1 Na nau mi pinisim rekot bilong mi long bagarap bilong ol pipol bilong mi, ol lain bilong Nifai. Na em i kamap we mipela wokabaut bipo long ol lain bilong Leman.

2 Na mi, Momon, raitim wanpela pas i go long king bilong ol lain bilong Leman, na laikim long em olsem em bai givim taim long mipela inap long mipela bai bung wantaim ol pipol bilong mipela long graun bilong Kamora, long wanpela liklik maunten i bin kolim Kamora, na mipela ken pait wantaim ol long dispela hap.

3 Na em i kamap we king bilong ol lain bilong Leman i bin tok orait long mi long samting we mi laikim.

4 Na em i kamap we mipela i bin go long graun bilong Kamora, na mipela sanapim ol haus sel bilong mipela raun nabaut long liklik maunten Kamora, na em i wanpela graun gat planti wara, riva, na hul wara, na mipela i bin gat hop long winim ol lain bilong Leman long hia bikos long ol dispela samting.

5 Na taim tri handret na eitpela ten foa krismas i go pas, mipela i bin bungim pinis olgeta hap lain long ol pipol bilong mipela long graun bilong Kamora.

6 Na em i kamap we taim mipela bung wantaim olgeta pipol bilong mipela long wanpela bodi long graun bilong Kamora, lukim mi, Momon, i stat long kamap lapun, na bikos mi save olsem dispela i laspela pait long ol pipol bilong mi, na bikos Bikpela i bin tokim mi olsem mi no ken larim ol rekot em i bin givim i kamdaun long ol tumbuna papa bilong mipela, em i holi, long go long han bilong ol lain bilong Leman, (bikos ol lain bilong Leman ol bai bagarapim ol) olsem na mi bin raitim dispela rekot long ol plet bilong Nifai, na haitim long liklik maunten Kamora olgeta rekot em Bikpela i bin givim long mi wantaim han bilong em, tasol mi givim long pikinini bilong mi Moronai ol dispela liklik namba long ol plet.

7 Na em i kamap we ol pipol bilong mi, wantaim ol meri na ol pikinini bilong ol, i nau lukim ol ami bilong ol lain bilong Leman wokabaut kam long hap bilong ol, na wantaim dispela poret nogut tru bilong idai i bin pulumapim bros bilong olgeta pasin nogut lain, ol i bin wetim long kisim ol.

8 Na em i kamap we ol i bin kam long pait wantaim mipela, na olgeta sol ol i bin poret nogut tru bikos namba bilong ol i traipela tru.

9 Na em i kamap we ol i paitim ol pipol bilong mi wantaim naip bilong pait, banara wantaim spia bilong banara, tamiok, na wantaim olgeta kainkain samting bilong pait long bikpela pait.

10 Na em i kamap we ol man bilong mi ol i bin katim ol i go daun, ye, tru tumas, wanpela ten tausen man bilong mi ol i bin i stap wantaim mi, na mi pundaun wantaim sua namel long ol, na ol i abrusim mi olsem na ol i no pinisim laip bilong mi.

11 Na bihain ol i go na katim i go daun olgeta pipol bilong mi, tasol mipela tupela ten foa, (namel long em i pikinini bilong mi Moronai) na mipela i bin i stap laip long ol pipol bilong mipela ol i idai, na bihain long ol lain bilong Leman i go bek long kem bilong ol, mipela go antap long liklik maunten Kamora long narapela de na lukim wanpela ten tausen ol pipol bilong mi em mi bin lidim na go pas ol i bin katim ol i go daun.

12 Na tu mipela lukim wanpela ten tausen long ol pipol bilong mi we pikinini bilong mi Moronai i bin lidim.

13 Na lukim, wanpela ten tausen bilong Gidgidona ol i bin pundaun wantaim em namel long ol.

14 Na Lema i bin pundaun wantaim ol wanpela ten tausen bilong em, na Gilgal i pundaun wantaim wanpela ten tausen bilong em, na Jenium i pundaun wantaim wanpela ten tausen bilong em, na Kumenaia, Moronaia, Antionum, Siblom, Sem wantaim Jos ol i bin pundaun wantaim wanwan wanpela ten tausen bilong ol.

15 Na em i kamap we wanpela ten moa ol lida ol i bin pundaun wantaim wanwan wanpela ten tausen bilong ol, ye, tru tumas, olgeta pipol bilong mi, tasol dispela tupela ten foa man ol i bin i stap wantaim mi, na tu wanpela liklik namba ol i ronawe i go long ol kantri long hap bilong saut, na wanpela liklik namba ol i lusim ol i go joinim ol lain bilong Leman, na olgeta pipol bilong mi ol i bin pundaun, na skin, bun wantaim blut bilong ol i stap long pes bilong graun, bikos ol lain husat ol i kilim ol i bin lusim ol long sting long graun, na long bruk i go long pipia na go bek long mama graun bilong ol.

16 Na sol bilong mi i bruk wantaim pen, bikos ol pipol bilong mi ol i bin kilim, ol na mi bin krai:

17 O yupela gutpela lain, bilong wanem yupela i bin lusim ol rot bilong Bikpela! O yupela gutpela lain, bilong wanem yupela les long dispela Jisas, em i bin sanap na opim han long kisim yupela!

18 Lukim, yupela bai i no inap pundaun sapos yupela i no wokim dispela. Tasol lukim, yupela i pundaun, na mi sore long lusim yupela.

19 O yupela gutpela pikinini man na pikinini meri, yupela ol papa na ol mama, yupela ol man na ol meri, yupela gutpela lain, bilong wanem yupela i bin pundaun!

20 Tasol lukim, yupela i go pinis, na ol sore bilong mi i no inap kisim yupela kam bek.

21 Na de i klostu kam we skin bilong idai bilong yu mas pasim skin bilong oltaim, na ol dispela bodi em i nau sting long idai mas klostu kamap oltaim bodi, na bihain long dispela, yupela mas sanap long pesim jasmen-sia bilong Krais, long jasim ol wok bilong yupela, na sapos yupela i stretpela lain, yupela bai kisim blesin wantaim ol tumbuna papa bilong yupela em ol i bin go pas long yupela.

22 O inap yupela bin tanim bel bipo long dispela bikpela bagarap tru i bin kamap long yupela. Tasol lukim, yupela i go pinis, na Papa, ye, Papa Oltaim bilong heven, em i save sindaun bilong yupela, na inap em i stretim yupela long stretpela pasin na marimari bilong em.