1 Ac inge nga ahksahfyelah ma sihmlac luhk ke kuhnausyucklac luhn mwet luhk, mwet Nephi. Ac tukun ma inge kuht tuh fahsr som nuh ye muhtuhn mwet Laman.

2 Ac nga, Mormon, tuh suhmuhslah sie lwacta nuh sin tohkohsrah luhn mwet Laman, ac kena sel tuh elan lwelah nuh sesr tuh kuht in oracni nuh sie mwet lasr nuh fin acn Cumorah, siskacn inging soko ma tuh pahngpahng Cumorah, ac we kuht kuh in sang nuh selos mweun.

3 Ac tukun ma inge tohkohsrah luhn mwet Laman el tuh lwelah nuh sihk ma se ma nga kena uh.

4 Ac tukun ma inge kuht tuh fahsr som nuh fin acn Cumorah, ac kuht tuh kaskiyac lohm nuknuk sesr in raunweack inging Cumorah; ac acn se inge oasr fin acn ma oasr inkof pucspucs, infacl, ac unohn; ac ke acn se inge kuht tuh finsrak in eis woiyac ah fin mwet Laman.

5 Ac ke yac ahktolfoko ac alngucul ac ahkosr tuh somlah, kuht tuh oracni nohfohn mwet luhlah sin mwet lasr nuh fin acn Cumorah.

6 Ac tukun ma inge kuht tuh oracni mwet nuhkwewa lasr nuh fin acn Cumorah, liye nga, Mormon, muhtwacwacack in mahtohoh; ac nga etuh lah pa inge tikuclkucl sahflah luhn mwet luhk, ac nga sapkihnyuck sin Leum tuh nga in tiac lwelah ma sihmlac ma tuhtahfme nuh ten sin pahpah tuhmwacsr, ma muhtahl, in puhtatyang nuh in poun mwet Laman, (tuh mwet Laman elos ac kuhnahoslah ma inge) ke ma inge nga oraclah ma sihmlac inge ke plwet lal Nephi, ac okanlah ke inging Cumorah ma sihmlac nuhkwewa ma tuh luhlahlfongiyuck ac utuckuh nuh sihk ke poun Leum, sahyacn na plwet puh inge ma nga sang nuh sin wen nuhtihk Moroni.

7 Ac tukun ma inge mwet luhk, wi muhtwacn kiyaclos ac tuhlihk nahtuhlos, tuh inge liye un mwet mweun luhn mwet Laman ke elos fahsr nuh yohrohlos; ac ke sahngweng upac ke misac ma nwacklah insiacn mwet koluk nuhkwewa, elos tuh sano in eisaclos.

8 Ac tukun ma inge elos tuhkuh in mweun lain kuht, ac mwet nuhkwewa sesseslah ke sahngweng yohk ke srihpen puhsiyaclos.

9 Ac tukun ma inge elos tuh puhtatyang nuh fin mwet luhk ke katlas, ac ke pihsr, ac ke suhkan pihsr, ac ke tuhla, ac ke kain in kuhfa in mweun nuhkwewa.

10 Ac tukun ma inge mwet luhk tuh uniyucki, ahok, finne tausin singucul luhk suc tuh wiyuc, ac nga kihnetuh inmahsrlolos; ac elos pahsiyuclac tuh elos tiacna ahksahfyelah moul luhk.

11 Ac ke elos tuh som ac uniyac mwet nuhkwewa luhk sahyacn na mwet longoul ac ahkosr sesr, (inmahsrlo pa wen nuhtihk Moroni) ac kuht tuh painmoullac ke misac luhn mwet lasr, tuh liye ke lwen tok ah, ke mwet Laman elos tuh fohlohklac nuh ke nien monglac lalos, e ke fin inging Cumorah, tausin singucul sin mwet luhk suc tuh lolongyucki nuh ten, tuh kolyuck met uh sihk.

12 Ac kuht oacyacpac liye tausin singucul sin mwet luhk suc tuh kolyuck sin wen nuhtihk Moroni.

13 Ac liye, tausin singucul lal Gidgiddonah tuh puhtatlac, ac el oacyacpac oasr inmahsrlo.

14 Ac Lamah el tuh puhtatlac wi tausin singucul lal; ac Gilgal el tuh puhtatlac wi tausin singucul lal; ac Limhah el tuh puhtatlac wi tausin singucul lal; ac Jeneum el tuh puhtatlac wi tausin singucul lal; ac Cumenihah, ac Moronihah, ac Antionum, ac Shiblom, ac Shem, ac Josh, elos tuh puhtatlac wi tausin singucul lalos kais sie.

15 Ac tukun ma inge oasr mwet singucul pac suc tuh puhtatlac ke katlas, wi tausin singucul lalos kais sie; ahok, finne mwet nuhkwewa luhk, sahyacn na elos mwet longoul ac ahkosr suc tuh wiyuc, ac oacyacpac mwet puh suc tuh kahinglac nuh ke acn ma oan nuh lacfahl epang, ac mwet puh suc tuh kahinglac som welah mwet Laman, tuh puhtatlac; ac mahnolos, ac ikoaclos, ac srahlos oan fin acn uh, fihliyucki na oan ke poun mwet suc onweltahluh in oan koluklac fin acn uh, ac in kuhlawi ac in fohlohklac nuh infohk uh.

16 Ac nguhnihk tuh kweok ke fosrngah, ke srihpen acnwucki luhn mwet luhk, ac nga tuhng:

17 O kowos mwet oaskuh, fuhkah tuh kowos in som liki ohiyac luhn Leum! O kowos mwet oaskuh, fuhkah tuh kowos in sruhngwacl Jisus, suc tuh tulac ikacslah pahol in eis kowos!

18 Liye, kowos fin tiac oraclah ma se inge, luhkuhn kowos tiacna puhtatlac. Tuhsruhk liye, kowos puhtatlac, ac nga ahsor ke misac lowos.

19 O kowos wen ac acn oaskuh, kowos pahpah ac ninac, kowos mukul tuhma ac muhtwacn kiyac, kowos mwet oaskuh, fuhkah tuh kowos in puhtatlac!

20 Tuhsruhk liye, kowos wacngihnlac, ac suhpwacr luhk tiacna kuh in fohlohkihn kowos me.

21 Ac pacl uh apkuhran in tuhkuh ke monuwos ac enenuh in nokomwacng moul kawihl; ac mahno inge ma inge kuhlawi ke koluklac uh enenuh na ke pacl na sa in eklac mahno ma tiac kuh in koluklac; ac na kowos enenuh in tu ye muhtuhn siyah in nuhnuhnkuh luhn Kraist, in nuhnuhnkweyuck fal nuh ke orekma lowos; ac fin kowos suwohswohs, na kowos ac ahkinsewowoyeyuck wi pahpah tomowos suc tuh somlah met liki kowos.

22 O tuh kowos in auliyak met liki kuhnausyucklac yohk se inge ac tuhkuh nuh fowos. Tuhsruhk liye, kowos wacngihnlac, ac Pahpah, ahok, Pahpah Ma Pahtpaht inkuhsrao, El etuh ohiyac lowos; ac El ac oruh nuh suwos fal nuh ke nuhnuhnkuh suwohs ac pahkotwen Lal.