1 ’E i teienei, tē fa’aoti nei au i tā’u pāpa’a parau nō ni’a i te ha’amoura’ahia o tō’u ra mau ta’ata, ’oia ho’i, te mau ’āti Nephi. ’E i muri a’era, ’ua haere ti’a atu ra mātou i mua i te mau ’āti Lamana.

2 ’E ’ua pāpa’i au, ’o Moromona, i te hō’ē ’episetole i te ari’i o te mau ’āti Lamana, ma te ani atu iāna ’ia fa’ati’a mai ’oia ia mātou ’ia ha’aputuputu ’āmui i tō mātou mau ta’ata i te fenua ra nō Kumora, i pīha’i iho i te hō’ē ’āivi i parauhia ’o Kumora, ’e i reira e ti’a ai ia mātou ’ia ’aro atu ia rātou.

3 ’E i muri a’era, ’ua fa’ati’a mai te ari’i o te mau ’āti Lamana i te mea ’o tā’u i hina’aro.

4 ’E i muri a’era, ’ua haere atu ra mātou i te fenua ra nō Kumora, ’e ’ua fa’ati’a ihora i tō mātou mau ti’ahapa ē ’ati noa a’e te ’āivi ra o Kumora ; ’e e fenua ho’i teie tei reira e rave rahi mau pape, mau ’ānāvai pape, e mau pape piha’a ; ’e i teie vāhi ’ua ti’aturi mātou ’ia upo’oti’a i ni’a a’e i te mau ’āti Lamana.

5 ’E ’ia ma’iri a’era te toru hānere ’e va’u ’ahuru ’e ma maha o te matahiti, ’ua ha’aputuputu mai mātou i te toe’a o tō mātou mau ta’ata ato’a i te fenua ra nō Kumora.

6 ’E i muri a’era, ’ia oti a’era tō mātou mau ta’ata i te ha’aputuputuhia mai i te vāhi hō’ē i te fenua ra nō Kumora, inaha, ’ua ruhiruhiā vau, ’o Moromona ; ’e nō te mea ’ua ’ite au ē, ’o te tama’i hope’a teie a tō’u nūna’a, ’e nō te mea ho’i ’ua fa’auehia mai au e te Fatu ’eiaha vau e fa’ati’a i te mau pāpa’a parau mo’a i vaiihohia mai e tō mātou mau metua ’ia topa atu i roto i te rima o te mau ’āti Lamana, (nō te mea e ha’amou te mau ’āti Lamana i te reira) nō reira ’ua ’ō’oti au i teie nei pāpa’a parau nō roto mai i te mau ’api a Nephi ra, ’e ’ua huna ihora i te mau pāpa’a parau ato’a i vaiihohia mai iā’u e te rima o te Fatu i roto i te ’āivi ra o Kumora, maori rā ’o teie mau ’api ri’i ’o tā’u i hōro’a atu i tā’u tamaiti ra ia Moroni.

7 ’E i muri a’era, ’ua ’ite atu ra tō’u mau ta’ata, ’e tā rātou mau vahine, ’e tā rātou mau tamari’i i te mau nu’u fa’ehau o te mau ’āti Lamana i te haere-tia-ra’a mai ia rātou ra, ’e ’ua tīa’i noa atu ra ia rātou ma te mata’u rahi i te pohe ’o tei fa’a’ī i te ’ōuma o teie feiā parauti’a ’ore.

8 ’E i muri a’era, ’ua haere mai ra rātou e ’aro ia mātou, ’e ’ua ’ī roa a’era te mau ta’ata ato’a i te mata’u rahi nō te rahi o tō rātou ra mau ta’ata.

9 ’E i muri a’era, ’ua ’aro mai ra rātou i tō’u ra mau ta’ata ma te fa’a’ohipa i te ’o’e, ’e te fana, ’e te te’a, ’e te ’ōpahi, ’e te mau huru mauha’a tama’i ato’a ra.

10 ’E i muri a’era, ’ua taparahihia tō’u mau ta’ata ’e ’ua ma’iri ihora rātou i raro, ’oia ïa, tō’u mau ta’ata hō’ē ’ahuru tauatini i pīha’i iho iā’u, ’e ’ua puta ato’a vau ’e ’ua ma’iri ihora i rotopū ia rātou ; ’e ’ua haere mai ra te mau ’āti Lamana nā pīha’i iho iā’u, ’aita rā rātou i ha’apohe roa iā’u.

11 ’E hope a’era tō’u ra mau ta’ata pā’āto’a i te taparahihia e rātou, maori rā te piti ’ahuru ’e ma maha tō mātou i toe mai, (’e tei rotopū ato’a i taua mau ta’ata ra tā’u tamaiti o Moroni) ’ua ’ite atu ra mātou ’o tei ora na mai rotopū mai i tō mātou mau ta’ata i pohe, i te po’ipo’i a’e ’a ho’i atu ai te mau ’āti Lamana i tō rātou mau pūhapara’a, i te ’ahuru tauatini o tō’u ra mau ta’ata ’o tā’u i arata’i i mua roa, ’e ’ua ’ite atu vau i te reira mai ni’a mai i te ’āivi ra o Kumora.

