1 Vacami cʼa ninqʼuis ri nutzijonic chirij ri quivulatajic ri nuvinakul, ri Nefiʼiʼ. Xcʼulvachitej cʼa chi roj xojbiyin el chiquivech ri Lamaniʼ.

2 Yin Mormon xintzʼibaj cʼa jun vuj chire ri rutataʼal tinamit quichin ri Lamaniʼ, y xincʼutuj chire chi tuyaʼcʼa kʼij chike richin yekamol ronojel ri kavinakiʼ pa ri ruvachʼulef rubiniʼan Cumora, chunakaj jun loman juyuʼ rubiniʼan Cumora, y chiriʼ xtikachop cʼa ki quiqʼuin rijeʼ.

3 Xcʼulvachitej cʼa chi ri rutataʼal ri tinamit quichin ri Lamaniʼ xuyaʼ cʼa chike ri xincʼutuj chire.

4 Cʼariʼ, xcʼulvachitej cʼa chi xojbe cʼa pa ri ruvachʼulef Cumora, y xkaben ri kamoʼc chuxeʼ ri loman juyuʼ Cumora. Riʼ cʼo chupan jun ruvachʼulef riqʼuin qʼuiy tak yaʼ, raken tak yaʼ, y tzʼucubel tak yaʼ. Vaveʼ cʼa, xkarayij chi nicʼoje ta kuchukʼaʼ richin xkachʼec ta ri Lamaniʼ.

5 Tok xa e kʼaxinek chic el belejlajuj cʼal cajiʼ junaʼ, jariʼ tok roj e kamolon pe chic conojel ri kavinak chupan ri ruvachʼulef Cumora.

6 Xcʼulvachitej cʼa chi tok xekamol yan pe conojel ri kavinak chupan ri ruvachʼulef Cumora, can kitzij vi chi yin Mormon xiruchop rijixinen, y can vetaman vi chi jareʼ ri ruqʼuisibel chʼaʼoj quichen ri nuvinak. Ri Ajaf xubij can chuve chi man tinyaʼ cʼa kʼij richin chi ri lokʼolej retal banobel ri kʼaxinek pe coma ri katataʼ, xquetzak ta cʼa pa quikʼaʼ ri Lamaniʼ. Roma cʼa ri Lamaniʼ xtiquivulaj ta cʼa. Roma cʼariʼ, xinben re retal banobel reʼ riqʼuin ri tzʼiban can chuvech ri xaxilej tak chʼichʼ richin ri Nefi. Cʼariʼ, xenvevaj can chupan ri loman juyuʼ Cumora ronojel ri retal banobel ri e yaʼon can chuve roma ri rukʼaʼ ri Ajaf. Xaxe man xenvevaj ta re jun, caʼiʼ, oxiʼ xaxilej tak chʼichʼ reʼ ri xenyaʼ chire ri nucʼajol Moroni.

7 Xcʼulvachitej cʼa chi ri nuvinak quiqʼuin ri quixjayilal y ri calcʼual, vacami xequitzʼet ri molaj oyovanelaʼ quichin ri Lamaniʼ e petenek chiquij. Riqʼuin cʼa ri cʼayevilej xibinriʼil riʼ richin ri camic ri nunojisaj ri cánima checonojel ri e itzel, rijeʼ xcoyobej cʼa chi xeʼokaʼ pe.

8 Xcʼulvachitej cʼa chi rijeʼ xepe chikij richin niquichop quiʼ kiqʼuin, y chiquijujunal ri vinek xenoj riqʼuin xibinriʼil, roma can janíla vi e qʼuiy rijeʼ.

9 Cʼariʼ, xcʼulvachitej chi xquiqʼuek cʼa quiʼ chiquij ri nuvinak riqʼuin ri tzaqʼuibel, y ri cʼakbel chʼab, y ri chʼab, y ri iquiej, y riqʼuin ronojel ruvech rusamijibel ri camisanel oyoval.

10 Xcʼulvachitej cʼa chi checonojel ri achiʼaʼ vichin yin xecamisex ka, jaʼ, checonojel ri juchuvi vokʼo achiʼaʼ ri e cʼo viqʼuin, y yin xisoc y xitzak pa quinicʼajal. Ja cʼariʼ, ri Lamaniʼ xekʼax acuchi in cʼo vi yin y man xinquicamisaj ta chiriʼ.

