1 ’E i muri a’era, ’ua haere atu ra vau i rotopū i te mau ’āti Nephi, ’e ’ua tātarahapa ihora vau i te tapu ’o tā’u i tapu, i te nā-’ō-ra’a ē, e ’ore roa vau e tauturu ia rātou ; ’e ’ua mā’iti fa’ahou ihora rātou iā’u ’ia arata’i i tō rātou mau nu’u fa’ehau, ’e ’ua mana’o ho’i rātou ē, e ti’a iā’u ’ia fa’aora ia rātou i tō rātou mau ’ati.

2 Inaha rā, ’aita roa vau i ti’aturi, nō te mea ’ua ’ite au i te mau ha’avāra’a a te Fatu ’o tē tae mai i ni’a iho ia rātou ; ’e ’aita ho’i rātou i tātarahapa i tā rātou mau ’ohipa ’ī’ino, ’ua ’aro atu rā rātou nō te pāruru i tō rātou ora, ma te ti’aoro ’ore atu i Tei Hamani ia rātou ra.

3 ’E i muri a’era, ’ua haere mai ra te mau ’āti Lamana e ’aro ia mātou, ’e ’ua horo atu mātou i te ’oire ra nō Ioridana ; inaha rā, ’ua tūra’ihia atu rātou i muri ’e ’aita rātou i haru i te ’oire i taua taime ra.

4 ’E i muri a’era, ’ua haere fa’ahou mai ra rātou e ’aro ia mātou, ’e ’ua pāruru mātou i te ’oire. ’E tē vai ra te tahi atu ā mau ’oire i pāruruhia e te mau ’āti Nephi, ’e nō te pa’ari o te mau ha’apūra’a ’ua fifi ihora rātou ’e ’aita atu ra i ti’a ia rātou ’ia haere mai i te fenua i mua ia mātou, nō te ha’amou i te mau ta’ata o tō mātou ra fenua.

5 ’E i muri a’era, te mau fenua ato’a tā mātou i haere atu, ’e ’aita tō reira mau ta’ata i ha’aputuputuhia, ’ua ha’amouhia ïa rātou ’e te mau ’āti Lamana, ’e ’ua tāninahia tō rātou mau ’oire rarahi ’e te mau ’oire ri’i i te auahi ; ’e ’ua ma’iri ihora te toru hānere ’e hitu ’ahuru ’e ma iva o te matahiti.

6 ’E i muri a’era, ’ia tae a’era i te toru hānere ’e va’u ’ahuru o te matahiti, ’ua haere fa’ahou mai ra te mau ’āti Lamana e ’aro ia mātou, ’e ’ua ti’a atu mātou nō te ’aro ia rātou ma te mata’u ’ore ; ’āre’a rā ’ua riro te reira ’ei mea faufa’a ’ore, ’e nō te rahi o tō rātou mau ta’ata i ta’ata’ahi noa ai rātou i te mau ’āti Nephi i raro a’e i tō rātou ra ’āvae.

7 ’E i muri a’era, ’ua horo fa’ahou atu ra mātou, ’e te feiā ’oi’oi a’e i te horo i te mau ’āti Lamana ra, ’ua ora atu ïa, ’e te feiā tāere iho i te horo i te mau ’āti Lamana ra ’ua taparahihia ïa ’e ’ua ha’amou-roa-hia.

8 ’E i teienei, inaha, ’aita vau, ’o Moromona, i hina’aro ’ia fa’aahoaho i te ’ā’au o te mau ta’ata nā roto i te fa’a’itera’a atu ia rātou i te ri’ari’a rahi nō te ha’amani’ira’a toto ’e te taparahira’a ta’ata i fa’a’itehia mai i mua i tō’u nei mata ; ’āre’a rā ’ua ’ite au ē, e mea ti’a i taua mau mea nei ’ia fa’a’itehia atu, ’e e mea ti’a ato’a ho’i i te mau mea ato’a i hunahia ’ia fa’a’ite-pāpū-hia i ni’a i te mau tāpo’i fare e ti’a ai—

9 ’E e mea ti’a roa ato’a i te ’ite nō teie mau mea ’ia fa’ataehia atu i te toe’a o teie nei feiā, ’e i te mau ’Ētene ato’a ho’i, ’o tā te Fatu i parau ē, e ha’apurara rātou i teie nei feiā, ’e e fa’arirohia teie nei feiā ’ei mea faufa’a ’ore i rotopū ia rātou—no reira tē pāpa’i nei au i teie nei parau ri’i ha’apotohia, ma te mata’u i te pāpa’i i te tā’āto’ara’a o te ’ā’amu nō te mau mea i ’itehia e au ra, nō te mea tē vai ra te fa’auera’a ’o tā’u i fāri’i, ’e ’ia ’ore ato’a ’outou ’ia ’oto rahi nō te parauti’a ’ore o teie nei feiā.

10 ’E i teienei, inaha, teie tā’u e parau atu nei i tō rātou hua’ai, ’e i te mau ’Ētene ato’a ho’i ’o tei fa’aherehere i te ’utuāfare o ’Īserā’ela, ’e ’o tei māramarama ’e ’o tei ’ite nō hea mai tō rātou mau ha’amaita’ira’a.

11 ’Ua ’ite ho’i au ē, e ’oto rātou nō te ’ati rahi o te ’utuāfare o ’Īserā’ela ; ’oia ïa, e ’oto rātou nō te ha’amoura’ahia teie nei feiā ; e ’oto rātou nō te mea ’aita teie nei feiā i tātarahapa ’ia ti’a ia rātou ’ia fa’ahereherehia i roto i te rima o Iesu.