12 ’E ’ua ’ite ato’a atu mātou i te mau ta’ata hō’ē ’ahuru tauatini ’o tei arata’ihia e tā’u ra tamaiti ’o Moroni.

13 ’E inaha, ’ua taparahihia te mau ta’ata hō’ē ’ahuru tauatini a Gidigidona, ’e ’o ’oia ato’a i pīha’i iho ia rātou.

14 ’E ’ua taparahihia Lama i pīha’i iho i tōna mau ta’ata hō’ē ’ahuru tauatini ; ’e ’ua taparahihia Gilagala i pīha’i iho i tōna mau ta’ata hō’ē ’ahuru tauatini, ’e ’ua taparahihia Limaha i pīha’i iho i tōna mau ta’ata hō’ē ’ahuru tauatini ; ’e ’ua taparahihia Ieneuma i pīha’i iho i tōna mau ta’ata hō’ē ’ahuru tauatini, ’e ’ua taparahihia Kumeniha, ’e Moroniha, ’e Anetionuma, ’e Sibeloma, ’e Sema ’e Iosa, i pīha’i iho i tō rātou mau pupu ta’ata tāta’itahi hō’ē ’ahuru tauatini.

15 ’E i muri a’era, tē vai ra hō’ē ’ahuru fa’ahou ta’ata tei pohe i te ’o’e, ’e tā rātou ato’a mau pupu ta’ata tāta’itahi hō’ē ’ahuru tauatini ; ’oia ïa, ’ua pohe ato’a tō’u mau ta’ata tā’āto’a, maori rā te mau ta’ata e piti ’ahuru ’e ma maha i pīha’i iho iā’u ra, ’e te tahi atu ā pae i horo atu i te mau fenua i te pae apato’a ra, ’e te tahi pae i ’āmui atu i te mau ’āti Lamana ra, ’e ’ua vai noa tō rātou ’i’o, ’e te mau ivi, ’e te toto i ni’a i te fenua nei, ’e ’ua vaiihohia mai teie mau mea e te rima o te feiā i taparahi ia rātou ra, ’ia pē i ni’a i te fenua, ’e ’ia ho’i atu i te repo nō reira mai rātou ra.

16 ’E ’ua ’oto roa tō’u nei vārua i te māuiui rahi nō tō’u mau ta’ata i taparahihia, ’e ’ua ’auē a’era vau i te nā-’ō-ra’a ē :

17 ’Auē ho’i ’outou e te mau ta’ata nehenehe ē, e aha ho’i ’outou i haere ’ē atu ai i te mau ’ē’a o te Fatu ! ’Auē ho’i ’outou e te mau ta’ata nehenehe ē, e aha ho’i ’outou i pāto’i ai ia Iesu, ’o tē ti’a ra ma te rima fa’atoro-noa-hia nō te fāri’i mai ia ’outou !

18 Inaha, ’āhiri ’aita ’outou i nā reira, ’aita roa ïa ’outou i ma’iri i raro. Inaha rā, ’ua ma’iri ’outou i raro ’e tē ’oto nei au nō tō ’outou feiā i pohe.

19 ’Auē ho’i ’outou e te mau tamāroa nehenehe ē ’e te mau tamāhine nehenehe ē, ’e ’outou e te mau metua ’e te metua vahine ē, ’e ’outou e te mau tāne ’e te vahine ē, ’e ’outou e te mau ta’ata nehenehe ē, e aha ho’i ’outou i ma’iri ai i raro !

20 Inaha rā, ’ua reva ’ē atu ’outou, e ’ore roa e ti’a i tā’u mau ’oto ’ia fa’aho’i mai ia ’outou na.

21 ’E e tae vave mai te mahana e riro ai tō ’outou tino tāhuti ’ei tino tāhuti ’ore ; ’e teie mau tino pohe noa e pē nei, e riro ’oi’oi ïa ’ei mau tino pohe ’ore ; ’e i reira e mea ti’a roa ia ’outou ’ia ti’a atu i mua i te vāhi ha’avāra’a a te Mesia, ’ia ha’avāhia mai te au i tā ’outou mau ’ohipa ; ’e mai te mea e mea parauti’a ’outou ra, e ha’amaita’ihia ïa ’outou e tō ’outou mau metua ato’a i reva ’ē atu nā mua roa ia ’outou.

22 ’Āhiri ho’i ’outou i tātarahapa, ’aore ïa teie pohe rahi i tae mai i ni’a iho ia ’outou. Inaha rā, ’ua reva ’ē atu ’outou, ’e ’ua ’itea ho’i tō ’outou huru i te Metua, ’oia ïa, te Metua mure ’ore i te ao ra ; ’e e ravehia ’outou e ana mai te au i tāna ra parauti’a ’e te aroha.