1 Ac tukun ma inge ke yac sacpacna muhtwacwacack in oasr sie mweun inmahsrlon mwet Nephi ac mwet Laman. Ac finne nga fuhsr, tuh yohk pihsac; ke ma inge mwet lal Nephi elos srihsrngiyucwi tuh nga in mwet kol lalos, kuh mwet kol luhn un mwet mweun lalos.

2 Na tukun ma inge ke yac ahkohnkohsr luhk nga tuh som us sifac luhn sie un mwet mweun luhn mwet Nephi, in lain mwet Laman; ke ma inge yac ahktolfoko ac longoul ac ohnkohsr tuh somlah.

3 Ac tukun ma inge ke yac ahktolfoko ac longoul ac itkohsr mwet Laman elos tuh tuhkuh nuh yohrohsr ke kuh luhlahp, yohkna oruh elos tuh ahksahngwengye un mwet mweun luhk; ke ma inge elos tiac ke acnwuck, ac elos muhtwacwacack in kahing nuh ke acn ma oan nuh lacfahl nuh acir.

4 Ac tukun ma inge kuht tuh tuhkuh nuh ke siti lal Angola, ac kuht tuh sruokyac siti sac, ac ahkolah in loangwe kuht liki mwet Laman. Ac tukun ma inge kuht tuh ahkfokokoye siti uh ke kuhiyacsr nohfohn; tuhsruhk finne kuht oruh kuhiyacsr nohfohn mwet Laman elos tuh tuhkuh nuh yohrohsr ac tuh ukwekuhtyak liki siti uh.

5 Ac elos tuh oacyacpac ukwekuhtyak liki acn lal David.

6 Ac kuht fahsr som ac tuhkuh nuh ke acn lal Joshua, ma oan nuh ke mahsrol rohtoh ke sisken pe acn ah.

7 Ac tukun ma inge kuht tuh sa na pwacye in oracni mwet lasr, tuh kuht in kuh in oracloseni nuh sie.

8 Tuhsruhk liye, acn uh sesseslah ke mwet pihsrapasr ac ke mwet Laman; ac finne yohk kuhnausyucklac se ma puhtatyang nuh fin mwet luhk, elos tiac na auliyak ke orekma koluk lalos; ke ma inge oasr srah ac ahkmas osrwaclihk nohfohn acn uh, kwewa na ke ip luhn mwet Nephi ac oacyacpac ke ip luhn mwet Laman; ac mwet nuhkwewa forlah lain masap fin acn ah nohfohn.

9 Ac inge, oasr sie tohkohsrah luhn mwet Laman, ac inel pa Aaron; ac el tuhkuh in lain kuht wi sie un mwet mweun tausin angngaul ac ahkosr. Ac liye, nga mweun lainuhl wi tausin angngaul ac luo. Ac tukun ma inge nga kuhtanguhllah wi un mwet mweun luhk oruh el kahing likiyuc. Ac liye, ma inge nuhkwewa oreklac, ac yac ahktolfoko ac tolngoul tuh somlah.

10 Ac tukun ma inge mwet Nephi elos muhtwacwacack in auliyak ke ma koluk lalos, ac muhtwacwacack in wowoyak oacna ke tuh palyeiyuck sel Samuel suc mwet pahluh; tuh liye wacngihn kuhtwena mwet kuh in sruokyac na ma lal sifacna, tuh mwet muhtuhnpo, ac un mwet pihsrapasr, ac mwet ahkmas, ac inutnut, ac ono inutnut uh oasr fin acn uh.

11 Ohinge muhtwacwacack in oasr sie ahsor ac sie yoksrah fin acn ah nohfohn ke srihpen ma inge, ac yohkiyac na ke inmahsrlon mwet lal Nephi.

12 Ac tukun ma inge ke nga, Mormon, tuh liye yoksrah lalos ac ahsor lalos ac suhpwacr lalos ye muhtuhn Leum, insiuck tuh muhtwacwacack in engan in nga, nga etuh tuh pahkotwen ac mongfihsrwacsr luhn Leum, ke ma inge nga motko tuh El ac pahkotwen nuh selos tuh elos ac sifilpac eklac sie un mwet suwohswohs.

13 Tuhsruhk liye engan luhk uh wacngihn srihpac, tuh suhpwacr lalos tiac ma nuh ke auliyak, ke srihpen wolacna luhn God; tuhsruhk ma ke suhpwacr luhn mwet lihsyucklac, ke srihpen Leum El tiac lwelah pacl nuhkwewa elos in engan ke ma koluk.

14 Ac elos tuh tiacna tuhkuh nuh yurun Jisus ke inse muhsahl ac toasr in nguhn, tuhsruhk elos tuh selngawi God, ac finsrak in misac. Ne ohinge elos tuh tihkuclkucl ke katlas ke moul lalos.