12 I teienei, ’ua pāpa’ihia teie nei mau mea i te toe’a o te ’utuāfare o Iakoba ; ’e ’ua pāpa’ihia te reira mai teie te huru, nō te mea ’ua ’ite te Atua ē, e ’ore roa te parauti’a ’ore e fa’atae mai i te reira ia rātou ; ’e e mea ti’a ho’i i te reira ’ia hunahia i te Fatu ra, ’e ’ia fa’ataehia mai i tōna ra tau mau.

13 ’E ’o teie ïa te fa’auera’a tā’u i fāri’i ; ’e inaha, e tae mai te reira mai te au i te fa’auera’a a te Fatu, i te tau e au iāna, i roto i tōna ra pa’ari.

14 ’E inaha, e fa’ataehia atu te reira i te feiā ti’aturi ’ore o te mau ’āti Iuda ; ’e teie ho’i te tumu e fa’ataehia atu ai te reira—’ia fa’a’ite-pāpū-hia rātou ē, ’o Iesu te Mesia, te Tamaiti a te Atua ora ; ’ia ti’a i te Metua ’ia fa’atupu i tāna ’ōpuara’a rahi ’e te mure ’ore, nā roto i tāna Tamaiti here rahi, te fa’aho’ira’a mai i te mau ’āti Iuda ’e ’aore rā i te ’utuāfare pā’āto’a o ’Īserā’ela, i tō rātou fenua ’āi’a, ’o tā te Fatu tō rātou Atua i hōro’a atu ia rātou, nō te fa’atupu i tāna ra fafaura’a.

15 ’E ’ia ti’aturi rahi ato’a atu ā te hua’ai o teie nei feiā i tāna ’evanelia, ’o tē tae atu ia rātou nā roto mai i te mau ’Ētene ; ’e e ha’apurarahia ho’i teie nei feiā, ’e e riro rātou ’ei mea huru ’ere’ere, ’ei feiā vi’ivi’i ’e te peu hā’iri’iri, ’o tei hau atu i te ’ino i te tahi atu feiā i ora na i rotopū ia mātou i te mātāmua, ’oia ïa, ’e i te feiā ’o tei ora na i rotopū i te mau ’āti Lamana, e nō tō rātou ti’aturi ’ore ’e te ha’amori ’īdolo i tupu ai te reira.

16 Inaha ho’i, ’ua fa’aea te Vārua o te Fatu i te tāparu noa i tō rātou mau metua, ’e ’aita te Mesia ’e te Atua i pīha’i iho ia rātou i roto i te ao nei ; ’e ’ua ha’apurara-noa-hia rātou mai te ota i mua i te mata’i ra.

17 I riro na ho’i rātou i te mātāmua ra ’ei feiā nehenehe, ’e i riro na ho’i te Mesia ’ei tīa’i māmoe nō rātou ; ’oia ïa, i arata’ihia na ho’i rātou e te Atua te Metua.

18 I teienei rā, inaha, tē arata’ihia nei rātou e Sātane, mai te ota e pe’e i mua i te mata’i ra, ’e ’aore rā mai te hō’ē pahī e tāhurihuri noa i ni’a i te mau ’are miti, ’aore e ’ie ’e ’aore ato’a e tūtau, ’e ’aore ato’a ho’i e hoe nō te fa’atere i te pahī ; ’e mai taua pahī ra, ’oia ato’a ïa rātou.

19 ’E inaha, ’ua tāpe’a mai te Fatu i tō rātou mau ha’amaita’ira’a, ’o tē ti’a ia rātou ’ia fāri’i i ni’a i te fenua nei, nō te mau ’Ētene ’o tē fāri’i i te fenua.

20 Inaha rā, a muri a’era, e tīahihia ’e e ha’apurarahia ho’i rātou e te mau ’Ētene ; ’e i muri a’e i tō rātou tīahira’ahia ’e te ha’apurarara’ahia e te mau ’Ētene ra, inaha, ’ei reira te Fatu e ha’amana’o ai i tāna ra fafaura’a ’o tāna i fafau atu ia Aberahama ’e i te ’utuāfare pā’āto’a o ’Īserā’ela.

21 ’E ’oia ato’a e ha’amana’o te Fatu i te mau pure a te feiā parauti’a, ’o tei purehia atu iāna nō rātou ra.

22 ’E i reira, e te mau ’Ētene ē, nāhea e ti’a ai ia ’outou ’ia ti’a atu i mua i te mana o te Atua, maori rā ’ia tātarahapa ’outou ’e ’ia fāriu ’ē atu i tō ’outou ra mau haere’a vi’ivi’i ?

23 ’Aita ānei ’outou i ’ite ē, tei roto ’outou i te rima o te Atua ? ’Aita ānei ’outou i ’ite ē, tei iāna te mana tā’āto’a, ’e nā roto i tāna ra parau mana rahi e ’ōtaro-’āmui-hia te fenua nei mai te parau ’ōtarohia ra ?

24 Nō reira, ’a tātarahapa ’outou, ’e ’a fa’aha’eha’a ia ’outou iho i mua iāna, ’o te fa’atae mai ’oia i tāna ha’avāra’a parauti’a i ni’a ia ’outou na—’o te haere ti’a atu te hō’ē toe’a nō te hua’ai o Iakoba i rotopū ia ’outou na mai te liona ra, ’e ’a hahae fa’ahu’ahu’a ai ia ’outou ’e ’aore te hō’ē noa atu e ti’a ’ia fa’aora.