1 Ao ngkai, nooria I tangiria n taetae nakoia nikiraia te botanaomata aio ake a aki tiringaki, ngkana arona bwa te Atua e na anganiia au taeka, bwa aonga n atai taekan aia bwai aia bakatibu, ngkami aika nikiraia kaain te bata are Iteraera; ao aikai taeka ake I taekin:

2 Kam riai n ataia ae ngkami kaain te bata are Iteraera.

3 Kam na ataia bwa kam riai n rairinanomi, bwa kam raawa n aki kona ni kamaiuaki.

4 Kam riai n ataia bwa kam na katikui inano ami bwai ni buaka, ma n aki manga kukurei ni kawawaean te raraa, ma n aki manga oki n anai, ti ngkana e tuangingkami te Atua.

5 Kam riai n ataia bwa kam riai ni karekea aia atatai ami bakatibu, ma n rairinanomi man ami bure ni kabane ma buakakami, ma ni kakoaua Iesu Kristo, bwa bon ngaia Natin te Atua, ao e tiringaki irouia Iutaia, ao man mwaakan te Tama ao e a tia ni manga kateirakeaki, are e a tia iai ni karekea te tokanikai iaon te rua ni mate; ao e kabwautaki naba weten te mate irouna.

6 Ao e kakoroa bukin mangautiia maate, are a na kateirakeaki iai aomata bwa a na tei imatan ana kaintekateka ni motikitaeka.

7 Ao e a tia ni kakoroa bukin kaboakin te aonaba, n te aro are iai ae e kuneaki n aki bure imatana n te bong ni motikitaeka e na bon anganaki te kona ni maeka ma te Atua n Ueana, bwa e na anenea kamoamoana n aki totoki ma taan anene i karawa, nakon te Tama, ao nakon te Nati, ao nakon te Tamnei ae Raoiroi, are bon temanna te Atua, n te aro ni kakukurei ae aki totoki.

8 Ngaia are rairinanomi, ma ni bwabetitoaki n aran Iesu, ma n taua ni kamatoaa ana euangkerio Kristo, are e na kateaki imatami, tiaki ti n te reekoti aio ma n te reekoti naba are e na roko nakoia Tientaire mai irouia Iutaia, are te reekoti are e na roko mai irouia Tientaire nakoimi.

9 Bwa nooria, e koreaki aio ma te kantaninga bwa kam na kakoaua anne; ao ngkana kam kakoaua anne kam na kakoaua aio naba; ao ngkana kam kakoaua aio ao kam kona n atatai ni kaineti ma aroia ami bakatibu, ao mwakuri ake a kamimi ake a karaoaki ni mwaakan te Atua are e mena i buakoia.

10 Ao kam na ataia naba bwa ngkami nikiraia kanoan Iakobwa; ngaia are kam a warekaki i buakoia aomatan te moan berita ae tabu; ao ngkana arona bwa kam kakoaua Kristo, ma ni bwabetitoaki, n te ran moa, ao i mwina n te ai ma te Tamnei ae Raoiroi, ma ni katotonga te banna are iroun te Tia Kamaiu, n aron are e a tia n tuangira, ao e na nako raoi aromi n te bong ni motikitaeka. Amen.