15 Ac tukun ma inge suhpwacr luhk tuh sifilpac fohlohk nuh yuruk, ac nga liye tuh pacl luhn luhng kuhlwacng uh ahluhkweloslac, kwewana ke moul in mahno ac ke moul in nguhn; tuh nga liye tausin selos pakpucki nuh ten ke forlah lain God lalos, ac tohktohkyak oacna fohk uh fin acn uh. Ac ohinge yac ahktolfoko ac angngaul ac ahkosr tuh somlah.

16 Ac tukun ma inge ke yac ahktolfoko ac angngaul ac limekohsr mwet Nephi elos tuh muhtwacwacack in kahing liki mwet Laman; ac elos tuh ukweyuck ne ke na elos tuhkuh nuh fin acn lal Jashon, met liki tuh kuh in tulokihnyucki elos ke kahing lalos.

17 Ac inge, siti lal Jashon oan sisken acn se ma Ammaron el tuh fihliyac ma sihmlac nuh sin Leum, tuh ma inge in tiac kuhnausyucklac. Ac liye nga tuh som in fal nuh ke kahs lal Ammaron, ac eis plwet lal Nephi, ac tuh oraclah sie ma sihmlac in fal nuh ke kahs lal Ammaron.

18 Ac fin plwet lal Nephi nga tuh oraclah sie sramsram fohn ke ma koluk ac ma sruhngwacyuck nuhkwewa; tuhsruhk fin plwet inge nga tuh kohtwaclah in oraclah sie sramsram fohn ke ma koluk ac ma sruhngwacyuck lalos, tuh liye, fahfahlac na in oasr ma koluk ac ma sruhngwacyuck ye muhtuhk e ke na nga tuh sun matwac fal in liye ohiyac luhn mwet uh.

19 Ac nga welac ke srihpen ma koluk lalos; tuh insiuck sesseslah ke suhpwacr ke srihpen ma koluk lalos, ke moul fohn luhk; ne ohinge, nga etuh tuh nga fah sruhkyuckyak ke lwen sahflah.

20 Ac tukun ma inge ke yac se inge mwet lal Nephi elos sifilpac uniyuck ac ukweyuck. Ac tukun ma inge kuht tuh ukweyuck ne ke na kuht tuh tuhkuh nuh ke acn ma oan nuh lacfahl acir nuh ke acn se suc pahngpahng Shem.

21 Ac tukun ma inge kuht tuh ahkfokokoye siti lal Shem, ac kuht tuh oracni nuh sie mwet lasr, tuh sahp kuht in kuh in molweloslac liki kuhnausyucklac.

22 Ac tukun ma inge ke yac ahktolfoko ac angngaul ac ohnkohsr elos muhtwacwacack in sifilpac tuhkuh nuh yohrohsr.

23 Ac tukun ma inge nga tuh sramsram nuh sin mwet luhk, ac tuh kwacfelos ke kuhiyuck, tuh elos in tuyak ke puhlaik ye muhtuhn mwet Laman ac acnwuck nuh ke muhtwacn kiyaclos, ac tuhlihk nahtuhlos, ac lohm selos, ac acn selos.

24 Ac kahs luhk tuh srihfasruhlosyak kuhtuh in puhlaikyak, yohkna oruh elos tuh tiacna kahing liki ye muhtuhn mwet Laman, tuhsruhk elos tuh tulac ke puhlaik in lainuhlos.

25 Ac tukun ma inge kuht tuh lain un mwet mweun tausin tolngoul lain a kuht un mwet mweun tausin lamngaul. Ac tukun ma inge kuht tuh tu na kuh ye muhtahlos oruh elos tuh kahing liki kuht.

26 Ac tukun ma inge ke elos tuh kahing kuht tuh ukwaclos wi un mwet mweun lasr, ac tuh sifilpac sonolos, ac tuh kuhtanguhloslac; ne ohinge kuh luhn Leum tiacna wi kuht; ahok, kuht tuh fihliyucklac in muhngngwe kuht sifacna, tuh Nguhn luhn Leum tiacna wi kuht; ke ma inge kuht tuh eklac muhnahslah oacna mwet wiyacsr.

27 Ac insiuck tuh suhpwacr ke srihpen ongaiyac yohk se luhn mwet luhk inge, ke srihpen ma koluk lalos ac ma sruhngwacyuck lalos. Tuhsruhk liye, kuht tuh som lain mwet Laman ac un mwet pihsrapasr lal Gadianton, ne ke na kuht tuh sifilpac sruokyac acn in usru lasr.

28 Ac yac ahktolfoko ac angngaul ac yuc tuh somlah. Ac ke yac ahktolfoko ac lamngaul kuht tuh oraclah sie wuhlwelah nuh sin mwet Laman ac un mwet pihsrapasr lal Gadianton, ke ma inge kuht tuh eis kuhtuh ipin acn in usru lasr.

29 Ac mwet Laman elos tuh use nuh sesr acn ma oan nuh lacfahl acir, ahok, finne nuh ke inkacnek ohsrihksrihk ma som nuh ke acn ma oan nuh lacfahl epang. Ac kuht tuh sang nuh sin mwet Laman nohfohn acn ma oan nuh lacfahl epang.