1 Can kitzij vi chi yin Moroni ninqʼuis rutzʼibaxic ri retal banobel richin ri nataʼ Mormon. Can kitzij vi chi xaxe e cʼo jubaʼ chic ri nintzʼibaj. Jariʼ ri xubij pe ri nataʼ chi quentzʼibaj.

2 Can kitzij vi chi e cʼo ri Nefiʼiʼ ri xeʼanimej pa ri ruvachʼulef pa ri rajxocon kʼij. Xcʼulvachitej cʼa chi chirij cʼa ri nimalej y cʼayevilej chʼaʼoj riʼ chiriʼ pa Cumora, ri Lamani xequicanoj ri Nefiʼiʼ riʼ y xequicamisaj checonojel rijeʼ.

3 Ri nataʼ chukaʼ xcamisex coma rijeʼ, y yin in cʼo can nuyon oc richin nintzʼibaj ri bisel tzijonic chirij ri quivulatajic ri nuvinakul. Can kitzij vi cʼa, chi rijeʼ e qʼuisinek chic y yin nintakej cʼa ri rupixaʼ ri nataʼ. Man vetaman ta cʼa vi xquinquicamisaj yin chukaʼ, o xa manek.

4 Roma cʼariʼ, yin xtintzʼibaj ri retal banobel y xtinvevaj chupan ri ulef. Cʼariʼ can manek vi rubanon ri xtincʼulvachij.

5 Can kitzij vi chi ri nataʼ rubanon re retal banobel reʼ y rutzʼiban can ri ricʼaʼtz. Yin chukaʼ xtintzʼibaj ta can, vi ta cʼo cʼojlibel chuvech ri xaxilej tak chʼichʼ. Man riqʼuin vi riʼ, can manek vi cʼojlibel, y maneck cʼa chʼichʼ cʼo viqʼuin, roma xa nuyon chic in cʼo. Ri nataʼ xcamisex cʼa chupan ri chʼaʼoj, achiʼel cʼa chukaʼ ronojel ri nuvinakul. Manek cʼa ri vachibil y manek chukaʼ acuchi yibe vi. Man vetaman ta cʼa jampeʼ chic kʼij xtuyaʼ ri Ajaf ri nucʼaslen.

6 Can kitzij vi chi e kʼaxinek can jukʼo junaʼ tok tipe ri Kajaf, ri Kacolonel.

7 Can kitzij vi cʼa chi ri Lamaniʼ e quicanalon pe ri nuvinakul ri Nefiʼiʼ pa ronojel tinamit, y pa ronojel cʼojlibel. Vacami e manek vi ri nuvinakul. Janíla cʼa nim ri quitzakinen. Jaʼ, nim y cʼayef ri vulatajic quichin ri nuvinakul yin, ri Nefiʼiʼ.

8 Can kitzij vi cʼa chi ja ri rukʼaʼ ri Ajaf ri banayon richin. Chukaʼ cʼa, vacami ri Lamaniʼ cʼa niquichapalaʼ na queʼ chiquivech rijeʼ. Chuvech chijun re ruvachʼulef, can jutakel vi rijeʼ yecamisalon y niquibiyinirisaj quiqʼuel. Can manjun vi etamayon jampeʼ xtiqʼuis ri camisanel oyoval.

9 Vaveʼ cʼa, vacami manjun chic ninbij cʼa chiquij rijeʼ, roma manjun vi chic, xaxe ri Lamaniʼ y ri elekʼomaʼ cʼa e cʼo chuvachʼulef.

10 Chukaʼ cʼa, manek chic ri etamayon ruvech ri kitzij Dios. Xaxe ri rutijoxelaʼ ri Jesús ri xecanej can chupan re ruvachʼulef, cʼa tok can janíla vi nim ri quetzelal ri vinakiʼ. Ja cʼariʼ tok ri Ajaf man xuyaʼ ta chic kʼij richin chi xecanej can quiqʼuin ri vinakiʼ, y manjun achin retaman acuchi e cʼo vi chuvech re ruvachʼulef.

11 Can kitzij vi chi ri nataʼ, chukaʼ yin, e katzʼeton, y rijeʼ quibanon lokʼolej samaj pa kaviʼ.

12 Ri xticʼulun richin re retal banobel reʼ y man xtretzelaj ta, roma achique ri man choj ta rubanon ri cʼo chupan, can xtretamaj vi chʼakaʼ chic naʼoj e nim chiquivech re naʼoj reʼ. Vaveʼ cʼa, yin in Moroni, y vi ta cʼo banel, xtinkʼalajirisaj ta ronojel chivech.

