Te Buka a Moromona

1 ’E i teienei, tē pāpa’i nei au, ’o Moromona, i te hō’ē pāpa’a parau nō te mau mea tā’u i ’ite ’e tā’u ato’a ho’i i fa’aro’o, ’e tē ma’iri nei au i tō te reira i’oa te Buka a Moromona.

2 ’E i te taime i huna ai Amarona i te mau pāpa’a parau i te Fatu ra, ’ua haere mai ra ’oia iā’u nei, (’ua fātata tō’u matahiti i te hō’ē ’ahuru ’e ’ua ha’amata vau i te ha’api’ihia ’ia au i te ’ite o tō’u ra mau ta’ata) ’e ’ua nā ’ō mai ra Amarona iā’u : ’Ua ’ite au ē, e tamari’i ha’apa’o maita’i ’oe ’e te ’oi’oi i te ’ite.

3 Nō reira, ’ia tae tō ’oe ra matahiti i te piti ’ahuru ’e ma maha, ’ua hina’aro vau ia ’oe ’ia ha’amana’o i te mau mea tā ’oe i ha’api’i mai nō ni’a i teie nei feiā ; ’e ’ia taeahia tō ’oe matahiti, ’a haere atu i te fenua ra nō Anituma, ē tae roa atu i te hō’ē ’āivi i parauhia ’o Sima ; ’e i reira tō’u vaiihora’a atu i te Fatu i te mau ’ō’otira’a mo’a ato’a nō ni’a i teie nei feiā.

4 ’E inaha, e rave atu ’oe i te mau ’api a Nephi ia ’oe ra, ’e te toe’a ra e vaiiho noa ïa ’oe i tō rātou iho vāhi ; ’e e ’ō’oti ’oe i te mau mea ato’a tā ’oe i ha’api’i mai nō ni’a i teie nei feiā i ni’a i te mau ’api a Nephi.

5 ’E ’o vau nei, ’o Moromona, e hua’ai au nō Nephi, (’e te i’oa o tō’u ra metua tāne ’o Moromona ato’a ïa) ’e ’ua ha’amana’o vau i te mau mea tā Amarona i fa’aue mai iā’u.

6 ’E i muri a’era, ’ia tae a’era tō’u matahiti i te ’ahuru ’e ma hō’ē, ’ua hōpoihia atu ra vau e tō’u metua tāne i te fenua i te pae apato’a, ’oia i te fenua nō Zarahemela ra.

7 ’Ua ’ī te fenua tā’āto’a i te mau fare, ’e ’ua rahi roa ato’a te ta’ata, mai te one tahatai ra.

8 ’E i muri a’era, i taua iho matahiti ra ’ua tupu te ’arora’a i rotopū i te mau ’āti Nephi, ’e ’o rātou ho’i teie, ’oia ho’i, te mau ’āti Nephi, ’e te mau ’āti Iakoba, ’e te mau ’āti Iosepha, ’e te mau ’āti Zorama ; ’e teie ’arora’a tei rotopū ïa i te mau ’āti Nephi ’e te mau ’āti Lamana, ’e te mau ’āti Lemuela, ’e te mau ’āti Isema’ela.

9 I teienei ’ua parauhia te mau ’āti Lamana, ’e te mau ’āti Lemuela, ’e te mau ’āti Isema’ela e mau ’āti Lamana, ’e teie nā pupu e piti ’ua parauhia ïa, te mau ’āti Nephi ’e te mau ’āti Lamana.

10 ’E i muri a’era, ’ua ha’amatahia taua ’arora’a ra i te mau ’ōti’a nō Zarahemela, i pīha’i iho i te mau pape nō Sidona.

11 ’E i muri a’era, ’ua ha’aputuputu ’āmui mai te mau ’āti Nephi i te mau ta’ata e rave rahi, ’e ’ua hau atu te reira i te toru ’ahuru tauatini. ’E i muri a’era, i taua iho matahiti ra ’ua tupu te mau ’arora’a e rave rahi, ’e ’ua pau te mau ’āti Lamana i te mau ’āti Nephi, ’e ’ua taparahi pohe rātou e rave rahi.

12 ’E i muri a’era, ’ua fa’a’ore te mau ’āti Lamana i tā rātou ’ōpuara’a, ’e ’ua tae mai te hau i ni’a i te fenua ; ’e ’ua vai noa atu ra te hau nō te ārea e maha matahiti te maoro, ’e ’aita roa te ha’amani’ira’a toto i tupu.

13 ’Āre’a rā ’ua vai noa te parauti’a ’ore i ni’a i te fenua tā’āto’a, ’e nō reira ho’i ’ua rave ’ē atu te Fatu i tāna mau pipi herehia, ’e i ’ore ai te ’ohipa nō te mau semeio ’e nō te fa’aorara’a nō te mau ’ohipa ’ī’ino a te mau ta’ata.

14 ’E ’aita a’era te mau hōro’ara’a i tae mai nō ’ō mai i te Fatu ra, ’e ’aita ho’i te Vārua Maita’i i tae mai i ni’a ia rātou nō tō rātou parauti’a ’ore ’e te ti’aturi ’ore.

15 ’E ’ua tae a’era tō’u matahiti i te ’ahuru ’e ma pae e nō tō’u ho’i ’ā’au ha’apa’o maita’i, nō reira ’ua haere mai ra te Fatu e fārerei iā’u, ’e ’ua ta’a ihora vau ē ’ua ’ite ihora ho’i i te maita’i o Iesu.

16 ’E ’ua fa’aitoito ihora vau ’ia a’o atu i teie nei feiā, ’āre’a rā ’ua tāpirihia tō’u vaha, ’e ’ua ’ōpanihia vau ’ia a’o atu ia rātou ; inaha ho’i, ’ua hina’aro mau rātou ’ia pāto’i atu i tō rātou Atua ; ’e ’ua ’āfa’i-’ē-hia atu te mau pipi herehia i rāpae i te fenua nō tā rātou mau ’ohipa ’ī’ino.

17 ’Āre’a rā ’ua pārahi noa vau i rotopū ia rātou, ’e ’ua ’ōpanihia ho’i au ’ia a’o atu ia rātou, nō te ’eta’eta o tō rātou ra ’ā’au ; ’e nō te ’eta’eta o tō rātou ’ā’au ’ua ’anatemahia te fenua nō rātou.

18 ’E nā teie feiā ’eiā haru o Gadianetona, ’o tei fa’aea na i rotopū i te mau ’āti Lamana, i fa’a’ino i te fenua, ’e nō reira ho’i ’ua ha’amata te mau ta’ata i te huna i tā rātou mau tao’a i raro i te repo ; ’e ’ua riro atu ra te reira ’ei mea mo’e ’ōhie, nō te mea ’ua ’anatema te Fatu i te fenua, i ’ore ai i ti’a ia rātou ’ia tāpe’a noa ’e ’ia rave fa’ahou mai i te reira.

19 ’E i muri a’era, ’ua tupu a’era te mau ’ohipa tahutahu, te mau ’ohipa diabolo, ’e te mau ’ohipa hi’ohi’o ; ’e ’ua tae mai ra te mana o taua vārua ’ino ra i ni’a i te fenua tā’āto’a, ’e ’ua tupu mau atu ra te mau parau ato’a a Abinadi, ’e tā Samuela te ’āti Lamana ato’a.