1 ’E i muri a’era, i taua iho matahiti ra, ’ua tupu te ’arora’a i rotopū i te mau ’āti Nephi ’e te mau ’āti Lamana. ’E noa atu ā ïa tō’u nei ’āpī, e tino huru rahi rā to’u ; nō reira ’ua mā’iti te mau ta’ata o Nephi iā’u ’ia riro ’ei ta’ata fa’atere nō rātou, ’e ’aore rā ’ei ta’ata fa’atere nō tō rātou mau nu’u fa’ehau.

2 Nō reira, i muri a’era, i te ’ahuru ’e ma ono o tō’u matahiti ’ua haere atu vau ’ei ra’atira nō te hō’ē nu’u fa’ehau o te mau ’āti Nephi, nō te ’aro atu i te mau ’āti Lamana ; nō reira ’ua ma’iri ihora te toru hānere e piti ’ahuru ’e ma ono o te matahiti.

3 ’E i muri a’era, i te toru hānere e piti ’ahuru ’e ma hitu o te matahiti, ’ua haere mai ra te mau ’āti Lamana e ’aro ia mātou ma te pūai rahi, ’e nō reira ho’i ’ua fa’ari’ari’a rātou i tō’u ra mau nu’u fa’ehau ; nō reira ’aita a’era rātou i ’aro atu ; ’e ’ua ha’amata ihora rātou i te ’ōtohe atu i te mau fenua i te pae apato’erau ra.

4 ’E i muri a’era, ’ua tae atu ra mātou i te ’oire ra nō Anagola, ’e ’ua rave mai mātou i taua ’oire ra, ’e ’ua fa’aineine ihora ’ia pāruru atu ia mātou iho i te mau ’āti Lamana. ’E i muri a’era, ’ua ha’apa’ari a’era mātou i te ’oire ma tō mātou pūai ato’a ; ’e noa atu ā te rahi o tā mātou mau pā ’ua tae mai iho ā te mau ’āti Lamana nō te ’aro mai ia mātou, ’e ’ua tīahi ia mātou i rāpae i te ’oire.

5 ’E ’ua tīahi ato’a rātou ia mātou i rāpae i te fenua ra nō Davida.

6 ’E ’ua haere atu ra mātou e tae atu ra i te fenua ra nō Iosua, i te hiti i te pae tō’o’a o te rā nā te pae tahatai ra.

7 ’E i muri a’era, ’ua ha’aputuputu ’oi’oi ihora mātou i tō mātou mau ta’ata, ’ia ti’a ia mātou ’ia tāhō’ē mai ia rātou i te vāhi hō’ē.

8 Inaha rā, ’ua ’ī roa te fenua i te mau ta’ata ’eiā haru ’e i te mau ’āti Lamana ; ’e noa atu ā te ha’amoura’a rahi i tae mai i ni’a i tō’u ra mau ta’ata, ’aita roa rātou i tātarahapa i tā rātou mau ’ohipa ’ī’ino ; nō reira ’ua tupu te ha’amani’ira’a toto ’e te taparahira’a ta’ata i ni’a i te fenua ē ’ati noa a’e, i rotopū i te mau ’āti Nephi ’e i rotopū ato’a i te mau ’āti Lamana ; ’e ’ua tupu noa atu ra te ’ōrurera’a hau i ni’a i te fenua ē ’ati noa a’e.

9 ’E i teienei, e ari’i tō te mau ’āti Lamana, ’e ’o Aarona tōna i’oa ; ’e ’ua haere mai ’oia ’e tōna nu’u fa’ehau e maha ’ahuru ’e ma maha tauatini ta’ata nō te ’aro ia mātou. ’E inaha, ’ua ’aro atu vau iāna i tō’u mau ta’ata e maha ’ahuru ’e ma piti tauatini ta’ata. ’E i muri a’era, ’ua pau ihora ’oia iā’u ’e i tō’u ra nu’u fa’ehau, ’e ’ua horo ’ē atu ra ’oia mai mua atu iā’u. ’E inaha, ’ua tupu teie mau mea ato’a, ’e ’ua hope ihora te toru hānere ’e toru ’ahuru o te matahiti.

