1 U ġara li f’dik l‑istess sena reġa’ ngħata bidu għal gwerra bejn in‑Nefiti u l‑Lamaniti. U minkejja li jiena kont għadni żgħir, kien fini raġel; għalhekk in‑nies ta’ Nefi ħatruni sabiex inkun il‑mexxej tagħhom, jew aħjar, il‑mexxej tal‑armati tagħhom.

2 Għalhekk ġara li meta kelli sittax‑il sena jiena mort immexxi l‑armata tan‑Nefiti kontra l‑Lamaniti; u b’hekk ġiet fi tmiemha s‑sena tliet mija u sitta u għoxrin.

3 U ġara li fis‑sena tliet mija u sebgħa u għoxrin il‑Lamaniti ġew biex jaħbtu għalina b’qawwa liema bħalha, hekk li huma rnexxielhom joħolqu biża’ fost l‑armati tiegħi; u minħabba f’hekk huma ma ridux jiġġieldu, u bdew jirtiraw lura lejn l‑artijiet tat‑tramuntana.

4 U ġara li aħna wasalna fil‑belt ta’ Angola, u ħadna l‑belt f’idejna, u bdejna nitħejjew sabiex niddefendu ruħna kontra l‑Lamaniti. U ġara li aħna saħħaħna l‑belt bil‑qawwa kollha tagħna; iżda minkejja l‑fortifikazzjonijiet kollha tagħna, il‑Lamaniti ħabtu għalina u keċċewna ’l barra mill‑belt.

5 U huma keċċewna ’l barra wkoll mill‑art ta’ David.

6 U aħna bqajna mexjin u wasalna fl‑art ta’ Ġożwè, li kienet tinsab fil‑fruntieri tan‑naħa tal‑punent ma’ xatt il‑baħar.

7 U ġara li f’kemm ili ngħidlek aħna ġbarna lin‑nies tagħna flimkien, ħalli huma jinġabru lkoll fi grupp wieħed.

8 Iżda araw, il‑pajjiż kien mimli briganti u Lamaniti; u minkejja li kien hemm qerda kbira tistenna lin‑nies tiegħi, huma baqgħu ma nidmux mill‑għemejjel ħżiena tagħhom; għalhekk kien hemm it‑tixrid tad‑demm u l‑qtil mal‑pajjiż kollu, kemm fuq in‑naħa tan‑Nefiti kif ukoll fuq in‑naħa tal‑Lamaniti; u dan wassal għal rivoluzzjoni sħiħa madwar il‑pajjiż kollu.

9 U issa, il‑Lamaniti kellhom sultan li kien jismu Aron; u huwa ġie biex jaħbat għalina flimkien ma’ armata ta’ erbgħa u erbgħin elf ruħ. U araw, jiena waqaftlu, flimkien ma’ armata ta’ tnejn u erbgħin elf ruħ. U ġara li fuqu jiena ħriġt rebbieħ permezz tal‑armata tiegħi, hekk li huwa ħarab minn quddiemi. U araw, dan kollu ġie fis‑seħħ, u s‑sena tliet mija u tletin ġiet fi tmiemha.

10 U ġara li n‑Nefiti bdew jindmu minn ħżunithom, u huma nfexxew jgħajtu, sewwasew kif kien ħabbar Samwel il‑profeta; għax araw, ħadd ma seta’ jkompli jżomm għandu dak li darba kien tiegħu, minħabba l‑ħallelin u l‑briganti, u l‑qattiela, u minħabba l‑arti tal‑maġija u s‑seħer li kien hemm fil‑pajjiż.

11 Għalhekk, minħabba dawn il‑ħwejjeġ, beda jkun hemm ħafna biki u tnehid mal‑pajjiż kollu, speċjalment fost il‑poplu ta’ Nefi.

12 U ġara li meta jiena, Mormon, rajthom jibku u jixhru u jitnikktu quddiem il‑Mulej, qalbi mtliet bil‑hena, għax kont naf kemm kienet kbira l‑ħniena u kemm kien kbir is‑sabar tal‑Mulej, għax jiena kont nemmen li huwa kien se jkun ħanin magħhom biex huma jerġgħu jsiru poplu ġust.

13 Iżda araw, għalxejn jiena bdejt nithenna, għax in‑niket tagħhom ma kienx frott l‑indiema, minħabba t‑tjubija ta’ Alla; iżda pjuttost kien in‑niket tal‑ikkundannati, għax il‑Mulej ma kienx se jħallihom jgħixu dejjem fil‑kuntentizza waqt li jkunu fid‑dnub.

14 U huma ma marrux quddiem Ġesù b’qalb maqsuma u spirtu niedem, iżda huma bdew jisħtu ’l Alla, u bdew juru x‑xewqa li jmutu. Madankollu, huma kienu lesti jitqabdu għal ħajjithom bix‑xabla.