13 Can kitzij vi chi ninqʼuis ri nutzijonic chiquij re vinakul reʼ. Yin in rucʼajol ri Mormon y ri nataʼ aj ri rijaʼtzul ri Nefi.

14 Ja yin ri yinevan can richin re retal banobel reʼ riqʼuin ri Ajaf. Ri xaxilej tak chʼichʼ xa manek quicʼaʼtz roma ri rubin can ri Ajaf. Roma rijaʼ can xubij vi chi manjun xticʼojeʼ cʼa quiqʼuin ri xaxilej tak chʼichʼ richin ta nichʼacon. Man riqʼuin vi riʼ, janíla nim rejkalen ri retal banobel. Ri xtelesan pe richin pa sakil can xtiturusex vi roma ri Ajaf.

15 Roma manjun xticʼojeʼ ruchukʼaʼ richin xtrelesaj pe pa sakil, xaxe vi ri Dios xtuyaʼ cʼa chire. Roma ri Dios nurayij chi nibanatej riqʼuin ri tzuʼbel jiquiban riqʼuin ri rucʼojlemal rijaʼ. Chukaʼ jiquiban riqʼuin ri rutzil quivech ri ojer ruvinak ri Ajaf ri can e quiran vi. Ja quiqʼuin can rijeʼ xuben vi rijaʼ ri cʼulanen tzij.

16 Nim cʼa ruva rukʼij ri xtelesan pe re retal banobel reʼ pa sakil, roma cʼa rijaʼ xtrelesaj pe pa kʼekuʼm, cʼa pa sakil, achiʼel cʼa nubij ri ruchʼabel ri Dios. Kitzij cʼa chi xtelesex pe chupan ri ulef y xtichʼichʼan pe chupan ri kʼekuʼm. Cʼariʼ, ri vinakiʼ xtiquetamaj chirij. Ronojel reʼ xtibanatej can roma ri ruchukʼaʼ ri Dios.

17 Vacami, vi e cʼo chupan re etal banobel reʼ ri man choj ta rubanon, jariʼ xa richin jun achin. Can kitzij vi chi roj man ketaman ta chirij manjun ri man choj ta rubanaon chupan. Man riqʼuin vi riʼ, ri Dios retaman ronojel. Roma cʼariʼ, ri xtetzelan richin reʼ, tuchajij cʼa riʼ, roma xa riqʼuin cʼa juba, xticʼojeʼ pa rukʼaʼ ri kʼakʼ richin ri xibalbay.

18 Tok cʼo cʼa jun ri nubij quereʼ: Ticʼutuʼ chinuvech o xquixinsoc, tuchajij cʼa riʼ, roma riqʼuin jubaʼ rijaʼ nucʼutuj ri xa can kʼilon vi roma ri Dios.

19 Roma can kitzij vi chi ri xtikʼaton tzij chek chaʼnin, can que vi chukaʼ riʼ xtikʼat tzij chek chaʼnin pa ruviʼ rijaʼ. Roma ri rutojbal xa can junan vi riqʼuin ri rusamaj. Roma cʼariʼ, ri nisocon can xtisocotej vi roma ri Ajaf.

20 Titzuʼ pe cʼa ri nubij ri lokʼolej tzʼibanic: Ri vinek man xtisocon ta y man xtikʼaton ta tzij. Roma cʼa, ri kʼatoj tzij xa vichin yin, nichaʼ ri Ajaf. Ri tzolibel banobel xa vichin yin chukaʼ, y can ja vi yin ri xquiyaʼon rajel ruqʼuexel.

21 Ri Ajaf rubanon jun cʼulanen tzij quiqʼuin ri ruvinak. Jecʼa rijeʼ ri e rujayul ri Israel. Ri xtitzijon cʼa oyoval o cʼaxinic chirij ri rusamaj ri Ajaf, y chiquij ri ruvinak ri Ajaf, xa jubaʼ chic man nicʼuk el y nitorix ka pa ri kʼakʼ. Xtubij cʼa quereʼ: Roj xtikuvulaj ri rusamaj ri Ajaf y ri Ajaf xa xtumestaj can ri cʼulanen tzij ri xuben can quiqʼuin ri e aj rujayul ri Israel. Jacʼa ri yebanon queriʼ, xa jubaʼ chic man yecʼuk el y yetorix ka pa ri kʼakʼ.

