1 Xcʼulvachitej cʼa chi chupan ri vakxaklajuj cʼal oxiʼ junaʼ, ri Nefiʼiʼ xeʼel el pa ri ruvachʼulef rubiniʼan Tolanic, quiqʼuin ri molaj coyovanelaʼ, richin niquichop quiʼ quiqʼuin ri Lamaniʼ.

2 Cʼariʼ, xcʼulvachitej chi ri molaj oyovanelaʼ quichin ri Nefiʼiʼ xeʼokotex pe, cʼa pa ri ruvachʼulef Tolanic. Chiriʼ cʼa, tok rijeʼ cʼa e cosinek na, jun cʼacʼaʼ molaj oyovanelaʼ quichin ri Lamaniʼ xepe cʼa chiquij. Cʼa cʼariʼ, xbanatej jun cʼayevilej chʼaʼoj, y ri Lamaniʼ can xquichʼec vi ri tinamit rubiniʼan Tolanic, y xequicamisaj e qʼuiy Nefiʼiʼ, y xequichop e qʼuiy richin yequitzʼapij.

3 Cʼariʼ ri quitzʼakat ri Nefiʼiʼ xeʼanimej el y xquitun quiʼ quiqʼuin ri e cʼo chupan ri tinamit Teancum. Ri tinamit Teancum cʼo cʼa pa ri cʼulbaʼt chunakaj cʼa ri tinamit Tolanic.

4 Vaveʼ cʼa, ri molaj oyovanelaʼ quichin ri Nefiʼiʼ xebe cʼa chiquij ri Lamaniʼ, y can xaxe vi romariʼ tok xchap quicamisaxic ri Nefiʼiʼ. Roma ri Lamaniʼ man ta xetiquir cʼa xequichʼec, vi xa man ta romariʼ.

5 Kitzij cʼa chi ri cʼajisabel ri nuben ri Dios xquequikʼiʼ ri e itzel, y can coma vi ri e itzel, yecʼajisex cʼa quivech ri e itzel. Roma can ja vi cʼa ri e itzel ri niquikʼakʼirisaj ri cánima ri calcʼual ri achiʼaʼ richin chi yecamisan.

6 Xcʼulvachitej cʼa chi ri Lamaniʼ xquinucʼ apon quiʼ, richin yebe ka chirij ri tinamit Teancum.

7 Xcʼulvachitej cʼa chi chupan ri junaʼ vakxaklajuj cʼal cajiʼ, jariʼ tok ri Lamaniʼ xebe ka chirij ri tinamit Teancum richin niquichʼec ri tinamit riʼ chukaʼ.

8 Xcʼulvachitej cʼa chi rijeʼ xekʼatatej y xeʼokotex coma ri Nefiʼiʼ. Cʼa cʼariʼ, tok ri Nefiʼiʼ xquitzʼet chi rijeʼ xecokotaj el ri Lamaniʼ, rijeʼ xebananen cʼa chic roma ri cuchukʼaʼ. Jariʼ tok xebe riqʼuin ri cuchukʼaʼ rijeʼ y xquichʼec jun bey chic ri tinamit Tolanic.

9 Vacami cʼa, tok e cʼulvachitajinek chic ronojel reʼ, e caminek cʼa chic e qʼuiy lajujitek vocʼal vinakiʼ quiqʼuin ri caʼiʼ vinakul, quiqʼuin cʼa ri Nefiʼiʼ, achiʼel cʼa quiqʼuin ri Lamaniʼ.

10 Xcʼulvachitej cʼa chi xkʼax el ri junaʼ vakxaklajuj cʼal vakiʼ. Cʼariʼ, ri Lamaniʼ xeʼapon ka chic quiqʼuin ri Nefiʼiʼ richin chi niquichop quiʼ quiqʼuin. Man riqʼuin vi riʼ, ri Nefiʼiʼ man xtzolin ta pe quicʼuʼx chupan ri itzel ri quibanalon, xa jutakel xquitakej el rubanic itzel.

11 Vaveʼ cʼa, man tiquirel ta richin chi ri rakʼ jun achin nutzijoj, o richin chi jun achin nutzʼibaj jun tzʼaket kʼalajirisanic chirij ri xibinel vachibel richin quiqʼuel y vulatajic tiojil ri xtzuʼun chiquicojol ri vinakiʼ. Reʼ quiqʼuin cʼa ri Nefiʼiʼ, achiʼel chukaʼ ri Lamaniʼ. Checonojel ánima covirisan chic. Xa roma cʼariʼ tok xequicot richin yecamisan jutakel.

