1 ’E i muri a’era, ’aita te mau ’āti Lamana i haere fa’ahou mai e ’aro ia rātou ē tae noa atu ’ua ma’iri fa’ahou hō’ē ’ahuru matahiti. ’E inaha, ’ua fa’a’ohipa vau i tō’u mau ta’ata, ’oia ho’i i te mau ’āti Nephi, nō te fa’aineine i tō rātou mau fenua ’e tā rātou mau mauha’a tama’i nō te taime e tupu mai ai te tama’i.

2 ’E i muri a’era, ’ua parau mai ra te Fatu iā’u : ’A a’o atu i teie nei mau ta’ata—’A tātarahapa ’outou ’e ’a haere mai iā’u nei, ’e ’ia bāpetizohia ’outou ’e ’a fa’atupu rahi fa’ahou i tā’u nei ’ēkālesia, ’e e fa’ahereherehia ’outou.

3 ’E ’ua a’o atu vau i teie mau ta’ata, ’āre’a rā ’ua faufa’a-’ore-hia ; ’e ’aita ho’i rātou i ’ite pāpū ē, nā te Fatu i fa’aherehere ia rātou, ’e i hōro’a atu i te fāna’o ia rātou ’ia tātarahapa. ’E inaha, ’ua fa’a’eta’eta rātou i tō rātou ’ā’au i te Fatu i tō rātou ra Atua.

4 ’E i muri a’era, ’ia ma’iri te ’ahuru o te matahiti, ’oia ho’i, i roto i te tā’āto’ara’a, e toru hānere e ono ’ahuru matahiti mai te taera’a mai o te Mesia, ’ua fa’atae mai te ari’i o te mau ’āti Lamana i te hō’ē ’episetole iā’u, nō te fa’a’ite pāpū mai iā’u ē, tē fa’aineine ra rātou nō te haere fa’ahou mai e ’aro ia mātou.

5 ’E i muri a’era, ’ua tītau atu ra vau i tō’u ra mau ta’ata ’ia ha’aputuputu ’āmui mai rātou i te fenua ra nō Ano, i te hō’ē ’oire tei te mau hiti i fātata i taua ’ē’a oaoa ra ē tae atu ai i te fenua i te pae apato’a.

6 ’E i reira ’ua fa’anahonaho mātou i tō mātou mau nu’u fa’ehau, ’ia ti’a ia mātou ’ia tāpe’a i te mau nu’u fa’ehau o te mau ’āti Lamana, ’ia ’ore rātou ’ia haru i te hō’ē a’e o tō mātou mau fenua ; nō reira ’ua ha’apa’ari mātou ia mātou nō te ’aro atu ia rātou ma tō mātou pūai ato’a.

7 ’E i muri a’era, i te toru hānere ’e ono ’ahuru ’e ma hō’ē o te matahiti, ’ua pou mai ra te mau ’āti Lamana i te ’oire ra nō Ano nō te ’aro mai ia mātou ; ’e i muri a’era, i taua matahiti ra ’ua pau rātou ia mātou, ’e nō reira ho’i ’ua ho’i fa’ahou atu rātou i tō rātou iho mau fenua.

8 ’E i te toru hānere ’e ono ’ahuru ’e ma piti o te matahiti, ’ua pou fa’ahou mai ra rātou nō te ’aro. ’E ’ua pau fa’ahou rātou ia mātou, ’e ’ua taparahi mātou ia rātou e rave rahi, ’e ’ua hurihia tō rātou feiā pohe i roto i te miti.

9 ’E i teienei, nō teie mea rahi i ravehia e tō’u ra mau ta’ata, te mau ’āti Nephi, ’ua ha’amata ihora rātou i te fa’ate’ote’o i tō rātou iho pūai, ’e ’ua tapu ihora rātou i mua i te mau ra’i ē, e tāho’o atu rātou i te toto o tō rātou mau taea’e i ha’amani’ihia e tō rātou mau ra mau ’enemi.

10 ’E ’ua tapu a’era rātou i mua i te mau ra’i, ’e ’oia ato’a i mua i te terōno o te Atua ē, e haere atu rātou i ni’a nō te ’aro i tō rātou mau ’enemi, ’e e ha’amou roa ia rātou mai ni’a atu i te fenua nei.

11 ’E i muri a’era, ’ua pāto’i roa atu ra vau, ’o Moromona, mai teie taime atu ’ia riro ’ei tōmānā ’e ’ei ta’ata fa’atere nō teie mau ta’ata, nō tā rātou mau ’ohipa ’ī’ino ’e te mau ’ohipa vi’ivi’i.

12 Inaha, i arata’i na ho’i au ia rātou, noa atu ā tā rātou mau ’ohipa ’ī’ino i arata’i na ho’i au ia rātou e rave rahi taime nō te ’aro atu, ’e ’ua here au ia rātou ma tō’u ’ā’au ato’a, mai te au i te here o te Atua i roto iā’u nei ; ’e ’ua pure māite atu tō’u vārua i te Atua i te tā’āto’ara’a o te mahana nō rātou ; ’āre’a rā ’ua faufa’a ’ore te reira, nō te ’eta’eta o tō rātou ’ā’au.

