc u tʼan tiʼn wétel; bey tʼanahiʼcoʼ, cah pʼát eʼhochʼeʼen teʼ ich nah tu caʼaténoʼ, baʼaleʼ hach tu baʼpach letiʼeʼ maʼ. Ca tiʼn wilaheʼ cah heʼekabpahiʼ, bey humpʼél beh cu bin toh caʼaneʼ. Letiʼ, le angeloʼ, ca hoʼopʼ u bin u naʼacal tac láh pʼátal le ich nahoʼ. Cah pʼát heʼebixiʼliʼ yaniʼl antes chícpahac le caʼanil sásiloʼ.
“Cah pʼáten tán in hach tucultiʼc yoʼolal le yaʼabach heʼlaʼanil le baʼax dzoʼoc in wilicoʼ, yétel hach sén hakaʼan in wól tu yoʼolal baʼax tu yaʼalah ten. Caʼaliquiʼl tán in tucultiʼc, tiʼn wilah le ich nah tuʼux yaneʼnoʼ caʼa cáhs u sástal tu caʼatén, yétel bey hach ichil hun sútuquiʼl, le angeloʼ cah chícpah tu tsél in camaʼ tu caʼatén.
“Ca tu caʼa aʼalah ten le baʼaxoʼob tu yáx aʼalah tenoʼ ca yáx tal tiʼn wicnaloʼ, hach mix humpʼít heʼlaʼan; cu dzoʼocol tún leloʼ ca tu tsolah ten nucuch baʼaloʼob bín talac tu yókolcab yétel u xuʼulsaʼal tumen wiʼihil, maʼscab, yétel kohaʼanil. Tu yaʼalah xan le nucuch yayah baʼaloʼobaʼ yan u tal yókolcab tiʼ le u cahnaliloʼob yan behlaʼaʼ. Cu dzoʼocol u caʼa aʼalic ten le baʼaloʼobaʼ cah bin caʼanal tu caʼatén heʼebix tu mentah yáxeʼ.
“Tiʼ tún leloʼ hach nucuch tuculoʼob yétel hach tam yan tiʼn tucul. Cah bin in wenel; cah pʼáten chén chilicbalen hakaʼan in wól tu yoʼolal le baʼaxoʼob dzoʼoc in wílicoʼ yétel dzoʼoc in wuʼuyicoʼ. Baʼaleʼ bucaʼah úchic u sén haʼakal in wól ca tiʼn caʼa ilah le angel tu tsel in camaʼoʼ yétel ca tiʼn wuʼuyah u caʼa aʼalic ten le baʼaxoʼob tu yaʼalah ten yáxeʼ. Ulak baʼax tu yaʼalaheʼ: Sátanaseʼ yan u yil u bisiquen (tu yoʼolal hach ótsil u familia in tataoʼ) ca in chaʼ le laminaoʼoboʼ utiaʼal ca ayikalchaquen. Tu wetʼah ten lelaʼ, ca xan tu yaʼalaheʼ, le quen in chʼaʼ le laminaoʼoboʼ maʼ debe ser in tucultiʼc u yanal baʼal wá chén u tiaʼal in meyahtiʼc Hahal Dioseʼ; yétel xaneʼ maʼ debe ser ca betaac in betiʼc ulak wá baʼaxiʼ, baʼaleʼ chén in betiʼc u reino. Wá maʼeʼ, maʼ bín in chʼaiʼ.
“Cu dzoʼocol le óxtén u tal u xímbaltenaʼ cah naʼac caʼan tu caʼatén heʼebix yáxileʼ, ca tún h pʼáten tucul tu caʼatén, tán in hach tucultiʼc le baʼax dzoʼoc u yúchul tenaʼ; hach tán u naʼacal le angel tu yóxténoʼ cah kaynah h tʼel, ca tún tiʼn wilaheʼ sáschahiʼ; le betiʼc túneʼ c tsicbaloʼ maʼn bul ákab.
