1 Ac tukun ma inge mwet Laman elos tuh tiacna tuhkuh in sifilpac mweun ne ke na yac ahksingucul somlah. Ac liye, nga tuh oruh mwet luhk, mwet Nephi, in orekma in ahkolah acn selos ac un mwet mweun lalos in lain ke pacl in mweun.

2 Ac tukun ma inge Leum El tuh fahk nuh sihk: Fahk nuh sin mwet inge—Kowos auliyak, ac tuhkuh nuh Yuruk, ac pacptaislac, ac sifilpac muhsaheack alu Luhk, ac kowos fah moliyucklac.

3 Ac nga tuh fahk nuh sin mwet inge, tuhsruhk wacngihn srihpac; ac elos tuh tiacna akihlen lah Leum pa tuh molweloslac, ac sang nuh selos sie pacl in auliyak. Ac liye elos tuh ahkkwekweye insiaclos in lain Leum God lalos.

4 Ac tukun ma inge tukun yac ahksingucul tuh somlah, oruh, nohfohn, yac ahktolfoko ac onngoul liki pacl in tuhkuh luhn Kraist, tohkohsrah luhn mwet Laman suhpwacma sie lwacta nuh sihk, ma use nuh sihk in etuh tuh elos ahkolah in sifilpac tuhkuh in mweun lain kuht.

5 Ac tukun ma inge nga tuh oruh mwet luhk tuh elos in toeni nuh sie ke acn Ahsor, nuh ke sie siti ma oan ke mahsrol, sisken inkacnek ohsrihksrihk ma som nuh ke acn ma oan nuh lacfahl epang.

6 Ac kuht tuh likiyac un mwet mweun lasr we, tuh kuht in kuh in tulokihnyac un mwet mweun luhn mwet Laman, tuh elos in tiac kuh in sruokyac kuhtwena acn lasr; ke ma inge kuht tuh ahkfokokoye in lainuhlos ke kuhiyacsr nohfohn.

7 Ac tukun ma inge ke yac ahktolfoko ac onngoul ac sie mwet Laman elos tuh tuhkuh nuh ke siti Ahsor in mweun lain kuht; ac tukun ma inge ke yac sac pacna kuht tuh kuhtanguhloslac, yohkna oruh elos tuh sifilpac fohlohklac nuh acn selos sifacna.

8 Ac ke yac ahktolfoko ac onngoul ac luo elos tuh sifilpac tuhkuh in mweun. Ac kuht tuh sifilpac kuhtanguhloslac, ac tuh uniyac sie luhpah na yohk selos, ac mwet misac lalos ah tuh tolyucklac nuh in meoa.

9 Ac inge, ke srihpen ma na yohk se inge suc mwet luhk, mwet Nephi, elos tuh oraclah, elos muhtwacwacack in fihlacngwack ke kuh lalos sifacna, ac muhtwacwacack in kahskahs koluk ye muhtuhn inkuhsrao lah elos ac sifacna fohlohksahk ke srah luhn mwet wiyaclos suc tuh acnwucki sin mwet lokoalok lalos.

10 Ac elos tuh fuhlahk ke inkuhsrao, ac oacyacpac ke tron luhn God, tuh elos ac som in mweun lain mwet lokoalok lalos, ac onweloslac liki acn uh.

11 Ac tukun ma inge nga, Mormon, tuh sruhnga na pwacye ke pacl se inge fahlac in sie mwet wal ac sie mwet kol luhn mwet inge, ke srihpen ma koluk ac ma sruhngwacyuck lalos.

12 Liye, nga tuh kohlohlos, finne ke ma koluk lalos nga tuh kohlohlos pacl pucspucs nuh ke mweun, ac tuh luhngse elos, in fal nuh ke luhngse luhn God ma oasr yuruk, ke insiuck nohfohn; ac nguhnihk tuh kahklah ke pruhe nuh sin God luhk lwen na fohn kaclos; ne ohinge, ke wacngihn luhlahlfongi, ke srihpen kwekweiyacn insiaclos.

13 Ac pacl tolu nga molweloslac liki poun mwet lokoalok lalos, ac elos tiacna auliyak ke ma koluk lalos.

14 Ac ke elos tuh olwelah nuh sin mwet nuhkwewa ma tuh tiac lwelah nuh selos sin Leum lasr ac Mwet Lahngo Jisus Kraist, tuh elos ac som nuh yurun mwet lokoalok lalos in mweun, ac sifacna fohlohksahk ke srah luhn mwet wiyaclos, liye puhsrwen Leum tuhkuh nuh yuruk, fahk:

15 Fohlohksahk uh ma Luhk, ac Nga fah fohlohkihn; ac ke srihpen mwet inge tiacna auliyak tukun Nga tuh molweloslac, liye, elos fah uniyucklac liki facluh.

16 Ac tukun ma inge nga tuh arulacna sruhnga in som lain mwet lokoalok luhk; ac nga tuh oruh oacna ke Leum El tuh sapkihn nuh sihk; ac nga tuh tu na tiac mukwikwi in ahkkahlwemye nuh sin facluh ke ma suc nga tuh liye ac lohng, in fal nuh ke ma ahkkahlwemyeyuck sin Nguhn ma fahkwack ke ma ac tuhkuh.

17 Ke ma inge nga sihm nuh suwos, mwet Gentile, ac oacyacpac nuh suwos, mwet Israel, ke orekma uh fah muhtwacwacack, tuh kowos in ahkolah in fohlohk nuh ke acn in usru lowos;

18 Ahok, liye, nga sihm nuh sin mwet nuhkwewa fin facluh; ahok, nuh suwos, sruf singucul luo luhn Israel, suc fah nuhnuhnkweyuck fal nuh ke orekma lowos sin singucul luo suc Jisus El sulaclah in pa mwet tuhma lutlut Lal fin acn Jerusalem.

19 Ac nga oacyacpac sihm nuh sin mwet luhlah luhn mwet inge, suc fah oacyacpac nuhnuhnkweyuck sin singucul luo suc Jisus El tuh sulaclah fin acn se inge; ac elos fah nuhnuhnkweyuck sin singucul luo sahyac suc Jisus El tuh sulaclah fin acn Jerusalem.

20 Ac ma inge Nguhn ahkkahlwemye nuh sihk; ke ma inge nga sihm nuh suwos nuhkwewa. Ac ke ma se inge nga sihm nuh suwos, tuh kowos in kuh in etuh lah kowos nuhkwewa enenuh in tu ye muhtuhn siyah in nuhnuhnkuh luhn Kraist, ahok, mwet nuhkwewa suc wi sucu luhlahp lal Adam; ac kowos enenuh in tu in nuhnuhnkweyuck ke orekma lowos, lah ma inge wo kuh koluk;

21 Ac oacyacpac kowos in kuh in luhlahlfongi wosasuc luhn Jisus Kraist, ma ac fah oasr inmahsrlowos; ac oacyacpac lah mwet Jew, mwet wuhlweacng luhn Leum, ac fah oasr mwet loh sahyacl suc elos tuh liye ac lohng, lah Jisus, suc elos tuh uniyac, pa Kraist na pwacye ac God na pwacye.

22 Ac nga kena tuh nga in kuh in mokle mwet nuhkwewa fin facluh in auliyak ac ahkolah in tu ye muhtuhn siyah in nuhnuhnkuh luhn Kraist.