13 E toru ho’i taime tō’u fa’aorara’a ia rātou i te rima o tō rātou mau ’enemi, ’e ’aita ho’i rātou i tātarahapa i tā rātou mau hara.

14 ’E ’ia oti a’era rātou i te tapu i te mau mea ato’a i ’ōpanihia e tō tātou Fatu ’e Fa’aora o Iesu Mesia, ’ia haere atu rātou i ni’a nō te ’aro i tō rātou mau ’enemi, ’e nō te tāho’o atu ho’i i te toto o tō rātou mau taea’e, inaha, ’ua tae mai ra te reo o te Fatu iā’u, i te nā-’ō-ra’a mai ē :

15 Tei iā’u nei te tāho’ora’a, ’e nā’u ho’i e tāho’o atu ; ’e nō te mea ’aita teie mau ta’ata i tātarahapa i muri a’e i tō’u fa’aorara’a ia rātou, inaha, e ha’amouhia rātou mai ni’a atu i te fenua nei.

16 ’E i muri a’era, ’ua pāto’i roa vau ’ia haere atu e ’aro atu i tō’u ra mau ’enemi ; ’e ’ua rave ho’i au mai tā te Fatu i fa’aue mai iā’u ra ; ’e ’ua ti’a noa a’era vau ’ei ’ite ma te ’ohipa ’ore, nō te fa’a’ite atu i tō te ao nei i te mau mea tā’u i ’ite ’e i fa’aro’o, mai te au i te mau fa’a’itera’a a te Vārua ’o tei fa’a’ite mai i te mau mea e tupu a muri atu.

17 Nō reira tē pāpa’i atu nei au ia ’outou, e te mau ’Ētene, ’e ia ’outou ato’a, e te ’utuāfare nō ’Īserā’ela, ’ia ’ite ’outou ’e ’ia ha’amata-ana’e-hia te ’ohipa ra, tē fātata ra ïa ’outou i te fa’aineine ’ia ho’i atu i tō ’outou fenua ’āi’a.

18 ’Oia ïa, inaha, tē pāpa’i atu nei au i tō te mau hope’a ato’a o te fenua nei ; ’oia ïa, ’ia ’outou e te mau ’ōpū tino hō’ē ’ahuru ’e ma piti nō ’Īserā’ela, ’o tē ha’avāhia mai te au i tā ’outou mau ’ohipa e te tino hō’ē ’ahuru ’e ma piti ’o tā Iesu i mā’iti ’ei mau pipi nāna i te fenua ra nō Ierusalema.

19 ’E tē pāpa’i ato’a atu nei au i te toe’a o teie nei feiā, ’o tē ha’avā-ato’a-hia e te tino hō’ē ’ahuru ’e ma piti ’o tā Iesu i mā’iti i teie nei fenua ; ’e e ha’avāhia ïa rātou e te tahi atu tino hō’ē ’ahuru ’e ma piti ’o tā Iesu i mā’iti i te fenua ra nō Ierusalema.

20 ’E nā te Vārua i fa’a’ite mai i taua mau mea nei iā’u ; nō reira tē pāpa’i atu nei au i te reira ia ’outou pā’āto’a. ’E teie te tumu vau i pāpa’i atu ai ia ’outou na, ’ia ’ite ’outou ē, e mea ti’a roa ia ’outou pā’āto’a ’ia ti’a atu i mua i te vāhi ha’avāra’a a te Mesia, ’oia ïa, te mau ta’ata pā’āto’a nō te ’utuāfare tā’āto’a o Adamu ra ; ’e e mea ti’a roa ia ’outou ’ia ha’avāhia nō tā ’outou ra mau ’ohipa, mai te mea e mea maita’i ānei te reira ’e ’aore rā e mea ’ino.

21 ’E ’ia ti’aturi ato’a ho’i ’outou i te ’evanelia a Iesu Mesia, ’o tē tae mai i rotopū ia ’outou na ; ’e ’ia fāri’i ato’a te mau ’āti Iuda, te feiā i fafau atu i te Fatu, i te tahi atu ā ’ite, ta’a ’ē atu iāna ’o tā rātou i hi’o atu ’e i fa’aro’o ho’i, ’o Iesu ’o tei taparahihia e rātou ra, ’o te Mesia mau iho ā ïa ’e te Atua mau iho ā ho’i.

22 ’E ’ua hina’aro roa vau ’ia fa’afāriu mai i tō te mau hope’a tā’āto’a o te ao nei ’ia tātarahapa ’e ’ia fa’aineine nō te ti’a atu i mua i te vāhi ha’avāra’a a te Mesia.