15 U ġara li jien erġajt bdejt ninħakem min‑niket, u stajt nara li l‑jum ta’ grazzja tagħhom kien għadda, kemm b’mod temporali kif ukoll spiritwali; għax jiena rajt eluf minnhom jinqatlu waqt li bdew joħduha kontra Alla tagħhom, u huma spiċċaw bħal munzell żibel fuq wiċċ l‑art. U b’hekk ġiet fi tmiemha s‑sena tliet mija u erbgħa u erbgħin.

16 U ġara li fis‑sena tliet mija u ħamsa u erbgħin in‑Nefiti bdew jaħarbu minn quddiem il‑Lamaniti; u dawn baqgħu jimxu warajhom sakemm huma waslu sewwasew fl‑art ta’ Ġason, qabel ma setgħu jwaqqfuhom milli jirtiraw.

17 U issa, il‑belt ta’ Ġason kienet tinsab qrib l‑art fejn Ammaron kien ħeba l‑annali għall‑Mulej, biex forsi ma jinqerdux. U araw, jiena mort, kif kien ordnali nagħmel Ammaron, u ħadt għandi l‑pjanċi ta’ Nefi, u fuqhom ktibt l‑istorja kif kien ordnali nagħmel Ammaron.

18 U fuq il‑pjanċi ta’ Nefi ktibt rakkont iddettaljat dwar il‑ħażen kollu u l‑abominazzjonijiet kollha li rajt; iżda fuq dawn il‑pjanċi se nevita li nikteb rakkont iddettaljat dwar il‑ħażen u l‑abominazzjonijiet tagħhom, għax araw, jien ili nara b’għajnejja xeni bla għadd ta’ ħażen u abominazzjonijiet sa minn meta kont kapaċi biżżejjed li nagħraf l‑għemejjel tal‑bniedem.

19 U miskin jien minħabba ħżunithom; għax ili ħajti kollha b’qalbi mnikkta minħabba ħżunithom; madankollu, naf li jiena sejjer niġi mgħolli ’l fuq fl‑aħħar jum.

20 U ġara li f’din l‑istess sena n‑nies ta’ Nefi reġgħu bdew jiġu segwiti, u huma spiċċaw mkeċċija minn fejn kienu. U ġara li aħna ġejna mġiegħla nibqgħu mexjin sakemm wasalna fin‑naħa tat‑tramuntana, fl‑art li kien jisimha Sem.

21 U ġara li aħna ffortifikajna l‑belt ta’ Sem, u lil niesna ġbarnihom kemm jista’ jkun flimkien, biex forsi jirnexxielna nsalvawhom mill‑qerda.

22 U ġara li fis‑sena tliet mija u sitta u erbgħin huma reġgħu ġew biex jaħbtu għalina.

23 U ġara li jiena kellimt lin‑nies tiegħi, u tlabthom, bil‑qawwa kollha tiegħi, biex jieqfu bla biża’ quddiem il‑Lamaniti u jiġġieldu għal marthom, u għal uliedhom, u għal djarhom, u għal familthom.

24 U kliemi, b’xi mod, imliehom b’ħeġġa kbira, hekk li huma ma ħarbux minn quddiem il‑Lamaniti, iżda ħaduha magħhom bi qlubija kbira.

25 U ġara li aħna, b’armata ta’ tletin elf, spiċċajna nitqabdu ma’ armata ta’ ħamsin elf. U ġara li aħna waqafna quddiemhom b’determinazzjoni kbira hekk li huma spiċċaw ħarbu minn quddiemna.

26 U ġara li hekk kif huma ħarbu minn quddiemna aħna bqajna nimxu warajhom permezz tal‑armati tagħna, u erġajna bdejna neħduha magħhom, u għelibnihom; madankollu l‑qawwa tal‑Mulej ma kenitx magħna; iva, aħna tħallejna rajna f’idejna, għax l‑Ispirtu tal‑Mulej ma baqax jgħammar aktar fina; għalhekk aħna sirna poplu dgħajjef bħal ħutna.

27 U qalbi tnikktet minħabba l‑istat ħażin li kienu fih in‑nies tiegħi, minħabba ħżunithom u l‑abominazzjonijiet tagħhom. Iżda araw, aħna morna niġġieldu kontra l‑Lamaniti u l‑briganti ta’ Gadjantun, sakemm rnexxielna nerġgħu nieħdu f’idejna l‑artijiet ta’ wirtna.

28 U hekk ġiet fi tmiemha s‑sena tliet mija u disgħa u erbgħin. U fis‑sena tliet mija u ħamsin aħna dħalna fi trattat mal‑Lamaniti u mal‑briganti ta’ Gadjantun, li fih aħna spiċċajna biex qsamna magħhom l‑artijiet ta’ wirtna.

29 U l‑Lamaniti spiċċaw tawna l‑art tat‑tramuntana, iva, sewwasew sal‑passaġġ dejjaq li kien iwassal sal‑art tan‑nofsinhar. U aħna tajna lil‑Lamaniti l‑art kollha tan‑nofsinhar.