12 Ri ruchʼabel ri Ajaf niquibij chi manjun chi bey can xcʼojeʼ cʼa janíla etzelal chiquicojol ri ralcʼual ri Leʼi, ni ta chukaʼ chiquicojol ri rujayul ri Israel, achiʼel cʼa re etzelal reʼ chiquicojol re vinakul reʼ.

13 Xcʼulvachitej cʼa chi ri Lamaniʼ xquichʼec chic ri tinamit Tolanic, xa roma nicʼo quiviʼ e qʼuiy rijeʼ chiquivech ri Nefiʼiʼ.

14 Chukaʼ xebiyin chirij ri tinamit Teancum, y xecolotaj el ri e cʼo chupan, y xequichop e qʼuiy ixokiʼ y alcʼualaʼ, y xequisuj achiʼel camelabel chique ri tioxilej tak qui dios.

15 Xcʼulvachitej cʼa chi chupan ri junaʼ vakxaklajuj cʼal vukuʼ, jariʼ tok ri Nefiʼiʼ xeʼoyover, roma ri Lamaniʼ xequicamisaj chi camelabel ri quixokiʼ y ri calcʼual. Roma cʼariʼ, xebe cʼa chiquij ri Lamaniʼ riqʼuin janíla nim coyoval. Riqʼuin cʼariʼ, rijeʼ xequichʼec chic jun bey ri Lamaniʼ, y xecokotaj el chupan ri quiruvachʼulef.

16 Cʼa cʼariʼ, ri Lamaniʼ man xepe ta chic chiquij ri Nefiʼiʼ, cʼa tok chupan ri junaʼ vakxaklajuj cʼal volajuj.

17 Chupan cʼa ri junaʼ riʼ xepe ka chic chiquij ri Nefiʼiʼ quiqʼuin ronojel ri cuchukʼaʼ. Chiriʼ cʼa, man xeʼajilex ta roma can janíla vi e qʼuiy.

18 Pa ri tak kʼij riʼ, ri Nefiʼiʼ manjun chic bey xcʼojeʼ cuchukʼaʼ pa quiviʼ ri Lamaniʼ, xa can xejamajoʼ vi el chiquivech, achiʼel cʼa ri tef kajinek pe nanimej chuvech ri kʼij.

19 Xcʼulvachitej cʼa chi ri Lamaniʼ xepe ka chirij ri tinamit Tolanic. Chiriʼ cʼa xbanatej jun janíla cʼayevilej chʼaʼoj chupan ri ruvachʼulef Tolanic, y ri Lamaniʼ xequichʼec cʼa ri Nefiʼiʼ.

20 Cʼariʼ, ri Nefiʼiʼ xeʼanimej el chiquivech ri Lamaniʼ y xeʼapon pa ri tinamit Boaz. Chiriʼ cʼa riqʼuin janíla quicovil xepaʼeʼ chiquivech ri Lamaniʼ. Roma cʼariʼ, ri Lamaniʼ man xequichʼec ta, xa cʼa tok xepe chiquij rucaʼn mul.

21 Tok xepe cʼa pa rucaʼn mul, ri Nefiʼiʼ xeʼokotex, y xecamisex riqʼuin nimalej itzelilej camisaxic. Jun chic bey cʼa ri quixokiʼ y ri calcʼual xecamisex chi sujubel chiquivech tak tiox.

22 Xcʼulvachitej cʼa chi ri Nefiʼiʼ xeʼanimej chic el chiquivech, y xequicʼuaj el quiqʼuin rijeʼ conojel ri vinakiʼ ri e cʼo chupan ri nimaʼk tak tinamit y chukaʼ ri e cʼo chupan ri chuʼutiʼk tak tinamit.

23 Vacami cʼa, yin Mormon xintzʼet chi ri Lamaniʼ jubaʼ chic man niquichʼec chijun ri ruvachʼulef riʼ. Roma cʼariʼ tok xibe pa ri ti loman juyuʼ rubiniʼan Xim, y xenvelesaj cʼa el ronojel ri retal banobel ri revan can ri Amaron riqʼuin ri Ajaf.