1 Vacami cʼa, yichʼo chukaʼ chiquij ri man yeniman ta richin ri Cristo.

2 ¿La xtinimaj cami chupan ri kʼij richin ri ikʼaxomal? Ja ri kʼij riʼ tok xtipe ri Ajaf. Ja kʼij riʼ tok ri ruvachʼulef xtubol riʼ, achiʼel cʼa jun bolon vuj. Ri tak tiquiribel richin re ruvachʼulef xquechʼub roma nimalej cʼaten. Ja kʼij riʼ tok xquixucʼuex cʼa chuvech ri Rucarneʼl ri Dios. Chupan cʼa ri kʼij riʼ, ¿la cʼa xtibij na cami chi manek Dios?

3 ¿La cʼa xtixutuj na ri Cristo, o la yixtiquir cami nitzuʼ apon ri Rucarneʼl ri Dios? ¿La ninojij chi yixtiquir cami yixcʼaseʼ riqʼuin rija tok can ninaʼ vi ri imac? Nipokonatej ri ivánima roma xtinabelaʼ ri imac, y xtinabelaʼ chi e ixovan jumul ri rupixaʼ. Queriʼ cʼa ibanon, ¿la ninojij cami chi xquixquicot na richin yixcʼaseʼ riqʼuin ri Lokʼolaxel riʼ?

4 Can kitzij vi ninbij chive chi xtitij ta kʼaxomal vi xquixcʼojeʼ ta riqʼuin jun lokʼolej y chojmilej Dios tok can ivetaman vi chi ix tzʼil chuvech. Janíla kʼaxomal xtitij ta vi queriʼ ibanon, chuvech cʼa vi ta xa xquixcʼaseʼ ta quiqʼuin ri cʼaslemal e etzelan can pa xibalbay.

5 Roma can kitzij vi chi xtitzʼet chi ix chʼanay chuvech ri Dios. Chukaʼ xtitzʼet ri rucʼojlemal ri Dios, y ri ruchʼajchʼojil ri Jesucristo. Jariʼ tok can xtutzij vi iviqʼuin rix jun ruxak ri kʼakʼ ri man chuputjinek ta chic.

6 Roma cʼariʼ, ivonojel rix ri man yixniman ta, quixjel cʼa pe riqʼuin ri Ajaf. Quixchʼo akʼanij chi utzil riqʼuin ri Tataʼixel pa rubiʼ ri Jesús, richin queriʼ xquixoc chʼajchʼoj, choj, jebel, y sek chupan ri nimalej y ruqʼuisibel kʼij riʼ, roma cʼa ix chʼajon chic roma ri ruquiqʼuel ri Carneʼl.

7 Yichʼo cʼa chukaʼ iviqʼuin rix ri nixutuj ri rukʼalajirisanic ri Dios. Rix nibij chi xa e kʼilon can y chi manek chic kʼalajirisanic, ni ta chukaʼ ruyaʼic lokʼolej rutzijol, ni lokʼolej sipanic, ni akʼomanic, ni chʼoven pa jalajoj ruvech chʼabel, ni ri rukʼaxaxic tak chʼabel.

8 Kitzij ninbij cʼa chive chi ri nixutun quichin ronojel reʼ, xa man retaman ta ri utzilej rutzijol ri Cristo. Kitzij cʼa chi man rutzʼeton ta ruvech ri lokʼolej tzʼibanic, o vi rutzʼeton can, xa man kʼaxinek ta chuvech.

9 ¿La man nikatzʼet ta cami chi ri Dios xa junan ivir, vacami y benek ruvech apon y chi riqʼuin rijaʼ manek jalatajic, ni ta chukaʼ rumujal ri jaloj?

10 Vacami cʼa, vi rix itzʼucun pa ri inojibal jun dios jalatajinek y achojiqʼuin cʼo vi rumujal ri jaloj, can itzʼucun vi cʼa pa ri inojibal jun dios ri man ja ta jun Dios ri nubanalaʼ nimalej tak samaj.

