1 Ket napasamak iti dayta met la a tawen a nangrugi manen ti gubat iti nagbaetan dagiti Nephite ken dagiti Lamanite. Ket iti laksid ti kinaubingko pay, dakkel ketdi ti bagik; ngarud tinudingandak dagiti tao ni Nephi a mangidaulo kadakuada, wenno dadaulo dagiti buyotda.

2 Ngarud napasamak nga iti maika-sangapulo-ket-innem a tawenko indauluak ti buyot dagiti Nephite, a maibusor kadagiti Lamanite; ngarud maika-tallo-gasut-ken-duapulo-ket-innem a tawen ti limmabas.

3 Ket napasamak nga iti maika-tallo-gasut-ken-duapulo-ket-pito a tawen immay dagiti Lamanite kadakami iti nalaus ti kadakkelna a bileg, iti kasta kinaamak ida dagiti buyotko; ngarud saanda a makirupak, ket rinugianda ti nagsanud nga agturong kadagiti pagilian iti amianan.

4 Ket napasamak a dimtengkami iti siudad ti Angola, ket sinakupmi ti siudad, ket nagsaganakami a mangsalaknib iti bagbagimi kadagiti Lamanite. Ket napasamak a trininseraanmi ti siudad iti amin a kabaelanmi; ngem iti laksid ti amin a trinserami immay dagiti Lamanite kadakami ket pinapanawdakami iti siudad.

5 Ken kasta met a pinapanawdakami iti daga ti David.

6 Ket nagnakami ken nakadanon iti daga ti Josue, nga adda iti nagbedngan ti igid ti baybay iti laud.

7 Ket napasamak a naguummongkami kadagiti taomi iti kadarasan a kabaelanmi, tapno mabukelmi ida a sangsangkamaysa.

8 Ngem adtoy, napno ti daga kadagiti mannanakaw ken kadagiti Lamanite; ket iti laksid ti nakaro a pannakadadael nga agur-uray kadagiti taok, saanda a nagbabawi kadagiti dakes nga aramidda; ngarud nagsaknap iti amin a rabaw ti daga ti dara ken nadawel a panagpapatay, nga agpadpada iti biang dagiti Nephite ken dagiti Lamanite; ket maysa a sangabukel a yaalsa iti amin a rabaw ti daga.

9 Ket ita, addaan dagiti Lamanite iti ari, nga Aaron ti naganna; ket immay kadakami nga addaan iti buyot nga uppat-a-pulo-ket-uppat a ribu. Ket adtoy, pinasanguak iti uppat-a-pulo-ket-dua a ribu. Ket napasamak nga inabakko babaen ti buyotko ket linibasannak. Ket adtoy, naaramid amin dagitoy, ket limmabas ti tallo-gasut-ket-tallopulo a tawen.

10 Ket napasamak a rinugian dagiti Nephite ti nagbabawi iti basbasolda, ket rinugianda ti immararaw a kas iti impadto ni Samuel a propeta; ta adtoy awan ti tao a makapagtalinaed iti kukuana, gapu kadagiti mannibrong, ken dagiti mannanakaw, ken dagiti nadawel a mammapatay, ken ti panagsalamangka, ken ti panagan-anito nga adda iti daga.

11 Kasta ti panangrugi ti panagladladingit ken dungdung-aw iti amin a daga gapu kadagitoy a banag, ken kangrunaanna kadagiti tao ni Nephi.

12 Ket napasamak nga idi siak, ni Mormon, nakitak ti panagdung-awda ken ti panagladladingitda ken ti leddaangda iti imatang ti Apo, nangrugi a nagragsak ti pusok iti unegko, iti pannakaammok iti kaasi ken ti naunday a panagitured ti Apo, ngarud impapanko a kaasianna ida tapno agbalinda manen a nalinteg a tattao.

13 Ngem adtoy awan nagmamaayan daytoy a rag-ok, ta saan a panagbabawi ti nagleddaanganda, gapu iti kinaimbag ti Dios; ngem panagleddaang ketdi dagiti nailunod, gapu ta saan a kanayon nga ipalubos ti Apo nga agragsakda iti basol.

14 Ket saanda a napan ken ni Jesus nga addaan iti nasneban a puspuso ken napnuan babawi nga espiritu, ngem inlunodda ti Dios, ken kinayatda a matay. Nupay kasta nakibalubalda iti espada para iti biagda.