“Humpʼít maʼseʼ cah líken tiʼn camaʼ, yétel heʼebix suquiʼleʼ, cah binen in ment le meyahoʼob kabét in betiʼc tiʼ le kinoʼ; baʼaleʼ le ca tiʼn wóltah meyah heʼebix suquiʼleʼ, ca tiʼn wuʼuyaheʼ minaʼan mix humpʼít in muk umpuliʼ. Tiʼn wuʼuyaheʼ maʼ tu páhtal in meyah. In tata, nadz tiʼ ten tun meyaheʼ, tu yilah le baʼax cu yúchul teneʼ, ca tu yaʼalah ten ca sunaquen tanah. Cah luken teʼeloʼ, tán in tucultiʼc in bin tanah, baʼaleʼ le ca tiʼn wóltah maʼn yókol le cot tuʼux yanoʼon utiaʼal in hókbaleʼ, hach pʼáten minaʼan in muk. Cah lúben luʼumeʼ bey quiʼmeneneʼ, ichil dzeʼedzec sútuqueʼ maʼ tiʼn wohéltah mixbaʼaliʼ.
“Yáx baʼax h páhchah u kaʼahal teneʼ chén humpʼél tʼan, tán u tʼaniquen tiʼn kabaʼ. Ca tiʼn liksah in wicheʼ ca tiʼn wilah le angeloʼ tu yókol in pol, baʼpachtaan tumen humpʼél sásil heʼebix in yáx ilmaʼhileʼ. Ca tún tu caʼa tsolah ten tulácal le baʼaxoʼob tu yaʼalah ten okneaqueʼ. Ca tu yaʼalah teneʼ ca xiʼiquen tu yicnal in tataeʼ yétel ca in wáʼal tiʼ tu yoʼolal le vision yétel le tʼanoʼob dzoʼoc in kamicoʼ.
Tiʼn betah heʼebix u yaʼalicoʼ. Cah sunaheʼn tuʼux yan in tata teʼ kaxoʼ, yétel ca tiʼn láh tsolah tiʼ. Ca tu yaʼalah teneʼ tiʼ Hahal Dios u tal, yétel tu yaʼalah ten xaneʼ ca xiʼiqueneʼ ca in bet heʼebix tu yaʼalah ten le angeloʼ. Cah luken tiʼ káxoʼ. Cah binen teʼ cúchil tuʼux tu yaʼalah ten le angel dzaʼan le laminaoʼoboʼ; yétel tu yoʼolal hach sásilil le vision tiʼn wilah tuʼux dzaʼan le laminaoʼoboʼ, le cah kuchéniʼ, tiʼn kahóltah.
“Nadz tiʼ u cahtalil Mancheʼster tiʼ u nohoch cahil Ontario tu estadoil Nueva Yorkeʼ, yan humpʼél mul chan nohoch, letiʼ u maʼs caʼanalil tiʼ le estadooʼ. Tu lakin le muloʼ, maʼ hach nách tiʼ u maʼs caʼanaliloʼ, yánal humpʼél tunich chan nohocheʼ tiʼ yan le laminaoʼoboʼ, dzaʼan yanal tiʼ humpʼél tunich. Teʼ hach tu chúmuc, teʼ tu caʼanaliloʼ, le tunichaʼ pim yétel wolis baʼaleʼ maʼs chan hahaytac tu xul u chowáquiʼl; le betiʼqueʼ cu páhtal u yilaʼal u parte maʼ muchʼaʼaniʼ, u hál chiʼoʼobeʼ pixil yétel luʼum.
“Le cah dzoʼoc in lúksic le luʼumoʼ, tiʼn caxtah humpʼél cheʼeʼ. Ca tiʼn wilah bix in líksic yánal u hal chiʼeʼ, ca tiʼn chanbel líksah. Cah pacatnaheʼn ichil le tunichoʼ yétel ca tiʼn wilaheʼ tu hahil tiʼ yan le laminaoʼoboʼ, Urim yétel Tumim yétel le tsemiloʼ, heʼebix u yaʼalmaʼhil le angeloʼ. Le hól tuʼux dzabaʼanoʼ, tunich mentaanil tiʼ tsolaʼan teʼ tu yit le tunichoʼ. Tiʼ dzaʼan caʼapʼél tunichiʼ tu yókol tún leloʼobaʼ tiʼ tsolaʼan le laminaoʼoboʼ yétel ulak baʼaxoʼob yanoʼob.