11 Cʼa cʼariʼ, tok rijeʼ e icʼovinek chic chikacojol, y e quicamisan checonojel ri nuvinak, jariʼ tok xaxe juvinek cajiʼ chike xojcʼojeʼ can. Chikacojol cʼa roj cʼo vi chukaʼ ri nucʼajol Moroni. Man xojcom ta cʼa quiqʼuin ri nuvinak. Pa ri rucaʼn kʼij tok ri Lamaniʼ e tzolinek chic pa ri quimoʼc, roj oj cʼo pa ruviʼ ri loman juyuʼ Cumora, y xekatzʼet e camisatajinek can ri juchuvi vokʼo chique ri nuvinakul ri xinabiyej yin chiquivech.

12 Xekatzʼet chukaʼ ri juchuvi vokʼo chique ri nuvinakul ri xeyukex roma ri nucʼajol Moroni.

13 Vaveʼ cʼa, chukaʼ xetzak ri juchuvi vokʼo vinakiʼ richin ri Gidgidona, y chukaʼ rijaʼ pa quinicʼajal.

14 Chukaʼ xtzak ri Lama quiqʼuin ri juchuvi vokʼo ruvinak rijaʼ. Chukaʼ xtzak ri Gilgal quiqʼuin ri juchuvi vokʼo ruvinak. Chukaʼ ri Lima xtzak quiqʼuin ri juchuvi vokʼo ruvinak. Chukaʼ xtzak ri Joneam quiqʼuin ri juchuvi vokʼo ruvinak. Chukaʼ cʼa xetzak ri Camania, ri Moronia, ri Antionum, ri Xiblom, ri Xem, ri Jos, chiquijujunal quiqʼuin ri juchuvi vokʼo quivinak rijeʼ.

15 Xcʼulvachtiej cʼa chi e cʼo lajuj chic ri xetzak roma ri tzaqʼuibel, chiquijujunal quiqʼuin ri juchuvi vokʼo quivinak rijeʼ. Kitzij cʼa chi ronojel ri nuvinakul xetzak. Ri quichʼacul, ri quibakil, ri quiquiqʼuel ri caminakiʼ e cʼo can chuvech re ruvachʼulef. Xa e yaʼon can chiriʼ coma ri xecamisan can quichin richin chi yechuvir pa ruviʼ ri ruvachʼulef, y yekʼey, y yetzolin chic pa ri ulef acuchi xeʼel vi pe. Xaxe cʼa e qʼues na ri juvinek cajiʼ ri e cʼo viqʼuin y chukaʼ e jubaʼ ri xeʼanimej cʼa chupan ri tak ruvachʼulef pa ri rajxocon kʼij y e jujun ri xquitun qui quiqʼuin ri Lamaniʼ.

16 Xpax cʼa ri vánima roma ri bis coma ri nuvinakul ri xecom. Xinrek nuchiʼ y xinbij:

17 Rix ri ix vinakul jebel, ¿achique cami roma tok ix elenek cʼa el chupan ri rubeyal ri Ajaf? Rix ri ix vinakul jebel, ¿achique cami rubeyal tok xixovaj ri Jesús ri xpaʼeʼ, e jakel pe ri rukʼaʼ richin yixrucʼul?

18 Can kitzij vi, man ta cʼa xiben queriʼ, man ta xixtzak cʼa. Man riqʼuin vi cʼariʼ, can ix tzakinek vi y yin ninvokʼej ri isachonic.

19 Rix ri ix jebel tak cʼajol y miʼal, rix ri ix teʼej tataʼaj, rix ri ix achijilal y ixjayilal, rix ri ix vinakul jebel, ¿achique cami banel tok xixtzak ka?

20 Can kitzij vi cʼa, rix xixqʼuis cʼa, y ri nubis man xquix rutzolij ta pe chic.

21 Chaʼnin cʼa xtokaʼ ri kʼij chi ri camel ri icʼuan rix, nuqʼuen ka ri man camel ta chic Re chʼaculaj reʼ ri yeyojtej y yechuvir, cʼo chi yeʼoc chʼaculaj ri man yecom ta chic. Cʼa cʼariʼ, cʼo chi yixapon chuvech ri kʼatbel tzij richin ri Cristo richin chi nikʼat tzij pan iviʼ chirij ri isamaj. Vi can ix choj vi cʼa cʼariʼ xquixbe quiqʼuin ri ivatiʼt imamaʼ ri xenabiyej el chivech rix.

22 Cʼateʼ ta xtzolin yan pe icʼuʼx tok cʼa manjani tikaʼ chivij re nimalej vulatajic reʼ. Vacami cʼa, ix benek chic y ri Tataʼixel, ri can Jumul Tataʼixel chicaj, retaman ri ibanon. Rijaʼ xtuben cʼa iviqʼuin, achiʼel ri rukʼatoj tzij y ri rujoyovabel.