Puk luhn Mormon

1 Ac inge nga, Mormon, oraclah sie ma sihmlac ke ma suc nga kwewana liye ac lohng, ac pahngon ma inge Puk luhn Mormon.

2 Ac ke puhlan pacl se ma Ammaron el okanlah ma sihmlac nuh sin Leum, el tuhkuh nuh yuruk, (nga matwac yac singucul, ac nga muhtwacwacack in lutlut kuhtuh ke ohiyac in luti luhn mwet luhk) ac Ammaron el fahk nuh sihk: Nga motko muh kom sie tuhlihk na ngucsrihk, ac sa na in liye;

3 Ke ma inge, ke kom ac sun matwac yac longoul ac ahkosr nga kena tuh kom in esam ma kom liye ke mwet inge; ac ke kom sun matwac se ingacn som nuh fin acn Antum, nuh ke sie inging ma fah pahngpahng Shim; ac nuh we nga sruhkwack nuh sin Leum ma taflweyucklac muhtahl nuhkwewa ke mwet inge.

4 Ac liye, kom fah eis plwet lal Nephi nuh sum sifacna, ac ma luhlah an kom fah fihliyac na ke acn se ma inge oan we; ac kom fah tafluh fin plwet lal Nephi ma nuhkwewa ma kom liye ke mwet inge.

5 Ac nga, Mormon, sie fihlin sucu lal Nephi, (ac inen pahpah tuhmuhk pa Mormon) nga esam na ma Ammaron el sapkihn nuh sihk.

6 Ac tukun ma inge tuh nga, matwac yac singucul sie, tuh utucklac sin pahpah tuhmuhk ah nuh ke acn ma oan nuh lacfahl rohtoh, finne nuh fin acn lal Zarahemla.

7 Fin acn ah nohfohn afihnyucklac ke lohm, ac mwet ah oacna in apkuhran in puhkantwen, oacna puhkpuhk meoa uh.

8 Ac tukun ma inge ke yac se inge muhtwacwacack in oasr sie mweun inmahsrlon mwet Nephi, suc toeni oraclah mwet Nephi ac mwet Jacob ac mwet Joseph ac mwet Zoram; ac mweun se inge orek inmahsrlon mwet Nephi, ac mwet Laman ac mwet Lemuel ac mwet Ishmael.

9 Inge mwet Laman and mwet Lemuel ac mwet Ishmael elos pahngpahng mwet Laman, ac u luo inge pa mwet Nephi ac mwet Laman.

10 Ac tukun ma inge mweun uh muhtwacwacack in oasr inmahsrlolos ke mahsrol luhn acn Zarahemla, sisken kof Sidon.

11 Ac tukun ma inge mwet Nephi elos tuh oracni nuh sie luhpah luhlahp se ke mwet, finne ahluhkwelah luhpan tausin tolngoul. Ac tukun ma inge tuh oasr luhpan mweun lalos ke yac sepacna inge, ma mwet Nephi elos tuh kuhtanglah mwet Laman ac tuh uniyac mwet pucspucs selos.

12 Ac tukun ma inge mwet Laman elos tohllah plwacn lalos, ac oasr sie mislac akwucki fin acn uh; ac mislac ke lusen yac ahkosr, tuh wacngihn ahkmas.

13 Tuhsruhk ma koluk uh tuh orek fin acn ah nohfohn, yohkna oruh Leum El tuh eislah mwet tuhma lutlut sacohk Lal, ac orekma luhn ma usrnguck ac unweyuck uh tuh tui ke srihpen ma koluk luhn mwet uh.

14 Ac wacngihn mwe sang sin Leum, ac Nguhn Muhtahl tuh tiac tuhkuh nuh fin kuhtwena mwet, ke srihpen ma koluk ac suhlahlahlfongi lalos.

15 Ac nga, sun matwac singucul limekohsr ac ngucsrihk kuhtuh ke nuhnak, ke ma inge nga tuh fahsriyuck sin Leum, ac emweyac ac etuh wolacna luhn Jisus.

16 Ac nga tuh srihke in luti nuh sin mwet inge, tuhsruhk oalihk kaliyucki, ac tuh tiac lwelah nuh sihk tuh nga in luti nuh selos; tuh liye elos sulaclah in seahkos lain God lalos; ac mwet tuhma lutlut sacohk elos tuh utucklac liki acn ah, ke srihpen ma koluk lalos.

17 Tuhsruhk nga tuh muhta na inmahsrlolos, tuhsruhk tuh tiacna lwelah nga in luti nuh selos, ke srihpen kwekweiyacn insiaclos; ac ke srihpen kwekweiyacn insiaclos acn uh selngawiiyucki ke srihpaclos.

18 Ac un mwet pihsrapasr lal Gadianton inge, suc muhta oasr inmahsrlon mwet Laman, elos tuh puhseni na fin acn uh, yohkna oruh mwet muhta we ah muhtwacwacack in okanlah ma sacohk lalos ye infohk uh; ac ma inge eklac mihsrwesrwe, ke srihpen Leum El selngawiiyac acn uh, oruh elos tiac kuh in sruokyac na ma inge, kuh sifilpac eis ma inge.

19 Ac tukun ma inge oasr mwet inutnut, ac mwet orek ono, ac inutnut; ac kuh luhn el suc koluklacna tuh orek fin acn ah nohfohn, finne nuh ke ahkpwacyeiyucklac luhn kahs lal Abinadi, ac oacyacpac Samuel suc mwet Laman.