22 Roma cʼa ri jumul rurayibal ri Ajaf can xquetzʼakatisex vi, cʼa tok ronojel ri rusujunic xquekʼajer can.

23 Tinicʼoj cʼa quipan ri lokʼolej rutzijol ri xeruyaʼ ri Isaías. Vaveʼ cʼa, manjun banel richin yentzʼibaj can. Can kitzij vi chi ninbij chive chi ri chojlaxelaʼ ri xenabiyej chinuvech yin ri xecʼojeʼ cʼa chupan re ruvachʼulef reʼ, rijeʼ xquechʼo cʼa akʼanij, jaʼ, can chupan vi ri pokolaj xquechʼo vi akʼanij riqʼuin ri Ajaf. Cʼa cʼariʼ, can jic vi chi qʼues ri Ajaf y que cʼa chukaʼ riʼ rijaʼ can jic vi man xtumestaj ta ri cʼulanen tzij ri xuben can quiqʼuin.

24 Rijaʼ retaman cʼa ri lokʼolej quichʼoven rijeʼ, y chukaʼ chi xquiben ri chʼoven riʼ xaxe pa quiviʼ ri cachʼalal. Rijaʼ chukaʼ retaman ri quicukubabel cʼuʼx rijeʼ, roma pa rubiʼ rijaʼ, rijeʼ xetiquir xequelesaj el tzuputzuc tak juyuʼ, y pa rubi rijaʼ, rijeʼ xetiquir xquiben chi xsilon ri ruvachʼulef. Riqʼuin cʼa ri ruchukʼaʼ ri ruchʼabel rijaʼ, rijeʼ xetiquir xquiben chi tzʼapibel tak jay xetzak cʼa pa ri ulef. Kitzij cʼa, chi ri porobel man xtiquir ta xerunek, ni ta chukaʼ ri cʼuxunel tak chicopiʼ, ni ta chukaʼ ri camisanel tak cumatziʼ, roma cʼa ri ruchukʼaʼ ri ruchʼabel ri Ajaf.

25 Can kitzij vi cʼa chi rijeʼ can xechʼo vi akʼanij riqʼuin ri Ajaf, pa ruviʼ ri vinek achojche xtuyaʼ vi kʼij ri Ajaf richin xtrelesaj pe re vuj reʼ.

26 Man rucʼamon ta cʼa chi manjun nubij chi man xtipe ta re vuj reʼ. Roma can jic vi xtipe, roma ri Ajaf rubin can. Xtel cʼa pe chupan ri ulef roma cʼa ri rukʼaʼ ri Ajaf, y manjun ta nitiquir nikʼaton richin. Xtipe cʼa chupan ri jun kʼij tok xtibitej chi manek chic nimalej tak samaj y xtipe cʼa achiʼel vi ta cʼo jun ri xtichʼo pe chiquicojol ri caminakiʼ.

27 Xtipe cʼa chupan jun kʼij tok ri quiquiqʼuel ri chojlaxelaʼ can xtichʼo vi akʼanij riqʼuin ri Ajaf chiquij ri evan tak molaj y ri samaj richin kʼekuʼm.

28 Kitzij cʼa, chi xtipe pa jun kʼij tok xtixutux ri ruchukʼaʼ ri Dios. Chukaʼ ri tak kʼataj xquetzʼilopisatej y xtiquinimirisaj quiʼ pa cánima. Kitzij cʼa chi chupan ri kʼij riʼ, ri yukenelaʼ quichin tak kʼataj y ri tijonelaʼ xtiquinimirisaj quiʼ. Jaʼ, y xquequixochʼij ri e cʼo chupan ri quikʼataj.

29 Xtipe cʼa pa jun kʼij tok xtacʼaxatej ka rutzijol chiquij tak kʼakʼ y nimalej tak cakʼikʼ y sibilej tak sutzʼ pa chʼakaʼ chic ruvachʼulef.

30 Chukaʼ xtacʼaxatej ka chiquij ri camisanel tak oyoval, y ri rutzijol chiquij camisanel tak oyoval, y ri silonel pa jalajoj ruvech cʼojlibel.

31 Kitzij cʼa, chi xtipe pa jun kʼij tok e cʼo nimalej tak tzʼilol chuvech re ruvachʼulef. Xquebanatej camisanic, elekʼ, tzʼucuj tak tzij, kʼoloj, tzʼiʼinic, y ronojel ruvech itzel banobel. Pa ri kʼij riʼ e qʼuiy xtiquibij quereʼ: Tabanaʼ reʼ, o tabanaʼ laʼ, y xa manek rubanon, roma ri Ajaf xtucol ri nibanon queriʼ pa ri ruqʼuisibel kʼij. Joʼcʼa oc quivech ri yebin can queriʼ, roma e cʼo cʼa pa ri yaʼal richin qʼueyilel y chupan ri ximibel richin etzelal.