“Tiʼn wóltah in hókseʼ, baʼaleʼ tu wetʼah ten le angeloʼ, ca tún caʼa aʼalaʼab teneʼ maʼ bin kuchuc tu kinil in hóksiquiʼ, maʼ xan tán u kuchul sino le quen maʼnac cuatro haʼab. Cu cáhal u xoquiʼl tiʼ le kin behlaʼaʼ, baʼaleʼ tu yaʼalah teneʼ yan in caʼa bin teʼeloʼ cada haʼab utiaʼal u tsicbal tiʼn wételiʼ; yételeʼ bey quen in betiʼloʼ tac quen u kuch u kinil utiaʼal u kuʼubul ten le laminaoʼoboʼ.
“Heʼebix aʼalaʼabic teneʼ, bey tiʼn mentahil. Cada haʼabeʼ quiʼn bin teʼeloʼ tiʼ quiʼn wilic le angeloʼ. Tiʼ cada humpʼél u ténel c ilicbaeʼ quiʼn kamic u tsolbil tʼan yétel in kahóltiʼc tiʼ baʼaxoʼob quen u bet Yumtsil yétel bix debe ser u bisaʼal u reino tu dzoʼoc kinoʼob.”
· · · · · · ·
“Ca tún h kuch u kinil u kuʼubul ten le laminaoʼoboʼ, Urim yétel Tumim, yétel le tsemiloʼ. Tu kinil veintiʼdos tiʼ u mesil septiʼembre tiʼ u haʼabil 1827, bihaʼanilen tu dzoʼoc ulak haʼab heʼebix suquiʼleʼ teʼ tuʼux dzaʼanoʼ, letiʼ le angeleʼ tu kubah tiʼ ten, tán u yaʼalic ten beyaʼ: Letiʼoʼob bín in cuch; wá bin quiʼn chaʼic u saʼataloʼob tu yoʼolal tumen maʼ tán in canántiʼc tu bel, quiʼn xuʼulsaʼal; baʼaleʼ wá bin in dza in wól utiaʼal in calánt tac le quen tac le angel u chʼaʼoʼ cu canántaal tún.
“Séb úchic in wohéltiʼc baʼax oʼolal tiʼn kamaʼh u hach tʼanil ca in calánte yétel baʼax oʼolal tu yaʼalah ten le angeloʼ le quen bin dzoʼococ baʼax kabét in betiʼqueʼ letiʼ cun h tal u chʼaʼeʼ. Tumen le cah ohéltaab tiʼ ten yaneʼ ca hoʼopʼ u yilaʼal bix únchac u luksaʼal ten. H betaab tulácal baʼaxoʼob úchac u tucultaal tu yoʼolal u chʼaʼabal tiʼ ten. In chʼaʼapachtaaleʼ maʼs yahchahiʼ yétel hach maʼs yayah, maʼ bey caʼachoʼ, yételeʼ yaʼabach maʼcoʼob maʼntadz cu maʼnoʼob u chʼuctoʼob tu yoʼolal u yilicoʼob u luksicoʼob ten wá cu páhtaleʼ. Baʼaleʼ yoʼolal u naʼatiʼl Hahal Dioseʼ cah pʼát taacaʼan tiʼn kab tac ca tiʼn dzoʼocsah le baʼax aʼalaʼan teneʼ. Le cah kuch le angel u chʼaʼoʼ, heʼebix aʼalaʼaniloʼ, ca tiʼn kubah tiʼ. Letiʼ u chʼaʼamaʼhil tac behlaʼeʼ, u caʼapʼél kin tiʼ u mesil maʼyo tiʼ u haʼabil 1838.”
· · · · · · ·
Le úchben tsicbaloʼ, bey caxtaan ich luʼumaʼ, cah sutaab ich tʼanoʼob teʼ kinoʼob yaniʼloʼonaʼ tu yoʼolal u bendicion yétel u páhtalil Hahal Dios bey tu yaʼalil Hahal Dios de que hach hahoʼ. Cah publicartaab teʼ yokolcabaʼ tu haʼabil 1830 bey U Libroil Mormon.