11 Can kitzij vi cʼa chi xtincʼut cʼa chivech rix jun Dios ri nubanalaʼ nimalej tak samaj. Ja cʼariʼ, ri Dios richin ri Abrahám, richin ri Isaac, y richin ri Jacob. Can ja vi rijaʼ ri Dios ri tzʼucuyon ri caj y re ruvachʼulef y ronojel ri cʼo chupan.

12 Can kitzij vi, rijaʼ xutzʼuc ri Adán. Y roma ri Adán, xpe ri rutzakinen ri vinek. Y roma cʼa ri rutzakinen ri vinek, xpe ri Jesucristo. Jacʼa rijaʼ ri Tataʼixel y ri Cʼajolaxel. Roma cʼa ri Jesucristo, xpe ri colotajic quichin ri vinakiʼ.

13 Cʼa cʼariʼ, xa roma ri quicolotajic ri vinakiʼ ri xban roma ri Jesucristo, rijeʼ yecʼamer cʼa pe chuvech ri Ajaf. Jaʼ, romariʼ, checonojel ri vinakiʼ yecolotej pe, roma cʼa ri rucamic ri Cristo ri nuben ri cʼastajibel. Ri cʼastajibel riʼ xtuben chi xqueʼelesex pe chupan jun jumul varan. Chupan cʼa ri varan riʼ, can xquecʼasox vi pe conojel ri vinakiʼ roma ri ruchukʼaʼ ri Dios tok xtisilon pe ri xupunel kʼojoʼm. Ja cʼariʼ tok xquepeteyaj cʼa ri e chʼutiʼk, e nimaʼk, y checonojel xquecʼojeʼ chuvech ri rucʼojlibal, e elesan chic pe, y e solon el chuvech ri jumul ruximibal ri camic. Jariʼ ri camic richin ri chʼaculaj.

14 Ja cʼariʼ tok ri Lokʼolaxel xtukʼet tzij pa quiviʼ rijeʼ. Ja cʼariʼ tok ri tzʼil, xa tzʼil nicanej vi can. Ri choj, xa choj nicanej vi can. Ri niquicot, cʼa niquicot na can, y ri nibison, cʼa nibison na can.

15 Vacami cʼa, ivonojel rix ri itzʼucun pa ri inojibal jun dios ri man nitiquir ta nuben nimalej tak samaj, ninvajoʼ nincʼutuj cʼa chive quereʼ: ¿La e kʼaxinek can chic ronojel reʼ, achojchij in chʼovinek vi? ¿La apovinek chic cami ri ruqʼuisibel? Kitzij ninbij chive chi cʼa manjani, y ri Dios man rukʼilon ta riʼ, xa cʼa yerubanalaʼ na ri nimalej tak samaj.

16 Vaveʼ cʼa, ¿la man ta nikamey cʼa roj achique ri xuben can ri Dios? ¿Achique cami vinek etamayon ri nimalej tak rubanobal ri Dios?

17 Roma cʼa ri ruchʼabel rijaʼ, can xetzʼucutej vi ri caj y re ruvachʼulef. Que cʼa chukaʼ riʼ, xtzʼucutej pe ri vinek riqʼuin ri rupokolaj re ruvachʼulef, roma ri ruchukʼaʼ ri ruchʼabel rijaʼ. ¿Achique cami cʼa xtibin chi man je ta reʼ nimalej tak banobel, y chi xa man e banon ta chʼakaʼ chic nimalej tak banobel roma ri ruchukʼaʼ ri ruchʼabel?

18 ¿Achique cʼa xtibin chi ri Jesucristo man xeruben ta e qʼuiy nimalej tak jebel banobel? Xebanatej cʼa chukaʼ e qʼuiy nimalej tak jebel banobel coma ri lokʼolej jiquibanelaʼ.

19 Can e qʼuiy nimalej tak banobel xebanatej pa ri kʼij riʼ. ¿Achique cʼa roma tok xukʼil ta riʼ ri Dios, richin man ta chic rijaʼ jun Dios ri nubanalaʼ cʼa nimalej tak banobel vi rijaʼ xa man jalatajinek ta? Can kitzij cʼa ninbij chive chi ri Dios can man nujel ta riʼ. Vi ta nujel cʼariʼ, xa xtukʼil ta riʼ richin man ta chic rijaʼ ri Dios. Xa jacʼa rijaʼ can cʼa vi na ri Dios, y rijaʼ jun Dios ri nubanalaʼ nimalej tak banobel.