15 Ket napasamak a nagsubli manen kaniak ti leddaangko, ket nakitak a limmabas kadakuada ti aldaw ti parabur, nga agpadpada a naindagaan ken naespirituan; ta nakitak ti rinibu kadakuada a nadaleb iti nabatad a yaalsa iti Diosda, ket nagabsuonda a kasla ganagan iti rabaw ti daga. Ket kasta ti ilalabas ti tallo-gasut-ken-uppat-a-pulo-ket-uppat a tawen.

16 Ket napasamak nga iti maika-tallo-gasut-ken-uppat-a-pulo-ket-lima a tawen nangrugi a linibasan dagiti Nephite dagiti Lamanite; ket nakamatda agingga a nakadanonda iti daga a Jashon, sakbay a malapdanda iti panagsanudda.

17 Ket ita, asideg ti siudad ti Jashon iti daga a nangidulinan ni Ammaron kadagiti kasuratan iti Apo, tapno saanda a madadael. Ket adtoy napanak a maibatay iti balikas ni Ammaron, ket naalak dagiti pinanid ni Nephi, ken nangaramidak iti kasuratan a maipanggep kadagiti balikas ni Ammaron.

18 Ket kadagiti pinanid ni Nephi ti nangaramidak iti sangabukel a pakaammuan iti amin a kinadangkes ken makarimon nga ar-aramid; ngem kadagitoy a pinanid nagparbengak a mangaramid iti sangabukel a pakaammuan iti kinadangkes ken makarimon nga ar-aramidda, ta adtoy, naimatangak ti agtultuloy a buya ti kinadangkes ken makarimon nga ar-aramid manipud pay idi naan-anayen ti pannakaimatangko kadagiti wagas ti tao.

19 Ket ay-ayak pay gapu iti kinadangkesda; ta napno ti pusok iti leddaang gapu iti kinadangkesda, iti amin nga aldawko; nupay kasta, ammok a maitag-ayakto iti maudi nga aldaw.

20 Ket napasamak nga itoy a tawen naanup ken napapanaw manen dagiti tao ni Nephi. Ket napasamak a napapanawkami agingga a nakadanonkami iti amianan a daga a naawagan iti Sem.

21 Ket napasamak a trininseraanmi ti siudad ti Sem, ket inurnongmi iti uneg dagiti taomi agingga iti mabalin, tapno bareng maisalakanmi ida iti pannakadadael.

22 Ket napasamak iti maika-tallo-gasut-ken-uppat-a-pulo-ket-innem a tawen nga immayda manen kadakami.

23 Ket napasamak a kinasaok dagiti taok, ket sipipinget nga inallukoyko ida, a tumakderda a sibabatad iti sango dagiti Lamanite ket makirangetda para kadagiti assawada, ken kadagiti annakda, ken kadagiti balbalayda, ken kadagiti pagtaenganda.

24 Ket tinukay ida dagiti balikasko a pinapigsa, iti kasta saanda a naglibas iti sango dagiti Lamanite, ngem nagtakderda a sibabatad a mangbusor kadakuada.

25 Ket napasamak a nakisupangetkami kadagiti buyot ti tallopulo a ribu a maibusor iti limapulo a ribu. Ket napasamak a nagtakderkami iti sangoda a sipipinget ket linibasandakami.

26 Ket napasamak nga idi naglibasda pinakamatmi ida kadagiti buyotmi, ket sinangomi manen ida, ken inabakmi ida; nupay kasta awan kadakami ti pigsa ti Apo; wen, nabatikami iti bagbagimi, ket saannakami a binayabay ti Espiritu ti Apo; ngarud kimmapsutkami a kas kadagiti kakabsatmi.

27 Ket limdaang ti pusok gapu itoy nakaro a didigra kadagiti taok, gapu iti kinadangkesda ken dagiti makarimon nga aramidda. Ngem adtoy, intuloymi ti nangbusor kadagiti Lamanite ken dagiti tulisan ni Gadianton, agingga a nasakupmi manen dagiti daga a tawidmi.

28 Ket limmabas ti maika-tallo-gasut-ken-uppat-a-pulo-ket-siam a tawen. Ket iti maika-tallo-gasut-ken-lima-pulo a tawen nangaramidkami kadagiti Lamanite ken kadagiti tulisan ni Gadianton iti tulag, a pakabingbingayan dagiti daga a tawidmi.

29 Ket inted kadakami dagiti Lamanite ti daga iti amianan, wen, uray pay ti akikid a sumalpot iti daga iti abagatan. Ket intedmi kadagiti Lamanite ti amin a daga iti abagatan.