10 ’E i muri a’era, ’ua ha’amata ihora te mau ’āti Nephi i te tātarahapa i tā rātou mau ’ohipa ’ī’ino, ’e ’ua ha’amata ihora i te amuamu rahi mai tei tohuhia e te peropheta ra ’e Samuela ; inaha ho’i, ’aita i ti’a i te hō’ē ta’ata ’ia tāpe’a noa i tāna ihora, nō te mea tē vai ra te feiā ’eiā, ’e te feiā ’eiā haru, ’e te feiā taparahi ta’ata, ’e te ’ohipa tahutahu, ’e te ’ohipa diabolo i ni’a i te fenua.

11 ’Oia ïa ’ua tupu ihora te ’oto ’e te autā i ni’a i te fenua ē ’ati noa a’e nō taua mau mea nei, ’e i rotopū iho ā rā i te mau ’āti Nephi.

12 ’E i muri a’era, ’ia ’ite a’era vau, ’o Moromona, i tō rātou autā ’e tō rātou ’oto ’e te māuiui i mua i te Fatu, ’ua ha’amata ihora tō’u ’ā’au i te ’oa’oa i roto iā’u, nō te ’itera’a i te aroha ’e te fa’a’oroma’i o te Fatu, nō reira ’ua mana’o ihora vau ē, e riro ’oia i te aroha atu ia rātou, ’ia ti’a ia rātou ’ia riro fa’ahou ’ei feiā parauti’a.

13 Inaha rā, e mea faufa’a ’ore taua ’oa’oa nō’u ra, ’aita ho’i tō rātou māuiui i fa’atupu i te tātarahapa nō te maita’i o te Atua ; nō te māuiui rā i fāri’ihia e te feiā i ’anatemahia, nō te mea ’aita roa te Fatu e fa’ati’a ia rātou ’ia ’oa’oa i roto i te hara.

14 ’E ’aita ho’i rātou i haere ia Iesu ma te ’ā’au ’oto ’e te vārua tātarahapa, ’āre’a rā ’ua fa’a’ino rātou i te Atua, ma te hina’aro ’ia pohe. Noa atu i te reira ’ua ’aro atu rātou ma te fa’a’ohipa i tā rātou ’o’e nō te pāruru i tō rātou ora.

15 ’E i muri a’era, ’ua ho’i fa’ahou mai ra tō’u ’oto iā’u, ’e ’ua ’ite atu ra vau ē ’ua ma’iri te mahana nō te maita’i ia rātou, i tō te pae tino ’e tō te pae vārua ato’a ho’i ; ’e ’ua ’ite atu ho’i au ia rātou e rave rahi tauatini ’o tei taparahihia ’e ’ua ma’iri i raro ’a pāto’i atu ai rātou i tō rātou Atua, ’e ’ua ha’apu’ehia te reira mai te para i ni’a i te fenua. ’E i reira ’ua ma’iri ihora te toru hānere ’e maha ’ahuru ’e ma maha o te matahiti.

16 ’E i muri a’era, i te toru hānere ’e maha ’ahuru ’e ma pae o te matahiti ’ua horo atu ra te mau ’āti Nephi mai mua atu i te mau ’āti Lamana, ’e ’ua tāpapahia atu rātou ē tae roa atu ’ua tae rātou i te fenua ra nō Iasona, ’aita a’era i ti’a ’ia tāpe’a i tō rātou horora’a.

17 ’E i teienei, e mea fātata te ’oire ra nō Iasona i te fenua tā Amarona i huna i te mau pāpa’a parau i te Fatu ra, ’ia ’ore te reira ’ia ha’amouhia. ’E inaha, ’ua haere atu vau ’ia au i te parau a Amarona, ’e ’ua rave atu i te mau ’api a Nephi, ’e ’ua pāpa’i ihora i te hō’ē pāpa’a parau mai te au i te mau parau a Amarona.

18 ’E i ni’a iho i te mau ’api a Nephi ’ua pāpa’i au i te tā’āto’ara’a o te ’ā’amu nō te mau ’ohipa ’ī’ino ato’a ’e te mau ’ohipa vi’ivi’i ato’a ; ’āre’a rā i ni’a iho i teie mau ’api ’aita vau i pāpa’i i te tā’āto’ara’a o te ’ā’amu nō tā rātou mau ’ohipa ’ī’ino ’e nō tā rātou mau ’ohipa vi’ivi’i, inaha ho’i, ’ua vai tāmau noa taua mau ’ohipa ’ī’ino ra ’e taua mau ’ohipa vi’ivi’i ra i mua i tō’u mata mai te tau mai au i ’ite ai i te mau haere’a o te ta’ata nei.