20 Yetaneʼ cʼa ri nimalej tak banobel chiquicojol ri calcʼual ri achiʼaʼ xa roma rijeʼ yeyojyaj can roma manjun niquinimalaʼ. Yeʼel cʼa el chupan ri chojmilej rubeyal y man quetaman ta ruvech ri Dios achojiqʼuin rucʼamon vi niquicukubaʼ quiʼ.

21 Can kitzij vi ninbij chive chi xabachique ri niniman richin ri Cristo y man nuben ta caʼiʼ rucʼuʼx, xtiyaʼox cʼa chire xabachique ri xtucʼutuj chire ri Tataʼixel pa rubiʼ ri Cristo. Queriʼ rusujun can chique checonojel ri vinakiʼ chijun re ruvachʼulef.

22 Roma can kitzij vi cʼa, ri Jesucristo, ri Rucʼajol ri Dios, xchʼo cʼa quiqʼuin ri rutijoxelaʼ ri xecanej can. Chukaʼ xchʼo quiqʼuin checonojel ri rutijoxelaʼ tok cʼa xcacʼaxaj na ri nimalej molaj vinakiʼ, y quereʼ xubij chique: Quixbiyin cʼa chuvech chijun re ruvachʼulef y tichʼabalij ri utzilej rutzijol chique checonojel.

23 Cʼa cʼariʼ, ri niniman y nikasex chuxeʼ yaʼ, can xticolotej vi. Jacʼa ri man xtiniman ta, xa xtetzelex can.

24 Ri retal ri xquequitzekelbej ri yeniman e jareʼ: Pa nubiʼ yin, xtiquelesaj el aj tzayiʼ, xquechʼo pa chʼakaʼ chic chʼabel, y xquequichop tak cumetz. Vi xticuqʼuiyaʼaj xabachique camisanel yaʼ, xa man xquerunek ta cʼa. Xtiquiyaʼ cʼa quikʼaʼ pa quiviʼ ri yavaʼiʼ, y rijeʼ xquecʼachoj.

25 Chukaʼ ri niniman richin ri nubiʼ yin, y man nuben ta caʼiʼ rucʼuʼx, chuvech rijaʼ xquenjiquibaʼ ronojel ri nuchʼabel, cʼa pa ruchiʼ re ruvachʼulef.

26 Vaveʼ cʼa, ¿achique nitiquir nupabaʼ riʼ chuvech ri rusamaj ri Ajaf? ¿Achique nitiquir cʼa nuxutuj el ri ruchʼabel? ¿Achique cʼa xtuyec riʼ chirij ri ronojel tiquirel ruchukʼaʼ ri Ajaf? ¿Achique xtixovan ri rusamaj ri Ajaf? ¿Achique cami xtetzelan ri ralcʼual ri Cristo? Tichʼoboʼ cʼa rij, rix ivonojel ri yixetzelan richin ri rusamaj ri Ajaf, roma can xtimeyelaʼ vi, y xquixcom.

27 Roma cʼariʼ, man cʼa tivetzelaj, y man timey. Xa tivacʼaxaj cʼa ri ruchʼabel ri Ajaf y ticʼutuj cʼa ri ruchʼabel ri Ajaf y ticʼutuj cʼa chire ri Tataʼixel, pa rubiʼ ri Jesús, xabachique ri nicʼatzin chive. Man cʼa ticʼojeʼ caʼiʼ icʼuʼx. Xa tinimaj, y tibanaʼ cʼa jun bey chic achiʼel pa ri ojer tak kʼij. Quixámpe cʼa riqʼuin ri Ajaf riqʼuin ronojel ri ivánima, y tichojmirisaj cʼa ri icolotajic riqʼuin xibinriʼil, y baybotriʼil chuvech rijaʼ.

28 Tinojij cʼa chi utzil chupan ri kʼij richin ri itejtobenic. Tivelesaj cʼa el iviʼ chupan ronojel tzʼil. Man cʼa ticʼutuj kʼij richin nicukirisaj ri itzel irayibal. Xa ticʼutuj cʼa riqʼuin chʼiquiban covil chi man ta xtiyaʼ kʼij chi yixkaka chupan manjun itzel yukʼbel. Xa ticʼutuj cʼa richin xtisamajij ri kitzij y cʼaslic Dios.