32 Jaʼ, xtipe cʼa pa jun kʼij tok xquepabex tak kʼataj ri xtiquibij quereʼ: Quixámpe viqʼuin y pa ruqʼuexel ri ipuak, xticuyutej can ri imac.

33 Rix ri ix vinakiʼ ix itzel, ix tzakinek, y covirisan chic ri ivánima. ¿Achique cʼa roma tok e ipaban ka chive tak kʼataj richin chi yixchʼacon? ¿Achique cami roma tok ijalon rubaniquil ri lokʼolej ruchʼabel ri Dios, richin queriʼ xtetzelex ka ri ivánima? Vaveʼ cʼa, queʼitzuʼ ri kʼalajirisanic richin ri Dios, roma can petenek vi ri kʼij tok checonojel cʼo chi xquekʼajer.

34 Can kitzij vi chi ri Ajaf e rukʼalajirisan pe chinuvech nimalej y jebel tak naʼoj chiquij ri xa jubaʼ chic man nipe. Jariʼ, chupan cʼa ri kʼij tok ronojel reʼ xquecʼulvachitej chiʼicojol.

35 Can kitzij vi chi yichʼo iviqʼuin achiʼel vi ta xa ix cʼo vaveʼ viqʼuin, stapeʼ xa man ix cʼo ta pe. Man riqʼuin vi riʼ, kitzij chi ri Jesucristo ix rucʼutun can chinuvech, y yin vetaman ri nibanalaʼ.

36 Vetaman cʼa chi rix ninimirisalaʼ iviʼ, y man e cʼo ta manjun, xaxe e jubaʼ oc, ri man niquinimirisaj ta quiʼ, y man niquicusaj ta tziek jotol oc rajel, y man niquiben ta ri xochʼinic, ri cʼaxinic, ri itzel rayibel, ri okotanic, y ronojel ruvech itzel banobel. Ri ikʼataj, jaʼ, can checonojel vi ri kʼataj e tzʼilopisan chic roma ri runimirinen ri ivánima.

37 Roma can kitzij vi, nipokonaj ri ipuak, y ri cʼo iviqʼuin, y ri jebelilej itziak, y ri quivikobel ri ikʼataj. Janíla nipokonaj cʼa ronojel reʼ chiquivech ri mebaʼiʼ, y ri e cʼo nicʼatzin chique, y ri yavaʼiʼ, y ri pokon cʼa quicʼuʼx.

38 Rix ri ix tzʼil, ri xa caʼiʼ ipalej, ri ix tijonelaʼ ri nicʼayij cʼa iviʼ roma ri achique nikʼey. ¿Achique cʼa roma tok itzʼilopisan ri lokʼolej rukʼataj ri Dios? ¿Achique cami roma tok yixqʼuix niqʼuen ka pan iviʼ ri rubiʼ ri Cristo? Ri vinakiʼ ri e cʼo chuvachʼulef niquiyaʼ ikʼij rix. Romariʼ tok man ninojij ta chi janíla nim rejkalen ri jumul quicoten chuvech cʼa ri kʼaxomal ri man qʼuisel ta. ¿Achique cami roma tok queriʼ ibanon?

39 Rix xa nivik cʼa iviʼ riqʼuin ri manek rucʼaslen. Cʼariʼ, niyaʼ kʼij chi ri yenum, y ri e chʼanayiʼ, y ri yavaʼiʼ, y ri e chʼanayiʼ, y ri yavaʼiʼ, y ri pokon ri quicʼuʼx, y ri e cʼo nicʼatzin chique, yekʼax pe chivech y xa manjun ninaʼ ta rix. ¿Achique roma tok queriʼ niben?

40 Yeʼiben ri evan tak man richin chi yixchʼacon. Riqʼuin cʼariʼ, niben chi ri malcaniʼ ixokiʼ yeʼokʼ chuvech ri Ajaf. Riqʼuin cʼa chukaʼ riʼ, niben chi ri mebaʼiʼ tak alcʼualaʼ yeʼokʼ chuvech ri Ajaf chukaʼ. Queriʼ cʼa niben chi ri ruquiqʼuel ri quitataʼ y ri cachijilal niquicʼutuj akʼanij chire ri Ajaf chupan ri ruvachʼulef chi tutzolij cʼa ri itzel banobel pan iviʼ rix. ¿Achique cami roma tok queriʼ ibanon?

41 Can kitzij vi chi ri rutzaqʼuibel ri kʼatoj tzij jekel chic pan iviʼ. Petenek cʼa ri kʼij tok rijaʼ cʼo chi xtutzolij ka pan iviʼ rix ri quiquiqʼuel ri chojlaxelaʼ, roma man xtucochʼ ta chic ri cokʼen rijeʼ.