19 ’E ’auē ho’i au nei ē, nō tā rātou mau ’ohipa ’ī’ino ; ’ua ’ī roa ho’i tō’u nei ’ā’au i te ’oto nō tā rātou mau ’ohipa ’ī’ino, i te mau mahana ato’a nō tō’u nei orara’a ; ’āre’a rā ’ua ’ite pāpū vau ē, e fa’ateiteihia vau i te mahana hope’a ra.

20 ’E i muri a’era, i taua iho matahiti nei, ’ua a’ua’u-fa’ahou-hia ’e ’ua tīahi-fa’ahou-hia te mau ’āti Nephi. ’E i muri a’era, ’ua tīahihia mātou ē tae roa ’ua tae atu mātou i te pae apato’erau, i te fenua i parauhia ra o Sema.

21 ’E i muri a’era, ’ua patu ha’apa’ari ihora mātou i te ’oire ra nō Sema, ’e ’ua ha’aputuputu mai ra mātou i tō mātou mau ta’ata mai te au i te vāhi e ti’a ’ia nā reira, penei a’e ’o te fa’aora mātou ia rātou ’ia ’ore ’ia ha’amouhia.

22 ’E i muri a’era, i te toru hānere ’e maha ’ahuru ’e ma ono o te matahiti, ’ua haere fa’ahou mai ra rātou e ’aro ia mātou.

23 ’E i muri a’era, ’ua parau atu ra vau i tō’u mau ta’ata, ’e ’ua fa’aitoito ho’i au ia rātou ma te pūai rahi, ’ia ti’a atu rātou ma te mata’u ’ore i mua i te mau ’āti Lamana ’e ’ia ’aro atu nō tā rātou mau vahine, ’e tā rātou mau tamari’i, ’e tō rātou mau fare, ’e tō rātou mau ’utuāfare.

24 ’E ’ua fa’aitoito pūai ho’i tā’u ra mau parau ia rātou, ’e nō reira ho’i ’aita rātou i horo ’ē atu mai mua atu i te mau ’āti Lamana, ’āre’a rā ’ua ti’a atu rātou ma te mata’u ’ore nō te ’aro atu ia rātou.

25 ’E i muri a’era, ’ua ’aro atu ra tō mātou nu’u fa’ehau, e toru ’ahuru tauatini ta’ata, i te nu’u fa’ehau e pae ’ahuru tauatini ta’ata. ’E i muri a’era, ’ua ti’a atu mātou i mua ia rātou ma te ’aro pūai ’e ’ua horo atu rātou mai mua atu ia mātou.

26 ’E i muri a’era, i tō rātou horora’a atu, ’ua tāpapa atu ra mātou ia rātou ’e tō mātou mau nu’u fa’ehau, ’e ’ua ’aro fa’ahou atu ra ia rātou, ’e ’ua pau rātou ; ’aita rā te pūai o te Fatu i vai i rotopū ia mātou ; ’oia ïa, ’ua vaiiho-noa-hia mātou ’ia fa’a’ohipa i tō mātou iho pūai, ’e ’aita te Vārua o te Fatu i pīha’i iho ia mātou ; nō reira, ’ua paruparu mātou mai tō mātou mau taea’e te huru.

27 ’E ’ua ’oto tō’u ’ā’au nō teie ’ati rahi o tō’u ra mau ta’ata, nō tā rātou mau ’ohipa ’ī’ino ’e tā rātou mau ’ohipa vi’ivi’i. Inaha rā, ’ua haere atu mātou e ’aro i te mau ’āti Lamana ’e te feiā ’eiā haru o Gadianetona, ē tae roa atu ’ua roa’a fa’ahou mai ia mātou tō mātou mau fenua ’āi’a.

28 ’E ’ua ma’iri ihora te toru hānere ’e maha ’ahuru ’e ma iva o te matahiti. ’E i te toru hānere ’e pae ’ahuru o te matahiti, ’ua fa’aau mātou i te parau i te mau ’āti Lamana ’e te feiā ’eiā haru o Gadianetona, ’e nā roto i te reira ’ua tātufa’ahia tō mātou mau fenua ’āi’a.

29 ’E ’ua hōro’a mai te mau ’āti Lamana i te fenua i te pae apato’erau nō mātou, ’oia ïa, ē tae atu ai i te fenua ’oa’oa e haere ti’a atu ai i te fenua i te pae apato’a. ’E ’ua hōro’a atu mātou i te fenua tā’āto’a i te pae apato’a nō te mau ’āti Lamana.