29 Tichajij cʼa iviʼ richin man yixkasex ta chuxeʼ yaʼ vi man ix rucʼamon ta. Tichajij cʼa iviʼ richin chi man yixcʼuluman ta apon riqʼuin ri lokʼolej vaʼin richin ri Cristo, vi xa man ix rucʼamon ta. Xa tichajij cʼa iviʼ richin niben ronojel, tok can ix rucʼamon vi. Tibanaʼ cʼa pa rubiʼ ri Jesucristo, ri Rucʼajol ri cʼaslic Dios. Vi niben cʼa quereʼ y yixcochʼon, cʼa pa ruqʼuisibel, can man xquixelesex ta vi el.

30 Vaveʼ cʼa, yichʼo iviqʼuin, achiʼel vi ta yichʼo el chiquicojol ri caminakiʼ. Roma yin vetaman chi can xtivacʼaxaj vi ri nuchʼabel.

31 Man cʼa quinivetzelaj roma ri man choj ta nubanon. Chukaʼ cʼa, man cʼa tivetzelaj ri nataʼ roma ri man choj ta rubanon rijaʼ, ni ta chukaʼ ri xetzʼiban can nabey chuvech rijaʼ. Xa timatioxij cʼa chire ri Dios, roma rijaʼ rukʼalajirisan pe chivech ri man choj ta kabanon richin queriʼ, ri utzilej inojibal rix xticʼo ruviʼ nim chuvech ri kanojibal roj.

32 Vacami cʼa, roj katzʼiban re retal banobel reʼ achiʼel ri ketaman roj. Kacusan cʼa ri chʼutiʼk tak retal ri quibiniʼan chikacojol roj ri egipcio jalatajinek. Ri tak retal riʼ e kʼaxinek pe kiqʼuin, y e jalatajinek koma roj, achiʼel cʼa ri rubixiquil ri kachʼabel.

33 Vaveʼ cʼa, vi ta ri xaxilej tak chʼichʼ ri kacʼuan xa jubaʼ ta cʼa nim, xojtzʼiban ta cʼa pan hebreo. Man riqʼuin vi cʼariʼ, ri hebreo jalatajinek can koma roj chukaʼ. Roma cʼariʼ, vi ta xojtzʼiban can pan hebreo, can kitzij vi chi man ta cʼa xtivil manjun ri man choj ta rubanon chupan ri retal banobel ri katzʼiban.

34 Jacʼa ri Ajaf retaman ri katzʼiban can. Retaman chukaʼ chi manjun chic vinakul retaman ri kachʼabel roj. Romariʼ tok rijaʼ runucʼun apon ri rubaniquil richin xtikʼaxex re vuj reʼ pa jun chic chʼabel.

35 Ronojel cʼareʼ, e tzʼiban can richin chi cʼo cʼa banel richin nikachʼej el ri katziak chuvech ri quiquiqʼuel ri kachʼalal ri yeyojyaj can, roma manjun niquinimalaʼ.

36 Vaveʼ cʼa, queriʼ karayin chique ri kachʼalal, richin queriʼ, yetzolitej pe chic riqʼuin ri etamabel chirij ri Cristo. Jariʼ xa can junan vi riqʼuin ri xquicʼutuj akʼanij chire ri Dios conojel ri chojlaxelaʼ ri xecʼaseʼ chupan re ruvachʼulef reʼ.

37 Tuyaʼ cʼa kʼij ri Ajaf Jesucristo chi xtibanatej ri xquicʼutuj akʼanij chire ri Dios, achiʼel cʼa ri quicukubabel cʼuʼx rijeʼ. Man cʼa tumestaj na ri Dios ri Tataʼixel ri cʼulanen tzij ri rubanon can quiqʼuin ri rujayul ri Israel. Queruturusaj cʼa rijeʼ jantapeʼ, roma ri cukubabel cʼuʼx riqʼuin ri rubiʼ ri Jesucristo. Amen.